ညဘက်အိပ်ပျော်နေစဉ် ဖြစ်ပွားတတ်သော ခြေထောက်ကြွက်တက်ခြင်း ဝေဒနာ သိကောင်းစရာ

• ညဘက်အိပ်ပျော်နေချိန်မှာ ဖြစ်တတ်တဲ့ ခြေထောက်ကြွက်သားများကြွက်တက်ခြင်း ဝေဒနာ ဖြစ်ရတဲ့ တကယ့်အကြောင်းရင်း အစစ်အမှန်ကို အတိအကျမသိနိုင်သေးပေမယ့် လေ့လာမှုများအရ ခန္ဓာကိုယ်တည်ဆောက်ပုံဆိုင်ရာ ချွတ်ယွင်းမှုများ၊ အာရုံကြောဆိုင်ရာ ပြဿနာများ၊ သွေးလှည့်ပတ်မှု နှင့်သွေးလွှတ်ကြောဆိုင်ရာ ပြဿနာများ စတာတွေနှင့် ဆက်နွယ်မှုရှိနိုင်ကြောင်း တွေ့ရှိရပါတယ်။
• ညဘက်အိပ်ပျော်နေချိန်မှာ ကြွက်တက်ဝေဒနာ ခံစားရပြီဆိုရင် ကြွက်တက်နေတဲ့ ကြွက်သားတွေ ကို ညင်သာစွာ ဆန့်ထုတ်ပေးခြင်းနှင့် နှိပ်နယ်ပေးခြင်းတို့ ပြုလုပ်သင့်ပါတယ်။ ဒါ့အပြင် အအေးဝတ် (သို့မဟုတ်) ရေခဲအိတ်ဖြင့် နှိပ်နယ်ပေးခြင်းဟာလည်း ထိရောက်မှုရှိကြောင်း တွေ့ရှိရပါတယ်။ တကယ်လို့ ကြွက်တက်ခြင်းနှင့်အတူ နာကျင်မှုဝေဒနာ ဆက်လက်ရှိနေပါက အကိုက်အခဲသက်သာတဲ့ဆေးတွေ သောက်သုံးနိုင်သလို၊ နာကျင်တဲ့နေရာကို အကိုက်အခဲသက်သာတဲ့ လိမ်းဆေးများ လိမ်းပေးခြင်းဖြင့်လည်း မသက်မသာဖြစ်မှုကို လျော့ပါးစေနိုင်ပါတယ်။
• ညဘက် ခဏခဏကြွက်တက်တတ်လို့ အိပ်စက်မှုကို အနှောင့်အယှက်ဖြစ်စေတဲ့ ဝေဒနာရှင်များ အနေနှင့် ကျွမ်းကျင်သူဆရာဝန်နှင့် တိုင်ပင်ဆွေးနွေးသင့်ပါတယ်။ ဒါမှသာ ဆရာဝန်က ရောဂါအခြေအနေကို စစ်ဆေးရှာဖွေဖော်ထုတ်ပေးနိုင်မှာဖြစ်ပြီး ထိရောက်စွာ ကုသနိုင်မယ့် လိုအပ်တဲ့ အဆင့်တွေကို အကြံပြုလမ်းညွှန်ပေးနိုင်မှာ ဖြစ်ပါတယ်။

ညဘက်အိပ်ပျော်နေစဉ်မှာ ကြွက်တက်ခြင်းကို ကိုယ်တိုင်ကြုံတွေ့ဖူးသူများစွာ ရှိကြပါတယ်။ ဘယ်လောက် နာကျင် တယ်ဆိုတာလည်း ကိုယ်တွေ့ ခံစားကြရမှာပါပဲ။ အင်မတန်လည်း အခံရခက်တာကြောင့် ရုတ်တရက် လန့်နိုးလာ ရတဲ့အထိလည်း ဖြစ်ရပါတယ်။ ဘာကြောင့် အိပ်နေတဲ့အချိန်မှာ ကြွက်တက်ရတာလဲ။  အဘယ်အရာက ကြွက်တက်စေတာလဲ ဆိုတာ စဉ်းစားကြည့်ဖူးပါသလား။ ပြီးတော့ ဒီလို ထူးဆန်းပြီး အကြောင်းရင်းကို ရှင်းရှင်းလင်းလင်း မသိနိုင်တဲ့ ဒီ ကြွက်တက်ခြင်းဆိုတဲ့ ဝေဒနာအတွက် ဘယ်လို ကုသနည်းတွေ၊ ဘယ်လို ကာကွယ်နည်းတွေများ ရှိနေပါလိမ့်ဆိုတာမျိုးရော တွေးကြည့်ကြဖူးပါသလား။ 

