ရင်သွေးငယ်များ ခြေခွင်ခြင်းဆိုင်ရာ သိကောင်းစရာများ နဲ့ ကုသမှုနည်းလမ်းများ

• အသက်တစ်နှစ်အောက်ကလေးငယ်တွေနဲ့ လမ်းလျှောက်သင်စ အရွယ်လေးတွေမှာ ခြေထောက်ခွင်ခြင်းကို အတွေ့ရ များလေ့ရှိပါ တယ်။ များသောအားဖြင့်တော့ ကလေးအသက်ကြီးလာတာနဲ့ အမျှ သဘာဝအတိုင်း ပြန်လည်ကောင်းမွန် လာတတ်ပါတယ်။ သို့သော်လည်း ဗီတာမင်ဒီ ချို့တဲ့လို့ ဖြစ်တဲ့ အရိုးပျော့ရောဂါ (rickets)၊ အရိုးကြီးထွားမှုပုံမှန်မဟုတ် တဲ့ရောဂါ (Blount’s disease)၊ ထိခိုက်ဒဏ်ရာရခြင်း သို့မဟုတ် တချို့ မျိုးရိုးလိုက်တဲ့ ဝေဒနာများကြောင့် လည်း ခြေခွင်ခြင်း ဖြစ်ပွားနိုင်ပါတယ်။
• ခြေခွင်ခြင်းအတွက် ကုသမှုပုံစံကတော့ ဖြစ်ပွားရတဲ့ အကြောင်းရင်းနဲ့ ဘယ်လောက်အတိုင်းအတာအထိ ခွင်နေသလဲ ဆိုတဲ့ အခြေအနေပေါ်မှာ မူတည်ပါတယ်။ မိဘများအနေနဲ့ မိမိတို့ကလေးကို သေချာစွာ စောင့်ကြည့်လေ့လာသင့် ပြီး ထိရောက်တဲ့ကုသမှုရရှိစေရန်နဲ့ ရေရှည်နောက်ဆက်တွဲပြဿနာများကို ကာကွယ်နိုင်ရန်အတွက် ဆရာဝန်နဲ့ သေသေချာချာ တိုင်ပင်ဆွေးနွေးကာ ပုံမှန်ပြသစစ်ဆေးမှုများ ပြုလုပ်သင့်ပါတယ်။

မိမိတို့ရဲ့ကလေးမှာ ခြေထောက်တွေ ကောက်/ခွင် နေတာကို သတိပြုမိတဲ့အခါ တစ်ခုခုမှားယွင်းနေပြီလားဆိုပြီး စိုးရိမ်ပူပန်တတ်ကြပါတယ်။ အမှန်စင်စစ်အားဖြင့် ကလေးငယ်တွေမှာ ခြေခွင်ခြင်းဟာ ဖြစ်လေ့ဖြစ်ထရှိပြီး များသောအားဖြင့် အသက်ကြီးလာတာနဲ့ အမျှ သဘာဝအတိုင်း ပြန်လည်ကောင်းမွန်လာတတ်ပါတယ်။ သို့သော်လည်း အချို့သောအခြေအနေတွေမှာတော့ ခြေခွင်ခြင်းဟာ နောက်ခံကျန်းမာရေးပြဿနာတစ်ခုခုရဲ့ လက္ခဏာဖြစ်နိုင်တာကြောင့် မိဘတွေအနေနဲ့ သေချာစွာဂရုပြုစောင့်ကြည့်သင့်ပြီး လိုအပ်ပါက မှန်ကန်တဲ့ ရောဂါရှာဖွေမှုနဲ့ ကုသမှုများခံယူနိုင်ရန် အထူးကုဆရာဝန်နဲ့ တိုင်ပင်ဆွေးနွေးသင့်ပါတယ်။

