အူမကြီးကင်ဆာရောဂါကို ကာကွယ်ပေးနိုင်တဲ့စားသုံးမှုပုံစံ (၆) မျိုး

• စားသောက်မှုပုံစံဟာ ကင်ဆာရောဂါဖြစ်ပွားစေတဲ့ အထူးသဖြင့် အူမကြီး ကင်ဆာ၊ ရင်သားကင်ဆာနဲ့ ပန်ကရိယကင်ဆာဖြစ်ပွားစေတဲ့ အကြောင်းအရင်း များရဲ့ (၃)ပုံ (၁)ပုံ လို့ပြောလို့ရပါတယ်။
• အနီရောင်အသားများကိုပုံမှန်စားသုံးခြင်းဟာ နာတာရှည်ရောင်ရမ်းခြင်းကို ဖြစ်စေပြီး ဒီထက်ပိုဆိုးရွားလာရင် အူမကြီးကင်ဆာအထိ ဖြစ်လာနိုင်ပါတယ်။
• လေ့ကျင့်ခန်းပုံမှန်လုပ်ခြင်း၊ ကိုယ်အလေးချိန်ထိန်းသိမ်းခြင်း၊ ဆေးလိပ်နဲ့အရက် ဖြတ်ခြင်း(သို့)ရှောင်ခြင်း၊ စိတ်အေးငြိမ်းအောင်နေထိုင်ကျင့်ကြံခြင်း၊ နှစ်စဉ်ကျန်းမာရေးစစ်ဆေးခြင်း စတာတွေဟာ ကင်ဆာစတင်ဖြစ်ပွားခြင်းကို ကာကွယ်ပေးနိုင်ပါတယ်။

ကင်ဆာနဲ့ပတ်သက်ရင် ဘယ်လိုကင်ဆာပဲဖြစ်ဖြစ် ၊ ဘယ်အခြေအနေပဲဖြစ်ဖြစ် လူတိုင်းက မလိုလားကြပါဘူး။ ကင်ဆာရောဂါဟာ လူနာအတွက် ရော လူနာနဲ့အနီးအနားမှာ ရှိတဲ့သူတွေအတွက်ရော ကြီးမားတဲ့စိုးရိမ်ပူပန်မှုကိုဖြစ်စေတဲ့ ကြောက်စရာရောဂါဆိုးကြီးဖြစ်ပါတယ်။ ကင်ဆာရောဂါကုသမှုသံသရာဟာ မပြီးဆုံးနိုင် ဘဲ စိတ်ရောကိုယ်ပါပင်ပန်းဆင်းရဲတာကြောင့် ဖြစ်လာမှ ကုသတာထက် အတတ်န်ိုင်ဆုံး ကြိုတင်ကာကွယ်ခြင်းသည်သာ ပိုကောင်းတဲ့ နည်းလမ်းဖြစ်ပါတယ်။

စားသောက်မှုပုံစံဟာ ကင်ဆာရောဂါဖြစ်ပွားစေတဲ့ အထူးသဖြင့် အူမကြီးကင်ဆာ၊ ရင်သားကင်ဆာနဲ့ ပန်ကရိယကင်ဆာဖြစ်ပွားစေတဲ့ အကြောင်းအရင်းများရဲ့ (၃)ပုံ (၁)ပုံ လို့ပြောလို့ရပါတယ်။ ဒါကြောင့် ကျန်းမာရေးနဲ့ညီညွတ်တဲ့ စားသောက်မှုပုံစံ ကိုရွေးချယ်ခြင်းနဲ့ သင့်တင့်မျှတစွာစားသုံးမှုအလေ့အကျင့်ဟာ ကင်ဆာရောဂါကို ကာကွယ်ရာမှာ အဓိကကျတဲ့ အခန်းကဏ္ဍတစ်ခုဖြစ်လာပါတယ်။

၁။ အစုံအလင်ပါဝင်ပြီးသင့်တင့်မျှတတဲ့စားသောက်မှုပုံစံအတိုင်း စားသုံးပါ။

တူညီတဲ့အစားအသောက်တွေကို ထပ်ခါထပ်ခါစားသုံးခြင်းဟာ ခန္ဓာကိုယ်ကို ကောင်းစွာအလုပ်လုပ်ဖို့လိုအပ်တဲ့ အာဟာရဓာတ်တွေမထောက်ပံ့ပေးတဲ့ အဓိပ္ပါယ် ဖြစ်ပါ တယ်။ ဒါပေမယ့် ကျွန်တော်တို့အနေနဲ့ အစာအုပ်စု (၅)စု သင့်တင့်စုံလင်မျှ တစွာပါဝင် တဲ့ စားသောက်မှုပုံစံအတိုင်း စားသုံးမယ်ဆိုရင် ကျန်းမာရေးကောင်းမွန်ပြီး ခန္ဓာကိုယ်ခုခံအားစနစ်ကိုမြှင့်တင်ပေးကာ ခန္ဓာကိုယ်တွင်းမမျှတမှုမှန်သမျှကို ပြန်လည် ကောင်းမွန်စေပါတယ်။

