မိန်းမကိုယ်ခြောက်သွေ့ခြင်း

• မိန်းမကိုယ်ခြောက်သွေ့ခြင်းဆိုတာ ကျန်းမာရေးဆိုင်ရာ ပြဿနာ ကြီးကြီးမားမားတစ်ခုလို့ မဆိုနိုင်ပေမယ့်  သူ့သဘာဝအတိုင်း စိုစွတ်မှု ရှိမနေဘူးဆိုရင်တော့ မိန်းမကိုယ် နံရံတွေမှာ ယားယံတာတွေ၊ အနာလေးတွေ ပေါက်လာပြီး အဲဒီကမှတစ်ဆင့် ဘက်တီးရီးယား နဲ့ ဗိုင်းရပ်စ်ပိုး တွေ ကူးစက်မှုဖြစ်လာခြင်း စတဲ့ အန္တရာယ်တွေ ဖြစ်လာနိုင်ပါတယ်။
• Nonoxynol-9 ပါဝင်တဲ့ ကွန်ဒုံးအမျိုးအစားတွေ အသုံးပြုတာဟာလည်း မိန်းမကိုယ်ခြောက်သွေ့ခြင်း ကို ပိုမို ဖြစ်စေပါတယ်။
• မိန်းမကိုယ်ခြောက်သွေ့မှုအတွက် အထိရောက်ဆုံးနည်းလမ်းကတော့ “မိန်းမကိုယ်ထဲသို့ အီစထရိုဂျင် (အမျိုးသမီးဟော်မုန်း) ထည့်သွင်းခြင်း” ပဲ ဖြစ်ပါတယ်။ ဒါပေမယ့် ဒီနည်းလမ်းကို ဆေးဘက်ဆိုင်ရာ ကျွမ်းကျင်ပညာရှင်များရဲ့ လမ်းညွှန်မှုအောက်မှာသာ ပြုလုပ်သင့်တဲ့အပြင် အထူးသဖြင့် ဟော်မုန်းအသုံးပြုမှုအပေါ်မှာ အခက်အခဲရှိတဲ့သူတွေအတွက် ပိုပြီး သတိထားဖို့ လိုပါတယ်။

မိန်းမကိုယ် ခြောက်သွေ့ခြင်းဆိုတာ မိန်းမကိုယ်ကထုတ်လုပ်တဲ့ ချောဆီအရည်တွေ လျော့နည်းသွား တာကြောင့် ဖြစ်ရတာ ဖြစ်ပါတယ်။ မိန်းမကိုယ်က တစ်သျှူးတွေ ခြောက်သွေ့လာပြီး စိုစွတ်မှုမရှိတော့တဲ့အခါ အမျိုးသားနဲ့ အတူနေစဉ်မှာ နာကျင်မှုကို ဖြစ်ပေါ်စေနိုင်ပါတယ်။ မိန်းမကိုယ် ခြောက်သွေ့ရခြင်းရဲ့ အဓိက အကြောင်းရင်း ကတော့ များသောအားဖြင့် သွေးဆုံးခြင်းကြောင့် မိန်းမကိုယ်အီစထရိုဂျင် (estrogen) ဟော်မုန်းပမာဏ လျော့နည်းသွား တာကြောင့် ဖြစ်ပါတယ်။ ဒါပေမယ့်  အီစထရိုဂျင်ဟော်မုန်း ချို့တဲ့မှု ရှိနေတဲ့ အမျိုးသမီးတွေမှာ ဆိုရင်တော့  အသက်အရွယ်မရွေး ဖြစ်လာနိုင်ပါတယ်။