“ခြေခွင်ခြင်း” ဆိုတာ ကလေးရဲ့ ခြေထောက်များနဲ့ ဒူးဆစ်တွေ အပြင်ဘက်သို့ အနည်းငယ် ကောက်ထွက်နေတဲ့ အခြေအနေမျိုးဖြစ်ပါတယ်။ ခြေထောက်နှစ်ဖက်စလုံးမှာ ဖြစ်နေနိုင်သလို တစ်ဖက်တည်းမှာလည်းဖြစ်ပွားနိုင်ပြီး ခြေဖဝါးများ အတွင်းဘက်သို့ ကွေးဝင်နေခြင်းနဲ့လည်း တွဲပြီးတွေ့ရတတ်ပါတယ်။ ကလေးက ဖနောင့်နှစ်ဖက် ကို ထိပြီး မတ်မတ်ရပ်တဲ့အခါ ဒူးနှစ်ဖက်ဟာ ပူးမသွားဘဲ ကွာဟနေတတ်ပါတယ်။ အသက်တစ်နှစ်အောက် ကလေးများနဲ့ လမ်းလျှောက်တတ်စကလေးများမှာ အတွေ့ရများပါတယ်။ များသောအားဖြင့်တော့ ဒါဟာ ပုံမှန်အခြေအနေသာ ဖြစ်ပြီး အချိန်တန်လျှင် သဘာဝအတိုင်း ပြန်လည်တည့်မတ်သွားလေ့ရှိပါတယ်။

ခြေခွင်ခြင်းကို အဓိကအားဖြင့် အမျိုးအစား နှစ်မျိုး ခွဲခြားနိုင်ပါတယ် -

1. ကလေးများတွင် ဖြစ်လေ့ရှိသော ပုံမှန်ခြေခွင်ခြင်း

   ကိုယ်ဝန်ဆောင်စဉ်အတွင်း မိခင်ရဲ့ သားအိမ်ထဲ နေရာကျဉ်းကျဉ်းလေးထဲမှာ ဖွံ့ဖြိုးလာရတာကြောင့် ကလေးရဲ့ ပေါင်ရိုးများ ကွေးညွတ်ပြီး အနေအထားညှိယူရာမှတစ်ဆင့် ဖြစ်ပွားနိုင်ပါတယ်။

   ပုံမှန်ထက် စော၍ မတ်တတ်ရပ်ခြင်း သို့မဟုတ် လမ်းလျှောက်ခြင်းကဲ့သို့ ဖွံ့ဖြိုးမှု အလွန်မြန်ဆန်သော ကလေးငယ်များနဲ့ ကိုယ်အလေးချိန် ပုံမှန်စံနှုန်းထက် ကျော်လွန်နေသော ကလေးငယ်များတွင် ယာယီအားဖြင့် ခြေခွင်ခြင်း ဖြစ်ပွားနိုင်ပြီး၊ နောက်ပိုင်းမှာ တဖြည်းဖြည်း ပြန်လည်တည့်မတ်သွားတတ်ပါတယ်။

   အချို့သော ကလေးတွေမှာ အသက် ၃ နှစ်မှ ၄ နှစ်အရွယ် လမ်းလျှောက်တဲ့အခါ ဘဲသွား သွားခြင်း  သို့မဟုတ် တယောပုံစံ ခြေထောက်ဖြစ်ခြင်း လက္ခဏာများ ပြသတတ်ပြီး၊ အသက် ၇ နှစ်မှ ၈ နှစ်ဝန်းကျင် အထိ ကြီးထွားလာတဲ့ အခါမှာ ပုံမှန်ခြေထောက်အနေအထားသို့ သဘာဝအတိုင်း ပြန်လည်ရောက်ရှိသွားလေ့ ရှိပါတယ်။

