လိပ်ခေါင်းအန္တရာယ် ကြိုတင်ကုသကာကွယ်

• လိပ်ခေါင်းရောဂါလက္ခဏာနဲ့ အကျိတ် ၊  အူမကြီးကင်ဆာ ရောဂါလက္ခဏာတွေဟာ တစ်ခုနဲ့တစ်ခု အရမ်းနီးစပ်တူညီကြပါတယ်။ ဒါကြောင့် သင့်တော်တဲ့ ကုသမှုများအတွက် ရောဂါရှာဖွေမှုကို သေချာတိကျစွာလုပ်ဆောင်ပေးနိုင်တဲ့ အထူးကုဆရာဝန်နဲ့ တိုင်ပင်ဖို့ကို အကြံပေးချင်ပါတယ်။
• ဖော်ပြပါရောဂါလက္ခဏာတစ်ခုခုကိုသင်ခံစားရပြီဆိုရင် ရောဂါရှာဖွေမှုနဲ့ ကုသမှုများပြုလုပ်ရမှာဖြစ်ပါတယ်။
  ဝမ်းသွားရာမှာ အနက်ရောင်ဝမ်း(မစင်)နှင့်သွေးချွဲများပါလာခြင်း ၊ သွေးအားနည်းခြင်း ၊ ဝမ်းမကြာခဏသွားခြင်း ၊ ဝမ်းသွားရခက်ခဲခြင်း ၊ စအိုနာကျင်ခြင်း ၊ ဝမ်းချုပ်လိုက် ဝမ်းလျှောလိုက်ဖြစ်ခြင်း ၊ ဝမ်းသွားမှုပမာဏနည်းလာခြင်း ၊ ရုတ်တရက်ကိုယ်အလေးချိန်ကျဆင်းခြင်း (သို့) မိသားစုထဲတွင်အူမကြီးကင်ဆာ ရောဂါရာဇဝင်ရှိသူများ။
• လိပ်ခေါင်းရောဂါဟာ ရောဂါလက္ခဏာပြင်းထန်မှုအပေါ်မူတည်ပြီး တစ်ယောက်နဲ့တစ်ယောက်မတူညီဘဲ ခွဲစိတ်ကုသမှုနည်းလမ်း(သို့) ခွဲစိတ်ရန်မလိုသည့်ကုသမှုနည်းလမ်း များနဲ့ ကုသနိုင်ပါတယ်။ ဆရာဝန်ညွှန်ကြားပေးတဲ့ ကုသမှုနည်းလမ်းဟာ အဓိက အရေးကြီးပါတယ်။

လိပ်ခေါင်းရောဂါဟာ ယနေ့ခေတ်မှာ တဖြည်းဖြည်းမြင့်တက်လာတဲ့ သာမန်ရောဂါဖြစ်ပေမယ့်လည်း ရောဂါအခြေအနေနဲ့ ပတ်သက်ပြီး အယူအဆ ကွဲလွဲမှုတွေ အများကြီးရှိနေဆဲဖြစ်ပါတယ်။ ဥပမာ - ဝမ်းထဲသွေးပါခြင်းရောဂါလက္ခဏာကို လိပ်ခေါင်းလို့ တရားသေမှတ်ယူလို့မရဘဲ အူထဲက အကျိတ်အဖု (သို့) အူမကြီးထဲက ရှာဖွေလို့မရနိုင်တဲ့အကျိတ်ကြောင့်လည်း ဖြစ်နိုင်ခြေရှိပါတယ်။

စအိုဟာ သေးငယ်တဲ့သွေးကြောပေါင်းမြောက်များစွာနဲ့ဖွဲ့စည်းထားပြီး စအိုကြွက်သားများ လျော့ရဲလာတဲ့အခါမှာ အဆိုပါသွေးကြောများဟာ ဖောင်းလာခြင်း(သို့) ရောင်လာတဲ့အခါ Hemorrhoids လို့ခေါ်တဲ့ လိပ်ခေါင်းဖြစ်ပေါ်လာပါတယ်။ အဆိုပါလိပ်ခေါင်းများဟာ အပြုံလိုက်(သို့) မတူညီတဲ့နေရာတွေမှာ ကြီးထွားလာပါတယ်။ လိပ်ခေါင်းရောဂါကို သာမန်အားဖြင့် အုပ်စုအမျိုးအစား (၂)ခုခွဲခြားနိုင်ပါတယ်။

