Valentine’s Day အတွက် ကျန်းမာမှုချစ်ခြင်းလက်ဆောင်ချောကလက်

• လေ့လာတွေ့ရှိချက်များအရ တစ်ပတ်မှာ ချောကလက် (၅၀) မှ(၁၀၀) ဂရမ် (ကယ်လိုရီ (၃၀၀) မှ (၆၀၀) ) ကို (၁)ကြိမ် (သို့) (၂)ကြိမ် စားသုံးသူများဟာ လုံးဝမစားသူများနဲ့ ယှဉ်ရင် နှလုံးရောဂါကြောင့် စောစီးစွာသေဆုံးခြင်းကို ပိုမို လျှော့ချပေးနိုင်ကြောင်း သိရပါတယ်။ ဒါဟာဘာကြောင့်လဲဆိုရင် ချောကလက် မှာပါတဲ့ ပစ္စည်းများဟာ နှလုံးသွေးကြောစနစ်ကို သွေးလည်ပတ်မှုကောင်း မွန်အောင်ကူညီပေးပြီး ပိုမိုအားကောင်းစေလို့ဖြစ်ပါတယ်။
• ချောကလက်တွေထဲမှာ ကောင်းကျိုးအများဆုံးပေးတဲ့ ချောကလက် အမျိုးအစားကတော့ Dark Chocolate လို့ခေါ်တဲ့ Cocoa ပါဝင်မှု (၇၀) ကနေ (၈၅) ရာခိုင်နှုန်း အနည်းဆုံး ရှိတဲ့ ချောကလက်ပဲဖြစ်ပါတယ်။
• Dark Chocolate ဟာ သကြားနဲ့ နို့ ပါဝင်မှုအနည်းငယ်သာ ရှိတယ်ဆိုပေမယ့် လည်း နို့ နဲ့ သကြား လုံးဝမပါဝင်တာ မဟုတ်ပါဘူး။ ဒါကြောင့် ချောကလက် စားမယ်ဆိုရင် သင့်တင့်မျှတရုံသာစားဖို့က အရေးကြီးပါတယ်။

Valentine’s Day လို့ခေါ်တဲ့ ချစ်သူများနေ့မှာ ချောကလက်ဟာ နှင်းဆီပန်းစည်း နည်းတူ အရေးပါတဲ့ လက်ဆောင်မွန် တစ်ခုပဲဖြစ်တယ်ဆိုတာကို အားလုံးသိထားကြ မှာပါ။  ချောကလက်ဟာ လိင်မှုဆိုင်ရာစွမ်းဆောင်ရည်ကို ပိုမိုမြင့်မားစေတယ်ဆိုတဲ့ ယုံကြည်မှုကြောင့်လည်း ဖြစ်နိုင်ပါတယ်။ နောက်တစ်ချက်ကတော့ ချောကလက်ရဲ့ ချိုမွှေးအေးမြတဲ့ အနံ့ နဲ့ စွဲမက်စရာ အသွင်သဏ္ဍာန်ဟာလည်း ချစ်ခြင်းရဲ့ လက်ဆောင်သင်္ကေတ တစ်ခုအဖြစ် ကိုက်ညီနေပြန်ပါတယ်။ ချောကလက်ဟာလျှာပေါ်မှာ ခံစားရတဲ့အရသာနဲ့ အမြင်လှပမှုသာမက သင်တို့ရဲ့ ကျန်းမာရေးအတွက်ပါ ဘယ်လိုအထောက်အကူပြုသလဲဆိုတာကို သိထားပါရဲ့လား?

ချောကလက်မှာ လူသားတို့ရဲ့ ကျန်းမာရေးအတွက် အထောက်အကူပြုပြီး နာမကျန်းခြင်းနဲ့ ရောဂါအမျိုး မျိုးကို ကာကွယ်ပေးနိုင်တဲ့ ဓာတ်ပစ္စည်းတွေ အများကြီးပါဝင်ပါတယ်။

၁။ ကဖင်းဓာတ်(Caffeine)    - ကဖင်းဓာတ်(Caffeine) ဟာ ပင်မအာရုံကြောစနစ်ကို နှိုးဆွပေးပြီး ခန္ဓာကိုယ်အစိတ်အပိုင်း နေရာမျိုးစုံဆီကို သွေးလည်ပတ်မှု မြင့်မားစေပါတယ်။

၂။ သီယိုဘရိုမင်း (Theobromine)    - သီယိုဘရိုမင်း (Theobromine) လို့ခေါ်တဲ့ ဓာတ်ပစ္စည်းတစ်မျိုးဟာ သွေးဖိအားကိုလျော့ကျစေဖို့ အထောက်အကူပြုကာ နှလုံးလုပ်ဆောင်မှုကို နှိုးဆွ ပေးပြီး နှလုံးကြွက်သားပုပ်ခြင်း (Myocardial Infaarction) ဖြစ်ပွားနိုင်မှုကို လျှော့ချ ပေးပါတယ်။