ကြွက်တက်တယ်ဆိုတာ ကြွက်သားများ ရုတ်တရက် ပြင်းထန်စွာ ကျုံ့သွားပြီး ပုံမှန်အတိုင်း ပြန်လည်မဖြေလျော့ နိုင်တော့တဲ့ ဖြစ်စဉ်ကို ဆိုလိုပါတယ်။ ကြွက်တက်နေတဲ့ ကြွက်သားတွေကို ထိတွေ့ကြည့်မယ်ဆိုရင် တင်းမာနေ တတ်ပြီး ခံစားရသူကို အလွန်အမင်း နာကျင်ပြီး မသက်မသာ ဖြစ်စေပါတယ်။ ယေဘုယျအားဖြင့် ခြေသလုံး၊ ပေါင်အနောက်ဘက်နှင့် ပေါင်ခြံကြွက်သားများမှာ ကြွက်တက်ခြင်းအဖြစ်များလေ့ရှိပါတယ်။ ဒီလို ကြွက်တက် ခြင်း မျိုး ညဘက်မှာ ဖြစ်ပွားပါက "ညဘက် ခြေထောက်ကြွက်တက်ခြင်း" (Nocturnal leg cramps) လို့ ခေါ်ဆို ပြီး သာမာန်လူတွေထက် အသက်လတ်ပိုင်းမှ သက်ကြီးပိုင်းအရွယ်များအပြင် ကိုယ်ဝန်ဆောင်မိခင်များမှာ  ပိုမို အဖြစ်များတတ်ပါတယ်။

ညဘက်အိပ်ပျော်နေချိန်မှာ ဖြစ်တတ်တဲ့ ခြေထောက်ကြွက်တက်ခြင်း ဝေဒနာကို ဖြစ်စေနိုင်တဲ့ တကယ့်အကြောင်းရင်း အစစ်အမှန်ကို အပြည့်အဝ နားမလည်နိုင်သေးပေမယ့်  သတ္တုဓာတ်ချို့တဲ့ခြင်းကြောင့် ဖြစ်တယ်ဆိုတဲ့ အယူအဆ အမှားမျိုးတွေထက် ကြွက်သားပတ်လည် ပင်ပန်းနွမ်းနယ်ခြင်း၊ ကြွက်သားပျော့ပျောင်းမှုမရှိခြင်း၊ ဗဟိုအာရုံ ကြော စနစ် လုပ်ဆောင်ချက် မမှန်ကန်ခြင်း သို့မဟုတ် သွေးလှည့်ပတ်မှု အဟန့်အတားဖြစ်ခြင်း စတာတွေနှင့် ပိုမို ဆက်စပ်မှုရှိကြောင်း အထောက်အထားများက ဖော်ပြနေပါတယ်။ အမှန်စင်စစ်အားဖြင့် ကြွက်တက်ခြင်းကို ဖြစ်ပွားစေတယ်လို့ ယူဆနိုင်ဖွယ်ရာ အကြောင်းရင်းများစွာ ရှိနေပြီး ၎င်းတို့မှာ အောက်ပါအတိုင်း ဖြစ်ပါတယ်။ 