မိန်းမကိုယ်ခြောက်သွေ့နေတာကို တချို့အမျိုးသမီးတွေမှာ အမြဲတမ်းဖြစ်ပေါ်နေတတ်ပေမယ့် တချို့မှာ ကျတော့ ရံဖန်ရံခါ၊ အမျိုးသားနဲ့ အတူနေတဲ့အခါမျိုး စတဲ့ အချိန်တွေမှာပဲ ဖြစ်တတ်တာမျိုးတွေ ရှိပါတယ်။  အဖြစ်အများဆုံး လက္ခဏာတွေကတော့ မိန်းမကိုယ်တစ်ဝိုက်မှာ ယားခြင်း၊ အခံရခက်ခြင်း၊ ပူစပ်ပူလောင် ဖြစ်ခြင်း စတာတွေပဲ ဖြစ်ပါတယ်။ အခြားလက္ခဏာတွေကတော့ ဆီးသွားချိန်မှာ စပ်ဖျဉ်းဖျဉ်း ဖြစ်ခြင်း၊ ပုံမှန် ထက်ပိုပြီး ဆီးခဏခဏ သွားရခြင်း၊ ဆီးမထိန်းနိုင်ခြင်း (ဆီးသွားချင်လာပြီဆိုရင် ခဏတာမျှပင် အောင့် မထားနိုင်ခြင်း)၊ မိန်းမကိုယ်ရောင်ရမ်းခြင်း၊ မကြာခဏအဖြူဆင်းခြင်း၊  အမျိုးသားနဲ့ အတူနေချိန် နာကျင်ခြင်း၊ သွေးဆင်းခြင်း၊ အတူနေရမှာ စိတ်မပါခြင်း၊ ဆန္ဒပြည့်မြောက်ရန် ခက်ခဲခြင်း စတာတွေ ဖြစ်တတ်ပါတယ်။

မိန်းမကိုယ်ခြောက်သွေ့ခြင်းသည် ကျန်းမာရေးဆိုင်ရာ ပြဿနာ ကြီးကြီးမားမားတစ်ခုလို့ မဆိုနိုင်ပေမယ့်  သူ့သဘာဝအတိုင်း စိုစွတ်မှု ရှိမနေဘူးဆိုရင်တော့ မိန်းမကိုယ် နံရံတွေမှာ ယားယံတာတွေ၊ အနာလေးတွေ ပေါက်လာပြီး အဲဒီကမှတစ်ဆင့် မိန်းမကိုယ်တစ်ဝိုက်နဲ့ အတွင်းဘက်တွေမှာ ဘက်တီးရီးယား နဲ့ မှိုပိုး တွေ ကူးစက်မှုဖြစ်လာခြင်း စတဲ့ အန္တရာယ်တွေ ဖြစ်လာနိုင်ပါတယ်။ မိန်းမကိုယ်ခြောက်သွေ့နေတဲ့ အမျိုးသမီးတွေမှာ ဆီးလမ်းကြောင်းပိုးဝင်တဲ့ အန္တရာယ်ကိုလည်း မြင့်မားလာစေနိုင်ပါတယ်။

နောက်ပြီးတော့ မိန်းမကိုယ်ဟာ စိုစိုပြေပြေ မရှိတဲ့အတွက် အမျိုးသားနဲ့အတူနေတဲ့အချိန်မှာ နာကျင်မှု ဖြစ်ပေါ်စေတာကြောင့် အိမ်ထောင်မှုဘဝသာယာရေးမှာပါ အကျိုးသက်ရောက်မှုတွေ ဖြစ်လာနိုင်ပါတယ်။