အပြင်ဘက်မှာမမြင်နိုင်တဲ့သွေးကြောလေးများဖောင်းလာခြင်းကြောင့်ဖြစ်တဲ့ အတွင်းလိပ်ခေါင်းဟာ အစာဟောင်းအိမ်(Rectum)ထဲ မှာဖြစ်တတ်ပြီး လက်နဲ့စမ်းသပ်လို့ မရတာကြောင့် ရောဂါစစ်ဆေးဖို့အတွက် အူမကြီးမှန်ပြောင်းကြည့်(Colonoscopy) ဖို့ လိုအပ်ပါတယ်။ အဆိုပါလိပ်ခေါင်းရောဂါကို အရွယ်အစား အသေးဆုံးမှ အကြီးဆုံး အပေါ်မူတည်ပြီး အဆင့် (၄)ဆင့် ထပ်မံခွဲခြားနိုင်ပါတယ်။

အဆင့်(၁) - အဆိုပါလိပ်ခေါင်းများဟာ သေးငယ်ပြီး ဝမ်းသွားနေစဉ်နဲ့ ဝမ်းသွားပြီးနောက်ပိုင်းသွေးထွက်တတ်ပေမယ့် အစာဟောင်းအိမ်ထဲမှ စအိုအပြင်ဘက်ကို ပြူးထွက်လာ ခြင်းမရှိပါဘူး။

အဆင့်(၂) - အဆိုပါလိပ်ခေါင်းများဟာ ဝမ်းသွားနေစဉ်အတွင်း စအိုအပြင်ဘက်ကို ပြူးထွက်လာကာ ဝမ်းသွားပြီးတဲ့အခါ ကြွက်သားများကျုံ့သွားတာ ကြောင့် ၎င်းရဲ့ မူလပုံစံပြန်ဖြစ်သွားပါတယ်။ ဒီအခြေအနေဟာ မကြာခဏသွေးထွက်စေပြီး ထွက်လာတဲ့ မစင်ဟာလည်း အနီရင့်ရောင် ရှိပါတယ်။

အဆင့်(၃) - ဒီအခြေအနေမှာရှိတဲ့လိပ်ခေါင်းများဟာ ကြီးမားပြီး ဝမ်းသွားနေစဉ် စအိုအပြင်ဘက်ကို ပြူးထွက်လာပါတယ်။ ပြီးတဲ့အခါမှာ လူနာက ပြန်မတွန်းတင် ပေးနိုင်ရင် မူလ ပုံစံအတိုင်း ပြန်မဖြစ်နိုင်ဘဲ လိပ်ခေါင်းကအပြင်ဘက်မှာတွဲလောင်းကျနေပါတယ်။  ဒီအခြေအနေဟာ မကြာခဏသွေးထွက်ခြင်းကိုဖြစ်စေပြီး စအိုကျိန်းစပ်တဲ့ဝေဒနာကို ခံစားရစေပါတယ်။

အဆင့်(၄) - ဒီအဆင့်ရောက်ရင် လိပ်ခေါင်းဟာ အတော်လေးကြီးမားပြီး စအိုကနေ တစ်ချိန်လုံးပြူးထွက်နေကာ ဘာနဲ့မှမတူနဲ့ ပြင်းပြင်းထန်ထန်နာကျင်မှု ဖြစ်နိုင်လို့ ရောဂါခံစားရသူရဲ့ နေ့စဉ်ဘဝကို အနှောင့်အယှက်ဖြစ်စေပါတယ်။