၃။ Flavonoid    - Flavonoid လို့ခေါ်တဲ့ ဓာတ်ပစ္စည်းတစ်မျိုးဟာ Polyphenol ဒြပ်ပေါင်းအမျိုးအစား ဓာတ်တိုးလျှော့ချပစ္စည်း(Antioxidant) များပါဝင်ပါတယ်။ ၎င်း ဓာတ်ပစ္စည်းဟာ နှလုံးမှာရှိတဲ့ သွေးကြောများကို ပိုမိုအားကောင်းစေပြီး ရောဂါအမျိုးမျိုးမှ ကာကွယ်ပေးပါတယ်။

ချောကလက်နဲ့ပတ်သက်ပြီးအီရန်န်ိုင်ငံရဲ့လေ့လာတွေ့ရှိချက်  အီရန်နိုင်ငံမှာ ဆီးချိုနဲ့ သွေးတိုးရောဂါ ခံစားနေရသူ အယောက် (၆၀) ကို စောင့်ကြည့်လေ့လာခဲ့ပါတယ်။ ပထမ အုပ်စုကို Cocoa ပါဝင်မှု (၇၀)-(၈၅) ရာခိုင်နှုန်းရှိတဲ့ Dark Chocolate ကို နေ့စဉ် (၂၅) ဂရမ် ကျွေးပြီး ဒုတိယအုပ်စုကိုတော့ အလားတူပမာဏ ရှိတဲ့ White Chocolate ကျွေးပြီး လေ့လာခဲ့ကြပါတယ်။ ဒီလိုလေ့လာခဲ့ရာမှာ Dark Chocolate စားခဲ့တဲ့ အုပ်စုမှာ သိသိသာသာ သွေးပေါင်ချိန် လျော့နည်းတာကို တွေ့ရှိခဲ့ရပါတယ်။ ဒါဟာ Dark Chocolate တွေ့ရှိရတဲ့ သီယိုဘရိုမင်း (Theobromine) ဓာတ် မြင့်မားစွာပါဝင်မှုကြောင့်ဖြစ်တယ်လို့ သုတေသီများက ယုံကြည် ကြပါတယ်။ ချောကလက်စားလို့ ဝိတ်တက်သွားမယ်လို့ စိုးရိမ်နေသူများအနေနဲ့ Dark Chocolate ကို သင့်တင့်မျှတစွာ စားသုံးဖို့ အကြံပေးချင်ပါတယ်။ အီရန်နိုင်ငံမှာပဲ ပြုလုပ်ခဲ့တဲ့ နောက်ထပ်လေ့လာချက်တစ်ခုကတော့ အဝလွန်သူ (၁၁၄) ယောက်ကို Cocoa (၇၄) ရာခိုင်နှုန်းပါဝင်တဲ့ ချောကလက်ကို နေ့စဉ် (၂၀)-(၄၀) ဂရမ် ကျွေးပြီး (၂)လတာ စောင့်ကြည့်လေ့လာခဲ့တာဖြစ်ပါတယ်။ ၎င်း တို့ရဲ့ သွေးနမူနာများ ကိုစစ်ဆေးခဲ့ရာမှာ ချောကလက်ကြောင့် ကိုလက်စ်ထရောလ်၊ Triglyceridesခေါ် အဆီဓာတ်တစ်မျိုး၊ ပြည့်ဝဆီ (Saturated Fats) စတာတွေကို သိသိသာသာ မြင့်မားစေဖို့ အထောက်အကူမပြုကြောင်း တွေ့ရှိခဲ့ရပါတယ်။