2. ကလေးများတွင် ဖြစ်ပွားတတ်သော ပုံမှန်မဟုတ်သည့် ခြေခွင်ခြင်း - အောက်ပါအကြောင်းရင်း အမျိုးမျိုးကြောင့် ဖြစ်ပွားနိုင်ပါတယ် 
   • အရိုးကြီးထွားမှု ပုံမှန်မဟုတ်သည့်ရောဂါ Blount’s disease - ဒူးဆစ်အတွင်းဘက်ရှိ အရိုးကြီးထွားမှုဆိုင်ရာ ချွတ်ယွင်းချက် တစ်ရပ်ဖြစ်ပြီး၊ အထူးသဖြင့် အသက်ကြီးပိုင်းကလေးငယ်များ သို့မဟုတ် လူပျိုဖော်/အပျို ဖော်ဝင်စ ကလေးများတွင် ခြေခွင်ခြင်းဝေဒနာ တဖြည်းဖြည်း ပိုမိုပြင်းထန်လာစေ နိုင်ပါတယ်။
   • ရစ်ကက်အရိုးပျော့ရောဂါ - ဗီတာမင်ဒီနဲ့ ကယ်လ်စီယမ်ဓာတ် ပြင်းထန်စွာ ချို့တဲ့ခြင်းကြောင့် ဖြစ်ပွားရပြီး၊ အရိုးများကို ပျော့ပြောင်းသွားစေကာ ပုံသဏ္ဌာန် ပျက်လွယ်စေပါတယ်။
   • အရိုးပိုးဝင်ခြင်း သို့မဟုတ် ထိခိုက်ဒဏ်ရာရခြင်း - ၎င်းအခြေအနေများသည် အရိုးကြီးထွားမှုကို ထိခိုက်စေနိုင်ပြီး ခြေခွင်ခြင်းကို ဖြစ်ပေါ်စေနိုင်ပါတယ်။
   • အချို့သော မျိုးရိုးလိုက်သည့် ဝေဒနာများ - ဥပမာအားဖြင့် အရိုးကျိုးလွယ်သည့်ရောဂါ၊ ခန္ဓာကိုယ်တွင်း ဇီဝဖြစ်ပျက်မှုဆိုင်ရာ ချွတ်ယွင်းချက် သို့မဟုတ် အရိုးကြီးထွားမှုကို ထိခိုက်စေသည့် အခြားသော အခြေအနေများကြောင့်လည်း ဖြစ်ပွားနိုင်ပါတယ်။

မိမိတို့ရဲ့ကလေးမှာ အောက်ပါလက္ခဏာရပ်များထဲမှ တစ်ခုခုကို သတိပြုမိပါက မှန်ကန်သောရောဂါရှာဖွေမှု ခံယူနိုင်စေဖို့ ဆရာဝန်နဲ့ ပြသဆွေးနွေးသင့်ပါတယ်။  

• ခြေထောက်တစ်ဖက်တည်းသာ ခွင်နေခြင်း သို့မဟုတ် ခြေထောက်နှစ်ဖက် ခွင်ပုံချင်းမတူဘဲ သိသိသာသာ မညီမညာဖြစ်နေခြင်း။
• အလွန်အမင်းခြေခွင်ခြင်း သို့မဟုတ် အချိန်ကြာလာသည်နဲ့ အမျှ ပိုမိုဆိုးရွားလာခြင်း။
• ခြေထောက်နာကျင်ခြင်း၊ ဒူးနာခြင်း သို့မဟုတ် လမ်းလျှောက်ပုံ မမှန်ခြင်း။
• မိမိအသက်အရွယ်အလိုက် ရှိရမည့် အရွယ်အစားထက် သေးငယ်နေခြင်း သို့မဟုတ် ဖွံ့ဖြိုးမှုနောက်ကျ နေခြင်း (၎င်းသည် ရစ်ကက်ရောဂါ သို့မဟုတ် အခြားရောဂါများရဲ့ လက္ခဏာလည်းဖြစ်နိုင်ပါတယ်)။
• မိသားစုဝင်များထဲတွင် Blount’s disease ကဲ့သို့ ခြေခွင်ခြင်းကို ဖြစ်စေတတ်သော ရောဂါအခံရာဇဝင် ရှိခြင်း။