၂။ ကင်ဆာကိုကာကွယ်နိုင်တဲ့ ရောင်စုံသစ်သီးနဲ့ ဟင်းသီးဟင်းရွက်များကို စားသုံးပါ။

• အနီရောင် ရှိတဲ့ သစ်သီးနဲ့ ဟင်းသီးဟင်းရွက်များမှာ Lycopene ခေါ် ဓာတ်တိုးဆန့်ကျင်ပစ္စည်းအပြည့်အဝပါဝင်ပါတယ်။ ခရမ်းချဉ်သီး၊ အနီရောင် ငရုတ်သီး၊ သကြားမုန်လာ(Beetroot)၊ အနီရောင်ပန်းသီး စတာတွေမှာ အဆိုပါ အသုံးဝင်တဲ့ ဓာတ်ပစ္စည်း အများအပြားပါဝင်ပါတယ်။
• အဝါရောင်နဲ့လိမ္မော်ရောင် အသီးများမှာ ဗီတာမင်အေနဲ့ ဘီတာကာရိုတင်း (Beta Carotene) ခေါ် ဓာတ်တစ်မျိုးကြွယ်ဝစွာပါဝင်ပါတယ်။ ရွှေဖရုံသီး၊ မုန်လာဥနီ နဲ့ လိမ္မော်သီးများမှာ အဆိုပါ အာဟာရဓာတ်တွေ အများအပြား ပါဝင်ပါတယ်။
• အစိမ်းရောင် သစ်သီးနဲ့ ဟင်းသီးဟင်းရွက်တွေထဲမှာတော့ အယ်လ်ဖာကာရိုတင်း (Alpha Carotene)နဲ့ ကလိုရိုဖီးလ်(Chlorophyll) ဓာတ်တွေ ပါဝင်ပါတယ်။ ဟင်းနုနယ်၊ ကိုက်လန် ၊ ပန်းဂေါ်ဖီစိမ်း စတာတွေ အားလုံးမှာ အဆိုပါဓာတ်တွေ အများကြီးပါဝင်ပါတယ်။
• ခရမ်းရောင် မှာတော့ အန်သိုဆိုင်ယန်နင်(Anthocyanin) လို့ ခေါ်တဲ့ ဓာတ် တစ်မျိုးပါဝင်ပါတယ်။ ခရမ်းရောင်ဂေါ်ဖီထုပ်၊ ဘလူးဘယ်ရီ၊ အောင်မဲညို၊ စပျစ်သီးခြောက်နဲ့ ကောက်ညှင်းငချိတ်တွေမှာ အဆိုပါဓာတ်တွေ အပြည့်အဝ ပါဝင်ပါတယ်။
• အဖြူရောင် ဟင်းသီးဟင်းရွက်နဲ့သစ်သီးတွေမှာ Xanthone လို့ ခေါ်တဲ့ ဓာတ်တွေ အများကြီးပါဝင်ပါတယ်။ ကြက်သွန်ဖြူ၊ ငှက်ပျောသီး၊ ဂျင်း၊ ပန်းဂေါ်ဖီ ၊ မုန်လာဥဖြူ နဲ့ မှိုအမျိုးမျိုးမှာ အဆိုပါဓာတ်တွေ မြင့်မားစွာပါဝင်ပါတယ်။