• ကြွက်သားများ ပျော့ပျောင်းမှုမရှိခြင်းနှင့် ကြွက်သားများ သို့မဟုတ် အရွတ်များ ပုံမှန်မဟုတ်ဘဲ ကျုံ့ခြင်း
• ဗဟိုအာရုံကြောစနစ် လုပ်ဆောင်ချက် မမှန်ကန်ခြင်း
• သွေးလွှတ်ကြောဆိုင်ရာ ရောဂါ သို့မဟုတ် သွေးပြန်ကြောဆိုင်ရာ ချို့ယွင်းမှုများ
• နေ့ဘက်တွင် ရေဓာတ်ပြည့်ဝစွာ မရရှိခြင်း
• ခြေထောက်ကို ချိတ်ပြီးထိုင်ခြင်း သို့မဟုတ် ခြေထောက်ကို အမြဲတစေ ကွေးထားခြင်း
• မာကျောသော မျက်နှာပြင်ပေါ်တွင် အချိန်ကြာမြင့်စွာ မတ်တပ်ရပ်ခြင်း သို့မဟုတ် အလုပ်လုပ်ခြင်း
• ပြင်းထန်သော လေ့ကျင့်ခန်းများ ပြုလုပ်ခြင်းကဲ့သို့ ကြွက်သားများကို အလွန်အကျွံ အသုံးပြုခြင်း
• သက်သောင့်သက်သာမရှိသော အနေအထား သို့မဟုတ် အနေအထားတစ်ခုတည်းတွင် အချိန်ကြာမြင့်စွာ လဲလျောင်းခြင်း၊ ထိုင်ခြင်း သို့မဟုတ် မတ်တပ်ရပ်ခြင်း

• ကိုယ်ဝန်ဆောင်ခြင်း
• သိုင်းရွိုက်ဆိုင်ရာ ဝေဒနာများ
• ပါကင်ဆန်ရောဂါကဲ့သို့သော အာရုံကြောစနစ်ဆိုင်ရာ ဝေဒနာများ
• Peripheral neuropathy သို့မဟုတ် Motor neuron disease ကဲ့သို့သော ဗဟိုအာရုံကြောအားနည်းခြင်းဆိုင်ရာ ဝေဒနာများ
• ဆီးချိုရောဂါကဲ့သို့သော ဇီဝကမ္မဖြစ်စဉ်ဆိုင်ရာ အခြေအနေများ
• နှလုံးရောဂါ သို့မဟုတ် ခြေလက်သွေးကြောများတွင်ဖြစ်သော သွေးကြောပိတ်ရောဂါ ကဲ့သို့သော နှလုံးသွေးကြောဆိုင်ရာ ဝေဒနာများ  
• ခြေဖဝါးပြားခြင်း သို့မဟုတ် ခါးရိုးကျဉ်းခြင်း ကဲ့သို့သော ခန္ဓာကိုယ်ပိုင်းဆိုင်ရာ ချို့ယွင်းမှုများ
• ရောဂါအချို့အတွက် အသုံးပြုရသော ဆေးဝါးများ (ဥပမာ - သွေးတွင်းအဆီကျဆေး (Statins)၊ နာတာရှည်လေပြွန်ကျဉ်းရောဂါတွင်သုံးသောဆေးများ (COPD drugs)၊ ဆီးဆေးများနှင့် သွေးတိုးကျဆေးများ)

မိမိဘာသာ သက်သာအောင်ပြုလုပ်ပေမယ့် သက်သာခြင်းမရှိဘဲ အိပ်စက်မှုကို အနှောင့်အယှက်ဖြစ်စေတဲ့ ညဘက်ခြေထောက်ကြွက်တက်ခြင်း ဝေဒနာကို အကြိမ်ကြိမ် ခံစားနေရခြင်း၊ ကြွက်တက်တဲ့နေရာမှာ နီမြန်း လာခြင်း သို့မဟုတ် အရေပြား ပြောင်းလဲမှုများ ဖြစ်ပေါ်လာခြင်း၊ ကြွက်သားများ သိသိသာသာ အားနည်းလာ ခြင်း စတဲ့အခြေအနေမျိုးတွေဆိုရင် ဆရာဝန်နှင့် တိုင်ပင်ပြီး ဆေးကုသမှု ခံယူသင့်ပါတယ်။ ဆေးရုံ၊ ဆေးခန်းသို့ သွားရောက်ပြသခြင်းဖြင့် ဆရာဝန်က ရောဂါရာဇဝင်နှင့် အသုံးပြုခဲ့တဲ့ ဆေးဝါးတွေကို ပြန်လည်စစ်ဆေးခြင်း၊ ခန္ဓာကိုယ်ကို အသေးစိတ်စမ်းသပ်ခြင်းနှင့် လိုအပ်ပါက သွေးစစ်ခြင်းတို့ ပြုလုပ်ကာ အခြားရောဂါများ ဟုတ်မဟုတ် ခွဲခြားသတ်မှတ်ပေးနိုင်မှာဖြစ်ပြီး ထိရောက်တဲ့ ကုသမှုကိုလည်း ပေးနိုင်မှာ ဖြစ်ပါတယ်။