ဒီအမျိုးအစားထဲမှာပါတဲ့လိပ်ခေါင်းဟာ စအိုအပြင်ဘက်မှာကြီးထွားလာတတ်ပြီး အဲဒီနေရာမှာရှိတဲ့သွေးကြောများဖောင်းလာခြင်းကြောင့် ဖြစ်တာပါ။ အဆိုပါလိပ်ခေါင်းများဟာ ပိုမိုနာကျင်ပြီး ရောင်လာတဲ့အခါမှာ အပြင်ဘက်ကနေမြင်နိုင်ပြီး လက်နဲ့လည်း စမ်းသပ်နိုင်ပါတယ်။

ဒါပေမယ့်လည်း အများအားဖြင့် လူနာတွေဟာ တစ်ချိန်တည်းမှာ အပြင်လိပ်ခေါင်းရော အတွင်းလိပ်ခေါင်းကိုပါ ကြုံတွေ့ရတတ်ပါတယ်။

လိပ်ခေါင်းရောဂါလက္ခဏာများနဲ့ အကျိတ်များဟာ အူမကြီးကင်ဆာ မှာဖြစ်တတ်တဲ့ လက္ခဏာ ၊ အကျိတ်များ နဲ့ ဆင်တူပါတယ်။ ဒါကြောင့် သင့်တော်မှန်ကန်တဲ့ကုသမှုများမလုပ်ခင်မှာ အခြေ အနေကို တိတိကျကျ ခေါင်းစဉ်တပ်သတ်မှတ်နိုင်ဖို့ တတ်ကျွမ်းနားလည်သူများနဲ့တိုင်ပင်ကာ ရောဂါရှာဖွေမှုများပြုလုပ်သင့်ပါတယ်။  အူမကြီးကင်ဆာ ရောဂါဖြစ်နိုင်ခြေဟာ လူငယ်များ သာမက လူကြီးများမှာပါဖြစ်တတ်တာကြောင့် ဒီလို ရောဂါရှာဖွေမှုဟာ အဓိကအရေးကြီး ပါတယ်။ ဒါကြောင့် အောက်မှာဖော်ပြထားတဲ့ ရောဂါလက္ခဏာများကို သေချာ ဂရုတစိုက်စောင့်ကြည့်ဖို့ အရေးကြီးပါတယ်။

• ညိုမဲမဲသွေးဝမ်းသွားခြင်းနှင့်အဖြူရောင်ချွဲများပါလာခြင်း
• သွေးအားနည်းခြင်း
• ဝမ်းမကြာခဏသွားခြင်း (သို့) ဝမ်းသွားရခက်ခဲခြင်း
• အမြဲတမ်းစအိုနာကျင်နေခြင်း
• ဝမ်းချုပ် လိုက် ဝမ်းလျှောလိုက်ဖြစ်ခြင်း
• ဝမ်းသွားမှုပမာဏနည်းလာခြင်း
• ရုတ်တရက်ကိုယ်အလေးချိန်ကျဆင်းခြင်း
• မိသားစုထဲတွင်အူမကြီးကင်ဆာ ရောဂါရာဇဝင်ရှိသူများ