၃။ အစေ့အဆန်များများစားသုံးပါ။

အခွံမချွတ်ထားတဲ့ အဆန်များနဲ့ အစေ့အမျိုးမျိုးမှာ အာဟာရဓာတ်တွေ မြင့်မားကြွယ်ဝ စွာပါဝင်ပါတယ်။ အဆိုပါ အစေ့အဆန်များမှာ ဗီတာမင်၊ သတ္ထုဓာတ်၊ အမျှင်ဓာတ်၊ ပရိုတိန်း နဲ့ ဓာတ်တိုးဆန့်ကျင်ပစ္စည်းအမျိုးမျိုး ပါဝင်ပါတယ်။ စားသုံးသင့်တဲ့ အစေ့အဆန်များကို အကြံပြုရရင်တော့ ဆန်လုံးညို၊ နှံစားပြောင်း၊ အယ်လ်မွန်စေ့၊ သီဟိုစေ့၊ အခွံမာစေ့ နဲ့ ထောပတ်ပဲ တို့ဖြစ်ပါတယ်။ အဆိုပါ အစေ့အဆန်များဟာ ကျွန်တော်တို့ရဲ့ သွေးတွင်းသကြားဓာတ်ကို ထိန်းညှိပေးတဲ့အပြင် ၎င်းတို့မှာပါဝင်တဲ့ အမျှင်ဓာတ်များဟာ အစာချေစနစ်ကို အဆင်ပြေချောမွေ့စေပါတယ်။ ဒါကြောင့် အူမကြီးကင်ဆာဖြစ်ပွားစေတဲ့ အကြောင်းအရင်းတစ်ချက်ဖြစ်တဲ့ ဝမ်းချုပ်ခြင်းကိုလည်း လျော့ကျစေပါတယ်။

၄။ အစာစားတဲ့အခါ အစပ်ထည့်စားပါ။

အစပ် ဟာ အစားအစာတစ်ခုရဲ့ အနံ့အရသာကို ပိုမိုကောင်းမွန်အောင် ပံ့ပိုးပေးတဲ့အပြင် ၎င်းမှာပါဝင်တဲ့ ဂုဏ်သတ္တိများဟာလည်း ရောင်ရမ်းမှုကိုလျော့ကျ စေပြီး ခုခံအားစနစ်ကိုလှုံ့ဆော်ပေးတဲ့အပြင် ကင်ဆာဖြစ်နိုင်ခြေကိုပါလျှော့ချပေး ပါတယ်။ ဥပမာ အနေနဲ့ ငရုတ်သီး၊ နနွင်း၊ ကြက်သွန်ဖြူနဲ့ ဂျင်းတို့ပဲဖြစ်ပါတယ်။

၅။ အချို အငန်ကဲပြီး အဆီများတဲ့အစားအစာများနဲ့ အနီရောင်အသားများ ကို ချင့်ချိန်စားသုံးပါ။

• အချိုအငန်ကဲတဲ့အစားအစာများ၊ ဆားရည်စိမ်ပြီး အငံများတဲ့အစားအစာများ ပြုလုပ်ရာမှာ ဆား အများကြီးသုံးရတာကြောင့် သွေးတိုးရောဂါဖြစ်စေနိုင် ပါတယ်။
• အရေပြားမဖယ်ထားတဲ့အသားများ၊ တိရစ္ဆာန်ကနေရတဲ့အဆီများ၊ ထောပတ် နဲ့ အုန်းနို့ တို့ဟာ ကိုယ်အလေးချိန်ကို မြင့်မားစေပြီး သွေးတိုးနဲ့ နှလုံးရောဂါ များကို ဖြစ်စေပါတယ်။
• အနီရောင်အသားများကို အလွန်အကျွံ ပုံမှန်စားသုံးခြင်းကြောင့် နာတာရှည် ရောင်ရမ်းခြင်းကိုဖြစ်စေပြီး အူမကြီးကင်ဆာအထိ ဖြစ်စေပါတယ်။  ဒါကြောင့် သင့်အနေနဲ့ ပရိုတိန်းဓာတ် အတွက် ငါးကို စားသုံးမယ်ဆိုရင် ကျန်းမာရေး အကျိုးကျေးဇူး ပိုများပါလိမ့်မယ်။