ကုသမှုအပိုင်းမှာ ဆရာဝန်တွေဟာ အကိုက်အခဲသက်သာတဲ့ဆေးတွေ၊ ကြွက်သားပြေလျော့စေတဲ့ဆေးတွေ၊ လူကြီးများနှင့် ကိုယ်ဝန်ဆောင်များအတွက် မဂ္ဂနီဆီယမ် ဖြည့်စွက်စာ စတာတွေကို ထည့်သွင်းစဉ်းစားနိုင် သော်လည်း Quinine ဆေးဝါးကိုတော့ ကောင်းကျိုးထက် ဆိုးကျိုးက ပိုများတာကြောင့် ကုသမှုအတွက် အကြံပြုလေ့ မရှိပါ။

• ကြွက်တက်နေသော ကြွက်သားကို ချက်ချင်း အနားပေးပါ။
• ကြွက်သားတင်းမာမှုကို လျော့ကျစေရန်နှင့် ကြွက်တက်ခြင်း သက်သာစေရန် ကြွက်သားများကို ဖြည်းဖြည်းချင်း ညင်သာစွာ ဆန့်ထုတ်ပေးရပါမယ်။ အကယ်၍ ခြေသလုံးကြွက်သားတွင် ကြွက်တက်ခြင်းဖြစ်ပါက မတ်မတ်ထိုင်၍ ခြေထောက်ကို ရှေ့သို့ဆန့်ထုတ်ပါ၊ ထို့နောက် ခြေဖဝါးကို မိမိဘက်သို့ ဖြည်းဖြည်းချင်းကွေးပြီး (၁၀) စက္ကန့်မှ (၁၅) စက္ကန့်အထိ ထိန်းထားပါ၊ ပြီးနောက် ပြန်လွှတ်ပါ၊ ဤသို့ဖြင့် (၅) ကြိမ်မှ (၁၀) ကြိမ်အထိ ထပ်ခါတလဲလဲ ပြုလုပ်ပေးပါ။
• ကြွက်သားများ ပြန်လည်ပြေလျော့စေရန် ကြွက်တက်နေသောနေရာကို ညင်သာစွာ နှိပ်နယ်ပေးသင့်ပါတယ်။
• ကြွက်တက်နေသော ကြွက်သားကို အအေးဝတ် (သို့မဟုတ်) ရေခဲအိတ်ဖြင့် နှိပ်နယ်ပေးခြင်းကလည်း နာကျင်မှုကို သက်သာစေနိုင်ပါတယ်။ 
•  ကြွက်တက်ခြင်း ပျောက်သွားသော်လည်း နာကျင်မှု ကျန်ရှိနေပါက ပါရာစီတမော ကဲ့သို့သော အကိုက်အခဲ သက်သာစေသည့်ဆေးများနှင့် ကြွက်သားဖြေလျော့ဆေးများကို သောက်သုံးနိုင်ပါတယ်။ 