• ဝမ်းချုပ်ခြင်း ၊ ဝမ်းမာမာသွားခြင်း ၊ ဝမ်းသွားဖို့အတွက်အားအင်များစွာစိုက်ထုတ်အသုံးပြုရခြင်း ။
• ဝမ်းအလျှင်အမြန်သွားဖို့(သို့) အားပါးတရဝမ်းသွားဖို့အားစိုက်ထုတ်ရခြင်း။
• သစ်သီးနှင့်ဟင်းသီးဟင်းရွက်လုံလောက်စွာမစားဘဲ အသားချည်းစားသုံးသဖြင့် မစင် ကိုတင်းမာစေပြီး ဝမ်းသွားရခက်ခဲခြင်း။
• ရေလုံလောက်စွာမသောက်ခြင်းကြောင့် မစင်မာကျောခြောက်သွေ့ပြီး ဝမ်းသွားရခက်ခြင်း။
• အိမ်သာတက်ချိန်တွင် စာအုပ်ဖတ်ခြင်း ၊ ဖုန်းဖြင့်ဂိမ်းဆော့ခြင်း စသည်တို့ကြောင့် အိမ်သာထဲအချိန်ကြာမြင့်စွာ ထိုင်ရာမှတစ်ဆင့်သွေးကြော များတင်းမာရောင်ရမ်းလာခြင်း။
• ကိုယ်ဝန်ဆောင်များတွင် သားအိမ်အရွယ်အစားကြီးမားလာခြင်းကြောင့် တင်ပါးဆုံးအောက်ခြေကြွက်သား လှည့်ပတ်မှုလျော့နည်းလာခြင်း (ကိုယ်ဝန်မဆာင်ခင်မှာ ဆရာဝန်နဲ့တိုင်ပင်ပြီးလိပ်ခေါင်းကို အရင်ကုသဖို့အ ကြံပေးလိုပါတယ်)။
• အသက်အရွယ်အိုမင်းလာတာနဲ့အမျှ စအိုကြွက်သားတစ်ရှူး များလျော့ကျလာခြင်းကြောင့် လိပ်ခေါင်းအဖြစ်ကြီးထွားလာစေသည့် ရောင်ရမ်းမှု

• အိမ်သာတက်ချိန်ကိုသင့်တော်သလောက်သာအချိန်ယူပါ။
• သစ်သီးနှင့်ဟင်းသီးဟင်းရွက်များများစားပေးခြင်းဖြင့် အမျှင်ဓာတ်ပမာဏ ကိုမြှင့်တင်ပေးနိုင်ပြီး အစာချေဖျက်မှုစနစ်ကိုတိုးတက်စေကာ ပိုပြီး အလွယ်တကူဝမ်းသွားစေပါတယ်။
• ရေအများအပြားသောက်မယ်ဆိုရင် မစင်မာကျောခြောက်သွေ့မှု ကိုကာကွယ်ပေးပြီး ဝမ်းသွားရာမှာအခက်အခဲမရှိစေပါဘူး။
• အူလုပ်ဆောင်မှုကိုတိုးတက်စေဖို့နဲ့ ဝမ်းအလွယ်တကူသွားစေဖို့ လေ့ကျင့်ခန်းပုံမှန်လုပ်ပေးပါ။

လိပ်ခေါင်းရောဂါအတွက်ကုသမှုများဟာ ရောဂါအမျိုးအစားနဲ့ ပြင်းထန်မှုအပေါ်မူတည်ပါတယ်။ အောက်ဖော်ပြပါကုသမှုနည်းလမ်းများထဲမှ တစ်ခုကို ရွေးချယ်နိုင်ပါတယ်။

၁ ။ ခွဲစိတ်မှုမလိုအပ်သည့်ကုသမှု - အရွယ်အစားမကြီးမားသေးတဲ့ အဆင့်(၁)နှင့် (၂) လိပ်ခေါင်းရောဂါများအတွက် ဒီနည်းလမ်းနဲ့ကုသနိုင်ပါတယ်။ ခွဲစိတ်မှုမလိုအပ်တဲ့ ကုသမှုနည်းလမ်းတွေအများကြီးရှိပြီးအောက်ပါအတိုင်းဖြစ်ပါတယ်။