ချောကလက်နဲ့ပတ်သက်ပြီးဆွီဒင်နိုင်ငံရဲ့လေ့လာတွေ့ရှိချက်  ဆွီဒင်နိုင်ငံမှာ နှလုံးဖောက်ခြင်းနဲ့ ဆီးချိုရောဂါခံစားနေရတဲ့ သူများကို စောင့်ကြည့်လေ့လာခဲ့ ကြပါတယ်။ အဆိုပါ အုပ်စုမှာပါဝင်သူ (၁၁၆၉) ယောက်ကို (၁၂)လတာအတွင်း ၎င်းတို့ရဲ့ ချောကလက်စားသုံးမှုနဲ့ပတ်သက်တဲ့ စစ်တမ်းမေးခွန်းများ မေးမြန်း ကောက်ခံခဲ့တာဖြစ်ပါတယ်။ ၎င်းတို့ရဲ့ချောကလက်စား သုံးမှုကိုအခြေခံကာ သုတေသီ များဟာ အုပ်စုခွဲခြားခဲ့ပြီး သူတို့ရဲ့ တိုးတက်မှုကို နောက်ထပ် (၈)နှစ်ကြာ ပြုလုပ်ခဲ့ပါ တယ်။ လေ့လာတွေ့ရှိချက်အရ ချောကလက်ပုံမှန်စားသုံးသူများဟာ ချောကလက် မစားသူများနဲ့ ယှဉ်ရင် ဆိုးဆိုးရွားရွားနှလုံးဖောက်မှု ဖြစ်နိုင်ခြေနည်းပါးကြောင်း တွေ့ရှိခဲ့ရပါတယ်။ ဒါပေမယ့်လည်း ချောကလက်စားသုံးမှု နဲ့  သေဆုံးသည်အထိဖြစ်စတဲ့နှလုံးဖောက်ခြင်း ကတော့ စားသုံးလိုက်တဲ့ ပမာဏအပေါ်မှာ မူတည်နေပါတယ်။ ချောကလက် ကို တစ်လမှာ တစ်ကြိမ်ထက်ပိုပြီး စားသုံးမှု မရှိသူများဟာ ရောဂါဖြစ် နိုင်ခြေကို (၂၇) ရာခိုင်နှုန်းလျှော့ချပေးနိုင်တာကိုတွေ့ရပြီး တစ်ပတ်မှာ တစ်ကြိမ် စားသုံးသူများကတော့ ရောဂါဖြစ်နိုင်ခြေ (၄၄)ရာခိုင်နှုန်းလျှော့ချပေးနိုင်ပါတယ်။ တစ်ပတ်ကို ချောကလက် (၂)ကြိမ်ထက်ပိုပြီးစားသုံးသူများကတော့ အသက်ဆုံရှုံးသည် အထိဖြစ်စေနိုင်တဲ့ နှလုံးဖောက်ခြင်း (Heart Attack) ကို (၆၆) ရာခိုင်နှုန်းလျှော့ချ ပေးနိုင်ပါတယ်။ ( လေ့လာချက်အားလုံးဟာ ချောကလက်လုံးဝ မစားသုံးသူများနဲ့ နှိုင်းယှဉ်ပြီး လေ့လာခဲ့တာဖြစ်ပါတယ်။)

The British Medical Journal ရဲ့ ၂၀၁၂ ခုနှစ်မှာထုတ်ပြန်ခဲ့တဲ့ လေ့လာချက်တစ်ခုမှာ Dark Chocolate ကို (၁၀)နှစ်ကြာ နေ့စဉ်စားသုံးမယ်ဆိုရင် လူအယောက် (၁၀၀၀) မှာ (၇၀) ဟာ သေစေလောက်တဲ့နှလုံးသွေးကြောရောဂါများနဲ့ လေဖြတ်ခြင်း မဖြစ်နိုင် တဲ့အပြင် လူအယောက် (၁၀၀၀) မှာ (၁၅)ယောက်ဟာ ပြင်းထန်တဲ့ရောဂါဖြစ်ပွားနိုင်မှု ကို ကာကွယ်ပေးတယ်လို့ ဆိုပါတယ်။ လေ့လာချက်တစ်ခုမှာ ခါးဆိုဒ် (၃၉)လက်မအထက်ရှိသူ၊ ပျမ်းမျှ သွေးပေါင်ချိန် (၁၄၁.၁၁) မီလီမီတာရှိသူ ၊ ကိုလက်စ်ထရောလ်ပမာဏ ၂၃၉ mg/Dl ၊ ဆီးချိုလို့သတ်မှတ်မရသေးတဲ့ သွေးတွင်းသကြားဓာတ်ပမာဏရှိသူ ၊ ပျမ်းမျှ အသက် (၅၃.၆)နှစ် ရှိသူ (၂၀၁၃)ဦးကို အုပ်စုခွဲပြီး စစ်ဆေးလေ့လာခဲ့ပါတယ်။ အဆိုပါအုပ်စုမှာ ပါဝင်သူများအားလုံးကို Dark Chocolate မှာ အဓိကတွေ့ရတဲ့ Polyphenol (၁၀၀)ဂရမ်စီ နေ့စဉ် အညီအမျှကျွေးပြီး လေ့လာဆန်းစစ်ခဲ့တာဖြစ်ပါ တယ်။ အဲဒီလေ့လာမှုရဲ့ ရလဒ်အရ ချောကလက်စားသုံးခြင်းဟာ ရေရှည်မှာ နှလုံးသွေးကြောရောဂါကြောင့် သေဆုံးမှုကို လျှော့ချပေးနိုင်ခြေရှိတယ်လို့ ဆိုပါတယ်။ ဒါပေမယ့်လည်း ဒီလေ့လာမှုဟာ ကူးစက်ရောဂါများရဲ့သဘောသဘာဝကို အဓိက အခြေခံတဲ့ လေ့လာတွေ့ရှိချက်ဖြစ်တာကြောင့်  အနာဂတ်မှာ ခေါင်းစဉ်အလိုက် ဆွေးနွေးချက်တွေမှာ သင့်တင့်တဲ့ သက်သေသာဓကအနေနဲ့သာ အသုံးပြုသင့်ပါ တယ်။ အဲဒီအပြင်  ပုံမှန်လေ့ကျင့်ခန်းမလုပ်ဘဲနဲ့ ချောကလက်ကို အများကြီး စားမိမယ်ဆိုရင် တချို့လူတွေအတွက် ကိုလက်စ်ထရောလ် ပိုတက်စေပြီး သွေးတွင်း သကြားဓာတ်လည်း မြင့်မားလာနိုင်ပါတယ်။ ဒါပေမယ့် ဒီအချက်နဲ့ ပတ်သက်ပြီး တိကျတဲ့ သက်သေသာဓကတော့ မရှိသေးပါဘူး။

