ကလေးများ နှင့် ဗီတာမင် D

• ဗီတာမင် D (Calciferol - ကယ်လ်စီဖီရောလ်) ဆိုတာ အဆီမှာ ပျော်ဝင်နိုင်တဲ့ ဗီတာမင်တစ်မျိုးဖြစ်ပြီး အမျိုးအစား နှစ်မျိုးရှိပါတယ်။
  • ဗီတာမင် D₂ (ergocalciferol - အာဂိုကယ်လ်စီဖီရောလ်) - အပင်အခြေခံသော အစားအစာများ၊ မှိုများနဲ့ တဆေး စားသုံးခြင်းကနေ ရရှိနိုင်ပါတယ်။ ဒါပေမယ့် အလွန်နည်းသော ပမာဏကိုသာ ရရှိနိုင်ပါတယ်။
  • ဗီတာမင် D₃ (cholecalciferol - ကိုလီကယ်လ်စီဖီရောလ်) - မတူညီတဲ့ အရင်းအမြစ် ၂ ခုကတစ်ဆင့် ပမာဏ အများအပြား ရရှိပါတယ်။ ပထမအနေဖြင့် အသား၊ အသည်း၊ ကြက်ဥအနှစ်၊ အဆီများသော ငါး (ဆယ်လ်မွန်၊ ငါးကွမ်းရှပ်၊တူနာ စသည် )၊ ငါးကြီးဆီ၊ နို့နှင့် နို့ထွက်ပစ္စည်းများ စားသုံးခြင်းတို့မှ ရရှိပါတယ်။ ဗီတာမင် D ကြွယ်ဝတဲ့အစားအစာတွေကို အောက်မှာ ဇယား နဲ့ ဖော်ပြပေးထားပါတယ်။

ဒုတိယရင်းမြစ်အနေနဲ့ ဗီတာမင် D3 ကို ခန္ဓာကိုယ်ကိုယ်တိုင်ကလည်း ထုတ်လုပ်ပေး ပါတယ်။ တစ်ပတ်မှာ ၂ ကြိမ်မှ ၄ ကြိမ်အထိ၊ တစ်ကြိမ်လျှင် ၁၅ မိနစ်ခန့် နေပူထဲ ထွက်ပေး ခြင်းဖြင့် ဗီတာမင် D3 ကို ရရှိနိုင်ပါတယ်။ ဥပမာအားဖြင့် မနက် ၆ နာရီမှ ၈ နာရီအတွင်း နဲ့ ညနေ ၄ နာရီမှ ၆ နာရီအတွင်း နေရောင်ခြည် ခံယူမယ်, နေပူစာလှုံမယ် ဆိုရင် နေရောင်ထဲ က ခရမ်းလွန်ရောင်ခြည်တွေက ခန္ဓာကိုယ်ထဲက ကိုလက်စထရောတွေကို ဗီတာမင် D အဖြစ် ပြောင်းလဲပေးရာမှာ အကူအညီပေးပါတယ်။

•  အရိုး နှင့် သွားတွေ ခိုင်မာစေဖို့ မရှိမဖြစ်လိုအပ်တဲ့ ကယ်လ်စီယမ် နှင့် ဖော့စဖရပ်စ်ဓာတ်တွေကို ခန္ဓာကိုယ်က စုပ်ယူနိုင်ဖို့ အကူအညီပေးပါတယ်။
• ဗီတာမင် A ဓာတ်ကို စုပ်ယူတဲ့နေရာမှာလည်း  အကူအညီပေးပါတယ်။
• အာရုံကြောစနစ် လည်ပတ်ရေးလုပ်ဆောင်မှု၊ နှလုံးခုန်နှုန်းကို ထိန်းသိမ်းခြင်းနှင့် ကိုယ်ခံအားစနစ်ကို ခိုင်မာစေခြင်း စတာတွေအတွက် အရေးပါတဲ့အခန်းကဏ္ဍမှာလည်း သွယ်ဝိုက်သောနည်းနဲ့ ပါဝင်လျက် ရှိနေပါတယ်။

• အရိုးပျော့ရောဂါ
• ပြင်းထန်သွားပိုးစားခြင်း
• ကြွက်သားများ အားနည်းခြင်း

ဗီတာမင် D ချို့တဲ့မှု ဖြစ်နိုင်ခြေရှိတဲ့ကလေးများအုပ်စုထဲမှာ - နေရောင်ခြည်နဲ့ထိတွေ့မှု နည်းပါးသူများ၊ နေရောင်ကာခရင်မ်လိမ်းသူများ၊ နို့စို့ကလေးငယ်များ၊ ဗီတာမင် D ပါဝင်တဲ့ အစားအစာတွေကို မစားတဲ့ ကလေးများနဲ့ အဝလွန်ကလေးများ စတာတွေ ပါဝင်ပါတယ်။