• ခြေထောက်ကြွက်သားများကို မကြာခဏ ဆန့်ထုတ်ပေးပါ။ ဥပမာအားဖြင့် ခြေသလုံးကြွက်သားကို ဆန့်ထုတ်ရန် နံရံဘက်သို့ မျက်နှာမူပြီး ခြေထောက်တစ်ဖက်ကို နောက်သို့ဆန့်ကာ အခြားတစ်ဖက်ကို ရှေ့တွင်ထားပါ။ ထို့နောက် ရှေ့ခြေထောက်ပေါ်သို့ ကိုယ်ကိုအနည်းငယ်ကိုင်းပြီး ခြေဖဝါးနှစ်ဖက်လုံးကို ကြမ်းပြင်ပေါ်တွင် အပြားလိုက်ကပ်ထားလျက် တစ်ဖက်လျှင် (၅) စက္ကန့်မှ (၁၀) စက္ကန့်အထိ ထိန်းထားပါ။ အကောင်းဆုံးရလဒ်ရရှိရန် တစ်ခါပြုလုပ်လျှင် (၁၀) ကြိမ်ဖြင့် တစ်နေ့လျှင် (၃) ကျော့ ပြုလုပ်ပေးပါ။
• အားကစားမလုပ်မီ သို့မဟုတ် လေ့ကျင့်ခန်းမလုပ်မီ ကြွက်သားများကို စနစ်တကျ အကြောလျှော့ ပေးပါ။
• တစ်နေ့တာလုံး ရေဓာတ်ပြည့်ဝနေပါစေ။ တစ်နေ့လျှင် ရေ (၈) ဖန်ခွက်မှ (၁၀) ဖန်ခွက်အထိ သောက်သုံးပေးပါ၊ အထူးသဖြင့် လေ့ကျင့်ခန်းလုပ်ချိန်တွင် ရေဓာတ်ခမ်းခြောက်မှု မဖြစ်အောင် ဂရုစိုက်ပါ။
• ခြေဖနောင့်ကြွလေ့ကျင့်ခန်း (Calf raises) ကို ပုံမှန်လုပ်ပေးပါ။ ၎င်းသည် သွေးလှည့်ပတ်မှု ကောင်းမွန်စေပြီး ကြွက်သားများ ကြွက်တက်ခြင်းကို ကာကွယ်ပေးနိုင်ပါတယ်။ 
• ရေနွေးဖြင့် အမြဲတမ်း ရေချိုးပေးပါ။
•  အရက်သေစာ သောက်သုံးခြင်းကို ရှောင်ကြဉ်ပါ။
• ကဖင်းဓာတ်ပါဝင်သော သောက်စရာများကို လျှော့ချပါ။ ဥပမာ - ကော်ဖီနှင့် ချောကလက်(အပူ)များ။
• ကိုယ်ဝန်ဆောင်မိခင်များအတွက် အဟာရပြည့်ဝစွာ စားသုံးပါ။ ကယ်လ်စီယမ် (ဒိန်ချဉ်၊ ဒိန်ခဲ၊ ပဲနို့)၊ ပိုတက်စီယမ် (ကိုကိုး၊ ဆီးသီးခြောက်၊ နေကြာစေ့) နှင့် မဂ္ဂနီဆီယမ် (ငှက်ပျောသီး၊ စားတော်ပဲ၊ ဟင်းနုနွယ်၊ ပြောင်းဖူးချို၊ ဖရုံစေ့နှင့် နှမ်း) တို့ ကြွယ်ဝစွာပါဝင်သော အစားအစာများကို စားသုံးသင့်ပါတယ်။ 

ညဘက်ခြေထောက်ကြွက်တက်ရခြင်းရဲ့ တကယ့်အကြောင်းရင်းအစစ်အမှန်ကို အတိအကျမသိရသေးပေမယ့် ဆီးချိုရောဂါ၊ ကျောက်ကပ်ရောဂါနှင့် သွေးလွှတ်ကြောဆိုင်ရာရောဂါ ကဲ့သို့သော ဝေဒနာများဟာ ကြွက်တက် နိုင်ခြေကို မြင့်တက်စေနိုင်တဲ့ လက္ခဏာရပ်များ ဖြစ်ကြပါတယ်။ ဒါကြောင့် ညဘက်မှာ ခဏခဏ ကြွက်တက် ခြင်းကို ခံစားနေရပါက ဆရာဝန်နှင့် ပြသတိုင်ပင်သင့်ပါတယ်။ ဒါမှသာ ရောဂါအခြေအနေကို စစ်ဆေး ဖော်ထုတ် ပေးနိုင်မှာဖြစ်ပြီး ထိရောက်တဲ့ ကုသမှုနည်းလမ်းများကို အချိန်နှင့်တစ်ပြေးညီ အကြံပြုပေးနိုင်မှာ ဖြစ်ပါတယ်။