• စအိုထဲထည့်ရသည့်ဝမ်းချူဆေး(Suppository Medication) ကို အတွင်းလိပ်ခေါင်းနဲ့ ဆက်စပ်နေတဲ့ ရောဂါလက္ခဏာများသက်သာစေဖို့ ဆရာဝန်များမှ ညွှန်ကြားနိုင်ပါတယ် ( ၎င်းဆေးများကို အပြင်လိပ်ခေါင်းကုသမှုအတွက်အသုံးမပြုကြပါဘူး) ။
• ထိုးဆေး (Injections) များကို လိပ်ခေါင်းဖြစ်ပေါ်နေတဲ့ နေရာမှာ ထိုးနိုင်ပြီး အရွယ်အစားကိုလျှော့ချပေးနိုင်ပါတယ်။ အကောင်းဆုံးသက်သာ စေဖို့အတွက် ထိုးဆေးကို (၂)ပတ်-(၄)ပတ် ခြားပြီး ထိုးသင့်ပါတယ်။
• ရာဘာကွင်းချည်ခြင်း (Rubber Band Ligation) နည်းလမ်းဟာ လိပ်ခေါင်းရဲ့အဖျားပိုင်းမှာ ချည်လိုက်တာဖြစ်ပြီး ပြုတ်မကျမချင်းအထိ သွေးပံ့ပိုးမှု(Blood Supply) ဖြတ်တောက်လိုက်တာဖြစ်ပါတယ်။ ဒါပေမယ့်လည်း ဒီနည်းလမ်းဟာ ပိုးဝင်ခြင်းနဲ့ တခြားနောက်ဆက်တွဲ ဆိုးကျိုးများ ရှိတာကြောင့် တတ်ကျွမ်းနားလည်တဲ့ ဆရာဝန်ရဲ့ ဦးဆောင်ကုသမှုအောက်မှာပဲ လုပ်ဆောင်သင့်ပါတယ်။ သွေးကျဲဆေး ပုံမှန်သောက်သုံးနေတဲ့ လူနာများအတွက် ဒီနည်းလမ်းဟာ အလွန်အကျွံသွေးထွက်ခြင်းဖြစ်စေတတ်လို့ အသုံးမပြုသင့်ပါဘူး။

၂။ ခွဲစိတ်ကုသမှု - အတွင်းလိပ်ခေါင်း အဆင့်(၃)နဲ့ အဆင့်(၄) လူနာများအတွက် သင့်တော်တဲ့ကုသမှုနည်းလမ်းဖြစ်ပါတယ်။