အများအားဖြင့် ကလေးတွေမှာ ခြေခွင်ခြင်းဟာ ကြီးထွားလာသည်နဲ့ အမျှ သဘာဝအတိုင်း ပြန်လည်ကောင်းမွန် လာတတ်ပါတယ်။ ခြေထောက်အရိုးတွေဟာ တဖြည်းဖြည်း တည့်မတ်လာလေ့ရှိပြီး ပုံမှန်အားဖြင့် အသက် ၂ နှစ်မှ ၃ နှစ်အရွယ်လောက်ဆိုရင် သိသာစွာ သက်သာလာတတ်ပါတယ်။ အသက် ၃ နှစ်မှ ၄ နှစ်အရွယ်တွင် အနည်းငယ် ပြန်ကောက်သွားသလို ဖြစ်နိုင်ပေမယ့် ပုံမှန်အားဖြင့် အသက် ၇ နှစ်မှ ၈ နှစ်အရွယ်ရောက်တဲ့အခါ ခြေထောက်အနေအထားမှာ ပုံမှန်အတိုင်း ပြန်လည်တည့်မတ်သွားတတ်တာကြောင့် မိဘများအနေဖြင့် ဘာမှ အထူးတလည် လုပ်ဆောင်ပေးဖို့ မလိုပါ။

• ရစ်ကက်အရိုးပျော့ရောဂါကြောင့် ခြေခွင်သော ကလေးငယ်များကုသမှုပုံစံ - ဆရာဝန်က ဗီတာမင်ဒီနဲ့ ကယ်လ်စီယမ်ဖြည့်စွက်စာများ သောက်သုံးရန် လမ်းညွှန်ပါ လိမ့်မယ်။ ကုသမှုကို စောစီးစွာ စတင်နိုင်ပါက များသောအားဖြင့် ထိရောက်မှု ရှိပါတယ်။
• Blount’s disease ကြောင့် ခြေခွင်သော ကလေးငယ်များ ကုသမှုပုံစံ - အစောပိုင်းအဆင့်တွင် ဖြစ်ပါက သို့မဟုတ် အလွန်အမင်း ခြေခွင်ခြင်း မဖြစ်သေးပါက ခြေထောက်အနေအထား ပြန်လည်တည့်မတ်လာစေဖို့ ခြေထောက်ကွင်း/ဒူးထိန်းကိရိယာများ တပ်ဆင်ရန် ဆရာဝန်က လမ်းညွှန်ပါလိမ့်မယ်။

ပြင်းထန်ခြေခွင်ခြင်းဖြစ်နေပြီး အခြားကုသနည်းလမ်းများနဲ့ မသက်သာခြင်း သို့မဟုတ် ပိုမိုဆိုးရွားလာတဲ့ လက္ခဏာများပြသပါက ဆရာဝန်က ပြုပြင်ခွဲစိတ်ကုသမှုပြုလုပ်ဖို့ လမ်းညွှန်နိုင်ပါတယ်။ ခွဲစိတ်ကုသတဲ့ နည်းလမ်းအမျိုးမျိုးရှိပါတယ်။