၆။ ကင်ဆာရောဂါဖြစ်စေတဲ့အစားအစာများကိုရှောင်ကျဉ်ပါ။

• ဆီဝအောင်ကြော်ထားတဲ့(သို့)ကင်ထားတဲ့အစားအစာများ - အသုံးပြုပြီးသား ဆီနဲ့ကြော်ထားတဲ့အစားအစာများ (သို့) မဲတူးနေအောင်ကင်ထားတဲ့ အစားအစာများဟာ အလွန်ကို အန္တရာယ်များပါတယ်။ တကယ်လို့ ကိုယ်က တူး တဲ့အထိကင်ထားတဲ့အစားအစာတွေကို မရှောင်နိုင်ဘူးဆိုရင် အဆိပ်ဖြစ်စေတဲ့ ဓာတ်စားသုံးမိတာကိုလျှော့ချဖို့ တူးနေတဲ့ နေရာတွေကို ဖယ်ပြီးမှ စားရပါမယ်။ ဒါပေမယ့် ဒီလိုအစားအစာတွေဟာ ပုံမှန်စားသုံးဖို့တော့မသင့်ပါဘူး။
• မှိုတက်နေတဲ့အစားအစာများ - ငရုတ်သီးခြောက်၊ ကြက်သွန်ဖြူခြောက်၊ မြေပဲ လှော် လို အစားအစာများဖြစ်ပါတယ်။ ဒီလိုအစားအစာတွေမစားခင်မှာ ဒီအစား အစာတွေကို အချိန်အကြာကြီးသိမ်းထားခဲ့တာ ဟုတ် မဟုတ်ဆိုတာ အရင် စစ်ဆေးဖို့လိုပါလိမ့်မယ်။
• ဆားနဲ့နယ်ထားတဲ့အစားအစာများ ၊ အရောင်(သို့)ပိုတက်ဆီယမ်နိုက်ထရိတ် ပါတဲ့ အသင့်စားအစားအစာများ၊ ကျပ်တင်ထားတဲ့အစားအစာများ - ဝက်အူချောင်း၊ ဝက်သားချဉ်၊ ငါးဆားနယ်၊ မုန့်အခြောက်များ၊ လတ်ဆတ်တယ် ထင်ရတဲ့အသားများ စတာတွေဖြစ်ပါတယ်။
• မကျက်တကျက်အစားအစာများ(သို့) အစိမ်းစားရတဲ့အစားအစာများ - သေချာ ကျက်အောင်မချက်ပြုတ်ထားတဲ့ အစားအစာများမှာ နာတာရှည်ရောင်ရမ်းခြင်း ကိုဖြစ်စတေဲ့ ပိုးမွှားတွေကပ်ငြိပါလာတတ်ပြီး ကင်ဆာအထိ ဖြစ်နိုင်ပါတယ်။

ကျန်းမာရေးကိုထိခိုက်စေတဲ့ ဘယ်အစားအစာတွေကိုရှောင်ပြီး ဘယ်အစားအစာတွေ ကို ရွေးချယ်စားသုံးရမယ် ဆိုတဲ့ ဆောင်ရန်ရှောင်ရန်များကို လိုက်နာဖို့လိုအပ်သလို လေ့ကျင့်ခန်းပုံမှန်လုပ်ခြင်း၊ ကျန်းမာရေးနဲ့ညီညွတ်တဲ့ ကိုယ်အလေးချိန်ကိုထိန်းခြင်း၊ အရက်နဲ့ ဆေးလိပ်သောက်သုံးမှုကို အကန့်အသတ်နဲ့ထိန်းခြင်း၊ စိတ်ချမ်းသာအောင် နေခြင်း စတဲ့ ပြုပြင်ပြောင်းလဲမှုများကိုလည်း လုပ်ဆောင်သင့်ပါတယ်။ ဒီလိုလုပ်ဆောင်ချက်အားလုံးဟာ သင့်ကို အူမကြီးကင်ဆာရောဂါအန္တရာယ်ကနေ ကင်းဝေးစေပါတယ်။

ဘဝနေထိုင်မှုကိုပြောင်းလဲခြင်းများအပြင် ကျွန်တော်တို့အနေနဲ့ နေ့စဉ် ဝမ်း(မစင်) ကို ပုံမှန်စစ်ဆေးသင့်ပါတယ်။ ဝမ်း(မစင်)ရဲ့ ပုံသဏ္ဍာန်နဲ့ အရာင်ကို စောင့်ကြည့်စစ်ဆေးရ မှာဖြစ်ပြီး ဒီနည်းဟာ လူတိုင်းအိမ်မှာ အလွယ်တကူလုပ်ဆောင်နိုင်တဲ့ အခြေခံ ကျန်းမာရေး စစ်ဆေးမှုနည်းလမ်းဖြစ်ပါတယ်။ တကယ်လို့ အကြောင်းအရင်းမရှိဘဲ ဝမ်း(မစင်) ဟာ အရောင် အနံ့ ပုံသဏ္ဍာန် ပြောင်းလဲသွားတယ်ဆိုရင် အူမကြီးမှန်ပြောင်းကြည့်ခြင်း (သို့) ကုသမှုအပါအဝင် ရောဂါရှာဖွေစစ်ဆေးမှုပြုလုပ်ဖို့ ဆရာဝန်နဲ့ ဆွေးနွေးပြသတိုင်ပင်သင့်ပါတယ်။ ပိုမိုလေ့လာရန်

Free first video call consultation with doctor. LEARN MORE HERE