• ပုံမှန်လိပ်ခေါင်းခွဲစိတ်ကုသခြင်း(Traditional Hemorrhoid Surgery) ကို ကြီးမားပြီး ဒုက္ခပေးတဲ့ လိပ်ခေါင်းများဖယ်ရှားရာမှာ အသုံးပြုပါတယ်။ ဒီနည်းလမ်းဟာ စအိုကိုထိခိုက်မှုမရှိစေဘဲ လိပ်ခေါင်းဖြစ်စေတဲ့ သွေးကြောများကို ဖြတ်ထုတ်လိုက်တာဖြစ်ပါတယ်။ ခွဲစိတ်ကုသမှုပြီးတာနဲ့ လူနာဟာ ပြန်ပြီး ပုံမှန်ဝမ်းသွားနိုင်ပြီး ဒီနည်းလမ်းဟာ တခြားနည်းလမ်းများထက် ရေရှည်မှာ ပိုပြီးအကျိုးရှိပါတယ်။ တတ်ကျွမ်းနားလည်တဲ့ ခွဲစိတ်အထူးကုဆရာဝန်နဲ့ ကုသမယ်ဆိုရင် ရောဂါပြန်လည်ဖြစ်ပွားနိုင်ခြေနည်းပါတယ်။ စအိုကနေ တိုက်ရိုက်ပြူးထွက်နေတဲ့ ကြီးမားတဲ့ အတွင်းလိပ်ခေါင်း(သို့)အပြင်လိပ်ခေါင်း ရောဂါခံစားနေရသူများအတွက် ဒီနည်းလမ်းဟာ သင့်တော်တဲ့ ကုသမှုနည်းလမ်းတစ်ခုဖြစ်ပါတယ်။ ဒါ့အပြင် မကြာသေးခင်က တီထွင်ဆန်းသစ်ကုသမှုအရ ဒီနည်းလမ်းမှာ ခါးအောက်ပိုင်းထိုးရတဲ့ထုံဆေး(Epidural Block ) မလိုအပ်တော့ဘဲ အဲဒီအစား လူနာများမေ့သွားစေဖို့ အကြောထဲထိုးသွင်းရတဲ့မေ့ဆေး(Intravenous Anesthetic) ပေးရမှာဖြစ်ပါတယ် ။ အရင်တုန်းကတော့ ထုံဆေးကို လိပ်ခေါင်း ဖြစ်နေတဲ့ နေရာကို ထိုးခဲ့ရတာဖြစ်ပါတယ်။ ဒါကြောင့် လူနာတွေဟာ ခွဲစိတ်ကုသနေစဉ်မှာ နာကျင်မှုဝေဒနာခံစားရမှာမဟုတ်ပါဘူး။ အလိုအလျောက်ပျော်ဝင်သွားစေတဲ့ချုပ်ရိုး(Dissolvble Stitches) များကို အသုံးပြုထားတာကြောင့် လူနာအနေနဲ့ ချုပ်ရိုးဖြေဖို့ ဆေးရုံနောက်တစ်ခေါက်လာဖို့ မလိုအပ်ပါဘူး။ ဒီခွဲစိတ်ကုသမှုများလုပ်ပြီးနောက်မှာ ယခင်ကအသုံးပြုခဲ့တဲ့ အထူးသတ်မှတ်ထားတဲ့အထိုင်ပုံစံ (Special Seating) လုပ်ဆောင်ဖို့ မလိုအပ်တော့ပါဘူး။
• PPH Stapler အသုံးပြုပြီးလိပ်ခေါင်းခွဲစိတ်ကုသခြင်း(Stapled Hemorrhoidopexy) နည်းလမ်းဟာ အရွယ်အစားအရမ်းမကြီးမားတဲ့ အတွင်းလိပ်ခေါင်း ကုသဖို့ သင့်တော်ပါတယ်။ ဒါပေမယ့်လည်း လိပ်ခေါင်းခံစားနေရသူများဟာ တစ်ချိန်တည်းမှာ အတွင်းလိပ်ခေါင်းနဲ့ အပြင်လိပ်ခေါင်းကို ခံစားရနိုင်တာကြောင့် ဒီကိရိယာကို ကျယ်ကျယ်ပြန့်ပြန့်အသုံးမပြုကြသေးပါဘူး။ ဒီနည်းလမ်းနဲ့ကုသမယ်ဆိုရင် ခွဲစိတ်ဆရာဝန်တွေအနေနဲ့ သေချာဂရုစိုက်ဖို့လိုပါတယ်။ ဘာလို့လဲဆိုတော့ ခွဲကြောင်းဟာ အရမ်းအောက်ဘက်ကျနေပြီး ပြင်ပတစ်ရှူးတချို့ကိုဖယ်ထုတ်မိမယ်ဆိုရင် အလွန်အမင်းနာကျင်ခြင်းခံစားရနိုင်တဲ့အပြင် PPH Stapler မှာပါတဲ့ သတ္တုကွင်းကို ပုံစံမမှန်ဘဲထားမိတာကြောင့် ဝမ်းသွားပြီးနောက်ပိုင်း စအိုကို ထပ်မံပိတ်သွားရတဲ့ ပြဿနာကိုကြုံတွေ့ရနိုင်ပါတယ်။