• နို့စို့အရွယ်ကလေးငယ်များ - မိခင်နို့တစ်လီတာလျှင် ပုံမှန်အားဖြင့် ဗီတာမင် D ၂၅ IU သာ ပါဝင်တာမို့၊ မိခင်နို့စို့ ကလေးငယ်တွေအတွက် တစ်နေ့ -  ၂၀၀-၄၀၀ IU ပမာဏရှိတဲ့ ဗီတာမင် D ဖြည့်စွက်ဆေး ကို သောက်သုံးသင့်ပါတယ်။ ဒါကြောင့် မိခင်နို့စို့တဲ့ကလေးတွေ အတွက် ဗီတာမင် D အစက်ချဆေး  သို့မဟုတ် ဗီတာမင် D ပါဝင်တဲ့ ဘက်စုံဗီတာမင်ဆေး တွေ ရရှိသင့်ပါတယ်။ အသေးစိတ်ကိုတော့ ပြနေကျ ကလေးဆရာဝန် နှင့် ဆက်လက်တိုင်ပင် ဆွေးနွေးပါ လို့ အကြံပြုချင်ပါတယ်။
• နို့ဗူးစို့တဲ့ ကလေးငယ်များအတွက်ကတော့ - တစ်လီတာမှာ ဗီတာမင်  D ၄၀၀ IU ပါဝင်တဲ့ နို့မှုန့် ကို တစ်နေ့ တစ်လီတာ နေ့စဉ်သောက်သုံးတဲ့ ကလေးငယ်တွေမှာ ပုံမှန်အားဖြင့် လုံလောက်တဲ့ ဗီတာမင် D ကို ရရှိပြီးသား ဖြစ်ပါတယ်။ သို့သော် တစ်လီတာထက် နည်းပြီး သောက်တဲ့ ကလေး ငယ်တွေကတော့ တစ်နေ့တာအတွက် ၂၀၀-၄၀၀ IU ပမာဏရှိတဲ့ ဗီတာမင် D ဖြည့်စွက်ဆေးကို သောက်သုံးသင့်ပါတယ်။
• အသက်ကြီးသောကလေးများ - ဗီတာမင် D ပါဝင်တဲ့ နို့ သို့မဟုတ် စံနှုန်းမီ ဖော်မြူလာနို့ကို တစ်နေ့ တစ်လီတာအောက်သာ သောက်သုံးတဲ့ ကလေးတွေမှာကျတော့ ဗီတာမင် D ကြွယ်ဝ တဲ့ အစားအစာတွေကို စားသုံးပေးသင့်ပါတယ်။ ဒါမှမဟုတ် တစ်နေ့ အနည်းဆုံး ၄၀၀ IU ဗီတာမင် D ပါဝင်တဲ့ ဘက်စုံဗီတာမင်ဆေးလိုဟာမျိုးတွေကို သောက်သုံးသင့် ပါတယ်။

တစ်နေ့ ၂,၀၀၀ IU  ထက် ပိုပြီး စားသုံးမိရင်တော့ ကလေးတွေမှာ ဗီတာမင် D ပမာဏ လွန်ကဲမှုကို ဖြစ်ပေါ်စေနိုင်မှာ ဖြစ်ပါတယ်။ ဗီတာမင် D လွန်ကဲမှုကို ဖော်ပြနေတဲ့ လက္ခဏာတွေက တော့ ဆီးမကြာခဏသွားခြင်း၊ ပုံမှန်မဟုတ်ဘဲ အလွန်အမင်း ရေငတ်ခြင်း၊ အလွန်အမင်း ရေဓာတ် ခန်းခြောက်ခြင်း၊ မျက်စိနာခြင်း (မျက်မြှေးရောင်ခြင်း)၊ ယားယံခြင်း၊ ဗိုက်နာခြင်း၊ အော့အန်ခြင်း၊ ဝမ်းချုပ်ခြင်း စတာတွေပဲ ဖြစ်ပါတယ်။ ဒါ့အပြင် သွေးကြောနံရံများ၊ နှလုံး၊ အဆုတ်၊ အသည်းနှင့် အစာအိမ် စတာတွေမှာ ကယ်လ်စီယမ်တွေ စုပုံစေခြင်းကို ဖြစ်ပေါ်စေနိုင်ပြီး၊ ကျောက်ကပ်မှာ ကျောက်တည်ခြင်းကိုလည်း ဖြစ်စေနိုင်ပါတယ်။

ရင်သွေးငယ်များအားလုံးဟာ သူတို့အတွက် အကောင်းဆုံး ခွန်အားနဲ့ ကြီးထွားမှုကို သေချာစေဖို့အတွက် ဗီတာမင် D ကို မှန်ကန်တဲ့ ပမာဏ ရရှိသင့်ပါတယ်။

ကိုးကားချက်များ

1. Heike A. Bischoff-Ferrari Catherine M. Gordon David A. Hanley Robert P. Heaney M. Hassan Murad Connie M. Weaver Evaluation, Treatment, and Prevention of Vitamin D Deficiency: an Endocrine Society Clinical Practice Guideline. The Journal of Clinical Endocrinology & Metabolism, Volume 96, Issue 7, 1 July 2011, Pages 1911–1930
2. U.S. Department of Health & Human Services: Vitamin D-Fact Sheet for Health Professionals. Accessed from: https://ods.od.nih.gov/factsheets/VitaminD-HealthProfessional/. Accessed September 1, 2017.