• အသက်အရွယ် ရလာတာနဲ့အမျှ သွေးဆုံးပြီးအမျိုးသမီးများတွင် အီစထရိုဂျင်ဟော်မုန်း ပမာဏ သဘာဝအလျောက် လျော့နည်းကျဆင်းခြင်း။
• သွေးတိုးကျဆေး၊ စိတ်ပိုင်းဆိုင်ရာ ရောဂါများနှင့် ဓာတ်မတည့်မှုများကို ကုသရာမှာ အသုံးပြုတဲ့ ဆေးဝါးများရဲ့ ဘေးထွက်ဆိုးကျိုးများ သို့မဟုတ် ကင်ဆာကုသရာတွင် အသုံးပြုတဲ့ ကီမိုကုထုံး (Chemotherapy) ကြောင့် အီစထရိုဂျင် ပမာဏ လျော့ကျခြင်း။
• ခွဲစိတ်မှု မပြုလုပ်မီ သားဥအိမ် အလုံး အရွယ်အစားကို လျှော့ချတဲ့ ဆေးဝါးများ ထိုးသွင်းခြင်း။
• ဘက်တီးရီးယား သို့မဟုတ် မှိုပိုး ကူးစက်မှု စတဲ့ ရောဂါပိုးကြောင့် မိန်းမကိုယ် ရောင်ရမ်းမှု ဖြစ်ပေါ်ခြင်း။
• လိင်စိတ် ဆန္ဒ လျော့နည်းခြင်း သို့မဟုတ် လိင်ဆက်ဆံမှုနှင့် ပတ်သက်တဲ့ အခြားသော ပြဿနာများကြောင့် ဖြစ်ခြင်း။ ( မိန်းမကိုယ်ခြောက်သွေ့နေတာဟာလည်း လိင်စိတ် ဆန္ဒ လျော့နည်းစေတဲ့ အကြောင်းရင်းတစ်ခု ဖြစ်နိုင်ပါတယ်။)
• မိန်းမကိုယ်ပတ်ဝန်းကျင်အတွက် သီးသန့်အသုံးပြုတဲ့ ဆပ်ပြာများ သို့မဟုတ် အခြား သန့်စင်ပစ္စည်းများ၊ ရာသီသွေးခံဂွမ်းထုပ် (Sanitary Pads) များ သို့မဟုတ် အချို့သော အတွင်းခံ အမျိုးအစားများနှင့် ဓာတ်မတည့်မှုကြောင့် ယားယံခြင်း ဖြစ်ပေါ်ခြင်း။
• မိန်းမကိုယ်ကို အလွန်အကျွံ ဆေးကြောတာကြောင့် အက်စစ်ဓာတ် မမျှတမှု (Acidic Imbalance) ဖြစ်ပြီး ခြောက်သွေ့စေခြင်း။
• မိန်းမကိုယ်နှုတ်ခမ်းသား (Vulva သို့မဟုတ် Labia) နှင့် သားအိမ်ခေါင်း (Cervix) တို့ကို သက်ရောက်သော အရေပြားနီမြန်းယားယံခြင်း။ 

အမျိုးသမီးတွေ မိန်းမကိုယ် ခြောက်သွေ့တာကို ကာကွယ်ဖို့ သို့မဟုတ် လျှော့ချဖို့အတွက် အသုံးပြုနိုင်တဲ့  နည်းလမ်းတွေကတော့ အများကြီး ရှိပါတယ်။  အီစထရိုဂျင်မြှင့်တင်ပေးတဲ့ အစားအစာများ စားသုံးပေးခြင်း  - အီစထရိုဂျင်နဲ့ဆင်တူအာနိသင်ရှိတဲ့  (Isoflavones)  ဓာတ်တွေပါဝင်တဲ့ ပဲပိစပ်နဲ့ ပဲပိစပ်မှ ထုတ်လုပ်တဲ့ အစားအစာတွေကို စားသုံးပေးခြင်းဖြင့်လည်း အီစထရိုဂျင် အဆင့်ကို မြှင့်တင်ပေး နိုင်ပါတယ်။ မိန်းမကိုယ်သန့်ရှင်းရေးအတွက်သီးသန့်ထုတ်တဲ့ ဆပ်ပြာ နဲ့ အခြားထုတ်ကုန်တွေကို သတိထား အသုံးပြုတာ၊ အမျိုးသားနဲ့အတူနေရာမှာ အစိုဓာတ်ထိန်းပေးတဲ့ ချောဆီ ဂျယ် စတာတွေ သုံးပေးတာ၊ မိန်းမကိုယ်ကို ဆေးကြောတဲ့အခါ မပူလွန်း မအေးလွန်းတဲ့ သန့်ရှင်းတဲ့ ရေသန့်သန့်ကို သုံးတာ၊  အတွင်းခံ အဝတ်အစားတွေကိုလည်း အမြဲတမ်း သန့်သန့်ရှင်းရှင်းဝတ်ဆင်တာ၊ ရာသီသွေးခံဂွမ်းထုပ် တွေကို သုံးရာမှာ ဖုန်၊ အညစ်အကြေးနဲ့ စိုထိုင်းမှုတွေ ရှိမနေစေဖို့ မကြာခဏ အသစ်လဲလှယ်ပေးခြင်း စတဲ့ အမူအကျင့်တွေကို လုပ်ဆောင်သင့်ပါတယ်။  မိန်းမကိုယ် ပတ်ဝန်းကျင်အရေပြားနီမြန်းယားယံခြင်းဖြစ်လာရင်တော့ ရှက်ရွံ့မနေဘဲ ဆေးဘက်ဆိုင်ရာ အကြံဉာဏ်ကို ရယူသင့်ပါတယ်။ ဂရုမစိုက်ဘဲ လျစ်လျူရှုထားရင် နာတာရှည် အခြေအနေကို ဦးတည်သွားစေနိုင်တာကြောင့် ဖြစ်ပါတယ်။