1. အရိုးကြီးထွားမှုကို ထိန်းညှိပြီး ပြုပြင်ပေးခြင်း ဒီနည်းလမ်းကတော့ သေးငယ်တဲ့ စတီးချောင်း သို့မဟုတ် စတီးပြားကလေးများကို ဒူးဆစ်အတွင်းဘက်ရှိ အရိုးကြီးထွားတဲ့နေရာမှာ ထည့်သွင်းထားပြီး အဲဒီနေရာရဲ့ အရိုးကြီးထွားမှုကို နှေးကွေးသွားစေတဲ့ သေးငယ်သော ခွဲစိတ်မှုတစ်ခု ဖြစ်ပါတယ်။ အရိုးရဲ့အပြင်ဘက်အပိုင်းက ပုံမှန်အတိုင်း ပိုမိုမြန်ဆန်စွာ ဆက်လက်ကြီးထွားလာတာနဲ့အမျှ ခြေထောက်ဟာ တဖြည်းဖြည်း ပြန်လည်တည့်မတ်လာမှာဖြစ်ပါတယ်။ ဒီနည်းလမ်းကို များသောအား ဖြင့် အရိုးဆက်လက်ကြီးထွားဖို့ အခွင့်အလမ်းကျန်ရှိနေသေးတဲ့ ကျောင်းနေအရွယ် ကလေးငယ်များမှာ ပြုလုပ်လေ့ရှိပါတယ်။
2. အရိုးဖြတ်၍ ပုံသဏ္ဌာန်ပြန်လည်ပြုပြင်ခြင်း ဒီနည်းလမ်းကတော့ ပိုမိုရှုပ်ထွေးတဲ့ ခွဲစိတ်မှုပုံစံဖြစ်ပြီး ခြေထောက်အရိုးရဲ့ တစိတ်တပိုင်းကို ဖြတ်တောက်ပြီး ဖြောင့်စင်းတဲ့အနေအထားဖြစ်အောင် ပြန်လည် ချိန်ညှိပေးပြီး စတီးပြား သို့မဟုတ် ဝက်အူ (screw) များဖြင့် ပုံသေတွဲချည်ထားခြင်း ဖြစ်ပါတယ်။ ဒီခွဲစိတ်မှုကို များသောအားဖြင့် အလွန်အမင်း ခြေခွင်နေခြင်းအခြေအနေများ၊ အခြားကုသနည်းလမ်း များနဲ့ မသက်သာတဲ့အခြေအနေများ သို့မဟုတ် အသက်ကြီးပိုင်းကလေးငယ်များတွင် ပြုလုပ်ပေးလေ့ ရှိပါတယ်။

အနီးကပ်စောင့်ကြည့်ပေးဖို့ လိုအပ်တဲ့ ပုံမှန်ခြေခွင်ခြင်းမျိုး ဖြစ်စေ၊ ကုသမှုခံယူနေရတဲ့ ခြေခွင်ခြင်းမျိုး ဖြစ်စေ ဆရာဝန်ရဲ့ လမ်းညွှန်မှာကြားချက်တွေကို တိကျသေချာစွာ လိုက်နာဖို့ အလွန်အရေးကြီးပါတယ်။ အထူးသဖြင့် ခွဲစိတ်ကုသမှု ခံယူပြီးချိန် သို့မဟုတ် ခြေထောက်ကွင်း/ဒူးထိန်းကိရိယာများ အသုံးပြုဖို့ လိုအပ်တဲ့ အခြေအနေ တွေမှာ ပိုပြီး လိုက်နာရမှာ ဖြစ်ပါတယ်။ ဒါမှသာ ဆရာဝန်ဟာ ကုသမှုတိုးတက်မှု အခြေအနေကို ဆန်းစစ်နိုင် ခြင်း၊ ကုသမှုအစီအစဉ်ကို လိုအပ်သလို ပြုပြင်ပြောင်းလဲနိုင်ခြင်းနဲ့ နောက်ဆက်တွဲဆိုးကျိုးများ မဖြစ်ပွား အောင် ကာကွယ်နိုင်ခြင်း စတာတွေကို ဆောင်ရွက်နိုင်မှာ ဖြစ်ပါတယ်။ ကလေးတွေမှာ ခြေခွင်ခြင်းဟာများသော အားဖြင့် ကြီးလာတာနဲ့အမျှ သဘာဝအတိုင်း ပြန်လည်ကောင်းမွန်သွားတတ်ပေမယ့် မိဘများအနေနဲ့ ကလေးရဲ့ ခြေထောက်အနေအထား ပြောင်းလဲမှုများ၊ လမ်းလျှောက်ပုံနဲ့ အခြားသော လက္ခဏာရပ်များကို ပုံမှန်ဂရုတစိုက် စောင့်ကြည့်ပေးသင့်ပါတယ်။ စိုးရိမ်ပူပန်မှု တစ်စုံတစ်ရာ ရှိပါက သို့မဟုတ် ပုံမှန်မဟုတ်တဲ့ လက္ခဏာများကို တွေ့ရှိရပါက မှန်ကန်တဲ့ ရောဂါရှာဖွေမှုနဲ့ ပြုစုစောင့်ရှောက်မှုများ ရရှိနိုင်ရန် ဆရာဝန်နဲ့ တိုင်ပင်ဆွေးနွေး သင့်ပါတယ်၊၊ ဒါမှသာ ကလေးငယ်ဟာ ကျန်းမာသန်စွမ်းပြီး ကောင်းမွန်သော ရုပ်ပိုင်းဆိုင်ရာ ဖွံ့ဖြိုးတိုးတက်မှု များနဲ့ အတူ ကြီးပြင်းလာနိုင်မှာပဲ ဖြစ်ပါတယ်။ 