• လေဆာဖြင့်ခွဲစိတ်ကုသခြင်း (Laser Hemorrhoid Surgery) နည်းလမ်းကို လိပ်ခေါင်းရောဂါပြင်းထန်မှုနည်းပြီး ပြူးထွက်နေတဲ့တစ်ရှူးတွေဟာ ပမာဏသေးငယ်တဲ့ အခြေအနေမှာ အသုံးပြုကုသကြပါတယ်။ လေဆာရောင်ခြည်ကို လိပ်ခေါင်းဖြစ်နေတဲ့ သွေးကြောများဆီကို ဦးတည်ကာ တဖြည်းဖြည်းလွှတ်ပေးပြီး ကြွေကျသွားစေခြင်းဖြင့် ကုသတာဖြစ်ပါတယ်။ ဒီနည်းလမ်းမှာ အသုံးပြုရတဲ့ စက်ကိရိယာတန်ဖိုးကြောင့် ကုန်ကျစရိတ်မြင့်မားပေမယ့် ထိရောက်မှု အတော်အသင့်တော့ရှိပါတယ်။ ဒါပေမယ့် လိပ်ခေါင်းဟာ ရေရှည်မှာ ပြန်လည်ဖြစ်ပေါ်လာနိုင်တဲ့ အလားအလာရှိပါတယ်။  ဆေးထိုးပြီးကုသတဲ့ နည်းလမ်းနဲ့ယှဉ်မယ်ဆိုရင် လေဆာဖြင့်ကုသခြင်းဟာ ရလဒ်ပိုင်းမှာ ပိုပြီး သိသိသာသာ ကွဲပြားတာမျိုးမရှိပါဘူး။ ဒါကြောင့်လည်း လေဆာဖြင့်ခွဲစိတ်ကုသခြင်းဟာ လူသိပ်မသိသေးတဲ့ ကုသမှုနည်းလမ်းတစ်ခုအဖြစ်နားလည်သဘော ပေါက်ထားကြပါတယ်။
• ဒီနည်းလမ်းကတော့ ပိုမိုသေးငယ်တဲ့ အတွင်းလိပ်ခေါင်းကိုကုသဖို့အတွက်အသုံးပြုပါတယ်။ ဒီနည်းလမ်းဟာ လိပ်ခေါင်းကို သွေးထောက်ပံ့ပေးတဲ့ သွေးပြန်ကြောရဲ့တည်နေရာကို တိတိကျကျသိနိုင်ဖို့အသုံးပြုတဲ့ အာထရာစောင်းရှာဖွေမှုအပေါ်မှာ မူတည်နေပါတယ်။ အဆိုပါ အာထရာစောင်းရှာဖွေမှုအပေါ်မူတည်ပြီး လိပ်ခေါင်းကို ပိုမိုကြီးထွားစေတဲ့ သွေးပြန်ကြောလေးများကိုဖြတ်တောက်ပစ်ဖို့ လွယ်ကူစေပါတယ်။  လိပ်ခေါင်းကို သဘာဝအတိုင်း အရွယ်အစားသေးငယ်သွားဖို့ ရည်ရွယ်ထားတာဖြစ်တဲ့အတွက် သူကိုယ်တိုင် ကြွေကျသွားတာမျိုးမရှိပါဘူး။ ဒါပေမယ့်လည်း အဲဒီနေရာမှာ ရှိတဲ့သွေးကြောများရှိနှင့်နေခြင်း (သို့) ခန္ဓာကိုယ်ဟာ ပျက်စီးသွားတဲ့သွေးပြန်ကြောများနေရာမှာ ပြန်လည်အစားထိုးနိုင်စွမ်းရှိပြီး ၎င်းမှတစ်ဆင့် နောက်ထပ် ပြန်လည် ရောင်ရမ်းနိုင်ခြင်းကြောင့် ရေရှည်မှာ လိပ်ခေါင်းဟာ တစ်ကြိမ်ပြန်လည်ဖြစ်လာနိုင်ခြေရှိပါတယ်။

အထက်မှာဖော်ပြခဲ့တဲ့ လက္ခဏာတွေထဲမှ တစ်ခုခုကို သင်ခံစားရမယ် ၊ ရောဂါလက္ခဏာတွေဟာတိုးတက်မလာဘဲ ပိုမိုဆိုးရွားလာမယ်ဆိုရင် မြန်နိုင်သမျှ အမြန်ဆုံးရောဂါစစ်ဆေးမှုပြုလုပ်ဖို့ အကြံပေးချင်ပါတယ်။ ရောဂါလက္ခဏာဆိုတာဟာ အစပိုင်းမှာ ခေါင်းစဉ်တပ်မရတာကြောင့် နောက်ဆက်တွဲလိုအပ်တဲ့ ကုသမှုများပြုလုပ်မှသာလျှင် ပိုမိုမြင့်မားတဲ့ ပျောက်ကင်းသာမှုအခွင့်အရေးကိုရရှိမှာပဲဖြစ်ပါတယ်။