ချောကလက်မှာ နှလုံးကျန်းမာရေးကိုအထောက်အကူပြုရုံသာမက အောက်ဖော်ပြပါ ကောင်းကျိုးပြု ဓာတ်ပစ္စည်းများလည်းပါဝင်ပါတယ်။

• Anandamide ( ပျော်ရွှင်မှုလို့ အဓိပ္ပာယ်ရတဲ့ Sanskrit ကနေဆင်းသက်လာ) - ဒီဓာတ်ပစ္စည်းဟာ နာကျင်ကိုက်ခဲမှုကိုလျှော့ချပေးပြီး ခန္ဓာကိုယ်ရဲ့ အဓိက ကျတဲ့ အပူချိန်ကို ထိန်းညှိပေးကာ ကျေနပ်စရာခံစားမှုကိုပေးစွမ်းပါတယ်။
• Phenylethylamine (PEA) - ဒီဓာတ်ပစ္စည်းဟာ စိတ်ဖိစီးမှုကိုလျော့ကျသက်သာ စေတဲ့ Neurotransmitters များကို ထုတ်လုပ်ပေးပါတယ်။ ဒါဟာ ချောကလက်ရဲ့ ကောင်းကျိုးများထဲမှ အဓိက ကျတဲ့ တစ်ချက်ဖြစ်ပြီး လိင်စွမ်း ဆောင်မှုကိုအားကောင်းစေတဲ့ Aphrodisiac အဖြစ်လည်း မှတ်ယူကြပါတယ်။

ကျန်းမာရေးအတွက် အကျိုးအရှိဆုံး ချောကလက် အမျိုးအစားကတော့ Cocoa  (၇၀)-(၈၅) ရာခိုင်နှုန်းပါဝင်တဲ့ Dark Chocolate အမျိုးအစားပဲဖြစ်ပါတယ်။ အဆိုပါ Dark Chocolate ကို တစ်နေ့လျှင် (၅၀) ဂရမ် ကနေ (၁၀၀)ဂရမ်ကြား စားသုံးဖို့အကြံပြုချင် ပါတယ်။ အဲဒီလို ပမာဏအတိုင်း တစ်ပတ်ကို (၁)ရက် (သို့) (၂)ရက် စားသုံးမယ်ဆိုရင် နှလုံးကျန်းမာရေးကို အထောက်အကူပြုစေမှာ အမှန်ပါပဲ။

Dark Chocolate မှာ သကြားနဲ့ နို့ ပါဝင်မှု အနည်းငယ်မျှသာပါဝင်တယ်ဆိုပေမယ့် လုံးဝ မပါဝင်တာ မဟုတ်ဘူး ဆိုတာကို သတိပြုပြီး သင့်တင့်ရုံသာ စားသုံးသင့်ပါတယ်။ ပုံမှန်လေ့ကျင့်ခန်းလုပ်ခြင်း၊ ကျန်းမာရေးနဲ့ညီညွတ်အောင်စားခြင်းနည်းလမ်းများဟာ လည်း မိမိရဲ့ ကျန်းမာရေးကို ကောင်းမွန်စေမှာဖြစ်ပါတယ်။ ချောကလက်ဟာ စိတ်ဖိစီးမှုများကို လျှော့ချဖို့ရည်ရွယ်ပြီး လေ့ကျင့်ခန်းလှုပ်ရှားမှု မပြုခင်မှာ Snack အနေနဲ့ စားသုံးဖို့ ရွေးချယ်မှုကောင်းတစ်ခုဖြစ်ပါတယ်။ ဒီထက်ပိုဆိုရရင် ချစ်သူများနေ့ (Valentine’s Day) လို အထူး နေ့ရက်အတွက် ချောကလက်ဟာ အကောင်းဆုံး လက်ဆောင်အဖြစ် က်ိုယ်စားပြုနေပါတယ်။