ဆစ်မီတဝေ့နိုင်ငံတကာကလေးဆေးရုံကြီးရဲ့  ကလေးခွဲစိတ်ဆရာဝန်ကြီးများအဖွဲ့ဟာ ဒဏ်ရာအသေးဆုံးခွဲစိတ် ကုသမှုနည်းပညာကို ကျွမ်းကျင်စွာ လုပ်ဆောင်ပေးနိုင်ပါတယ်။ မွေးကင်းစကလေးများနဲ့ ကလေးငယ်များ အတွက် အသုံးပြုတဲ့ အဆိုပါနည်းပညာမှာ အလွန်သေးငယ်တဲ့ခွဲစိတ်ကိရိယာများကို အသုံးပြုပြီး ခွဲစိတ်ရာ အကျယ်မှာ ၂ မီလီမီတာမျှသာ ရှိတဲ့အတွက် ဒဏ်ရာရရှိမှုကို လျှော့ချပေးနိုင်တဲ့အပြင် ကလေးငယ်များကို ပိုမိုမြန်ဆန်စွာ ပြန်လည်နာလန်ထလာစေပါတယ်။

ဒါ့အပြင် ဆေးရုံမှာ Bi-plane နည်းပညာကို အသုံးပြုထားတဲ့ Hybrid ခွဲစိတ်ခန်း (Hybrid Operating Room) လည်း တပ်ဆင်ထားရှိပါတယ်။ ဒီနည်းပညာဟာ ဓာတ်မှန်ပုံရိပ်များကို မျက်နှာပြင်မျိုးစုံမှ တပြိုင်နက်ထဲ ရိုက်ကူးပေးနိုင်တာမို့ အရေးပေါ်အခြေအနေတွေမှာ ချက်ချင်းရောဂါရှာဖွေနိုင်ခြင်းနဲ့ ခွဲစိတ်မှုဆိုင်ရာ ဆုံးဖြတ် ချက်များကို မြန်ဆန်စွာ ချမှတ်နိုင်ခြင်းစတဲ့ ကဏ္ဍတွေမှာ များစွာအထောက်အကူပြုပါတယ်။ ဒီနည်းပညာဟာ ဆေးရုံရဲ့ ခွဲစိတ်ကုသမှု စွမ်းဆောင်ရည်ကို မြှင့်တင်ပေးရုံသာမက ရှုပ်ထွေးခက်ခဲတဲ့ ခွဲစိတ်မှုမျိုးခံယူဖို့ လိုအပ်တဲ့ လူနာတွေကိုပါ ပိုမိုကောင်းမွန်စွာ ပြုစုစောင့်ရှောက်ပေးနိုင်ပါတယ်ဆိုတဲ့အကြောင်း ရေးသားတင်ပြလိုက်ရ ပါတယ်။