ဇနီးမောင်နှံ ချစ်တင်းနှောတဲ့အခါ အကြိုလှုံ့ဆော်မှု (Foreplay) ဖြစ်တဲ့ ယုယကြင်နာပေးမှုများကို ပြင်းပြသော ချစ်ခြင်းမေတ္တာနဲ့ စိတ်ပါလက်ပါ တိုးမြှင့်ပြုမူပေးခြင်းဟာ မိန်းမကိုယ်အတွင်း ချောဆီဓာတ် အရည်များ ထွက်ရှိလာစေရန် လှုံ့ဆော်ပေးတာကြောင့် မိန်းမကိုယ်ခြောက်သွေ့ခြင်းကို ဖြေရှင်းပေးနိုင်မယ့် နည်းလမ်းတစ်ခု ဖြစ်ပါတယ်။ နောက်တစ်ခုက မိန်းမကိုယ် ခြောက်သွေ့နိုင်ခြေကို တိုးမြင့်စေတဲ့ Nonoxynol-9 ဓာတုပစ္စည်း ပါဝင်တဲ့ ကွန်ဒုံးများ သုံးခြင်းမှ ရှောင်ကြဉ်ခြင်းသည်လည်း ဖြစ်နိုင်ခြေရှိတဲ့ အခြားဖြေရှင်းနည်း တစ်ခု ဖြစ်ပါတယ်။

နောက်ဆုံးအားဖြင့်၊ နှစ်စဉ် ကျန်းမာရေး စစ်ဆေးမှုများကို သေချာစွာ ပြုလုပ်ခြင်း၊ မီးယပ်ရောဂါဆိုင်ရာ စစ်ဆေးမှုများ ခံယူခြင်းနှင့် အီစထရိုဂျင် (Estrogen) ဟော်မုန်းပမာဏကို အကဲဖြတ်စစ်ဆေးခြင်းတို့သည် ဟော်မုန်းချို့တဲ့မှုများ မဖြစ်ပွားစေရန် ကာကွယ်ရာမှာ များစွာ အထောက်အကူ ဖြစ်စေပါတယ်။

မိန်းမကိုယ်ခြောက်သွေ့ခြင်းကို အောက်ပါနည်းစနစ်များ အသုံးပြုပြီး ကုသမှု ခံယူနိုင်ပါတယ်။

• အီစထရိုဂျင် (Estrogen) ပမာဏ မြှင့်တင်ရန် ဟော်မုန်းဆေးဝါးများ အသုံးပြုခြင်း - အထူးသဖြင့် သွေးဆုံးပြီး အမျိုးသမီးများအတွက် အထူးအသုံးဝင်ပါတယ်။
• မိန်းမကိုယ်ထဲသို့ အီစထရိုဂျင် ထည့်သွင်းအသုံးပြုခြင်း - မိန်းမကိုယ်ထဲသို့ ထည့်သွင်းရန် ဒီဇိုင်းထုတ်ထားသော ဆေးပြားများ၊ ခရင်မ်များ နှင့် ဆေးဝါးများအားလုံးဟာ ထိရောက်မှု မြင့်မားတာကို တွေ့ရှိရပါတယ်။ ဒါပေမယ့် ဆေးဝါးတွေကို သုံးမယ်ဆိုရင်တော့ ဆေးဘက်ဆိုင်ရာ ကျွမ်းကျင်ပညာရှင်တွေရဲ့ ကြီးကြပ်မှုအောက်မှာသာ ဆောင်ရွက်သင့်တယ်လို့ အကြံပြုလိုပါတယ်။ တချို့ဆေးဝါးတွေဟာ သွေးကြောထဲက အီစထရိုဂျင်ပမာဏကိုပါ တိုးစေတာကြောင့် အထူးသဖြင့် ဟော်မုန်းသုံးစွဲမှုနဲ့ပတ်သက်ပြီး ပြဿနာရှိတဲ့ အမျိုးသမီးတွေ အတွက် ပိုပြီး ဂရုပြုရပါမယ်။
• အစိုဓာတ်ထိန်းပစ္စည်းများ (Moisturizers) အသုံးပြုခြင်း - ဒါတွေကတော့ မိန်းမကိုယ်နံရံတွေကို အကာအကွယ်ပေးပြီး ဖုံးအုပ်ပေးခြင်းဖြင့် စိုစွတ်နေစေရန် ကူညီပေးပါတယ်။ အရည် (Liquids)၊ ဂျယ်လ် (Gels) နှင့် မိန်းမကိုယ်ထဲသို့ ထည့်သွင်းရသော ဆေးပြားပုံစံများ စသည်ဖြင့် အမျိုးမျိုးရှိ ပါတယ်။ သည်ပစ္စည်းတွေမှာတော့ ဟော်မုန်းမပါဝင်တာကြောင့် အသုံးပြုသူအတွက် ရုပ်ပိုင်းဆိုင်ရာ ဆိုးကျိုးများ မရှိဘဲ၊ အချိန်ကြာမြင့်စွာ အသုံးပြုနိုင်ပါတယ်။
• ချောဆီဂျယ်များ (Lubricating Gels) အသုံးပြုခြင်း -  လိင်ဆက်ဆံစဉ် နာကျင်မှုနှင့် မသက်မသာဖြစ်မှုကို ခံစားရသူတွေအတွက် သင့်လျော်ပါတယ်။ ဂျယ်တွေကို အမျိုးသမီး၏ မိန်းမကိုယ် သို့မဟုတ် အမျိုးသား၏ လိင်တံပေါ်တွင် လိမ်းကျံပေးပြီး အသုံးပြုနိုင်ပါတယ်။

အမျိုးသမီးတစ်ဦးဟာ သွေးဆုံးတဲ့ အရွယ်ကို ရောက်တဲ့အခါမှာ စိတ်ခံစားမှုဆိုင်ရာ ပြဿနာတွေနဲ့ ရင်ဆိုင်ရပြီး စိတ်ပျက်ခြင်း၊ ငြီးငွေ့ခြင်း စတဲ့ ခံစားချက်တွေ ဖြစ်ပေါ်လာနိုင်ရုံသာမက၊ ရုပ်ပိုင်းဆိုင်ရာမှာလည်း  သက်ရောက်မှုတွေ များစွာရှိလာနိုင်ပါတယ်။ မိန်းမကိုယ်ခြောက်သွေ့ခြင်းဆိုတာလည်း သည်ပြဿနာတွေထဲက တစ်ခုသာဖြစ်ပြီး ကာယကံရှင်အဖို့ စိုးရိမ်စိတ်အနည်းငယ်ကို ဖြစ်ပေါ်စေနိုင်ပါတယ်။ ဒါကြောင့် မိမိခန္ဓာကိုယ် ဘယ်လိုပြောင်းလဲလာသလဲဆိုတာကို သိနေစေဖို့ လိုအပ်တဲ့ ဗဟုသုတတွေ ရှာဖွေလေ့လာထားပြီး ရင်ဆိုင်ခြင်း၊ ဆရာဝန်နှင့် တိုင်ပင်ဆွေးနွေးခြင်း၊ နှစ်စဉ် ကျန်းမာရေး စစ်ဆေးမှုများ ပုံမှန်ဆောင်ရွက်ခြင်းနဲ့ မီးယပ်ရောဂါဆိုင်ရာ စစ်ဆေးမှုများ ခံယူခြင်းတို့ဖြင့် မိမိကိုယ်တိုင်နှင့် မိမိ၏ လက်တွဲဖော်အပေါ် သက်ရောက်မှုကို သိသိသာသာ လျှော့ချနိုင်ရန် ကူညီပေးပါလိမ့်မယ်။