ကလေးများ၏ ကြီးထွားမှုနှေးကွေးခြင်းနှင့် အရပ်ပုခြင်းကို ဆန်းစစ်ခြင်း

• ကလေးတစ်ယောက်ရဲ့ အရပ်အမောင်းဟာ မျိုးရိုးဗီဇအပေါ်  များစွာမူတည်နေပါတယ်။
• သင့်တင့်၍ အကောင်းဆုံးသော စံအရပ်အမောင်း ရရှိစေဖို့ဆိုရင် ကလေးတွေဟာ တစ်နေ့ အနည်းဆုံး ၈ နာရီ မှ ၁၀ နာရီအထိ အိပ်စက်သင့်ပါတယ်။
• ကလေးတစ်ယောက်ရဲ့ ကြီးထွားမှုဟာ ပုံမှန်ကြီးထွားမှုဇယားမှ သွေဖည်နေလျှင်၊ အထူးသဖြင့် အနိမ့်ဆုံးမျဉ်းအောက်သို့ ရောက်ရှိနေလျှင် “ကြီးထွားမှုနှုန်းနှေးကွေးနေခြင်း”ကို ညွှန်ပြနေတာ ဖြစ်နိုင်ပါတယ်။

“ကလေးဘဝ”ဆိုတာ အရွယ်ရောက်ချိန်အထိ များစွာသော အပြောင်းအလဲများနှင့် ရုပ်ပိုင်းဆိုင်ရာ ဖွံ့ဖြိုးတိုးတက် မှုတွေ စဉ်ဆက်မပြတ် ဖြစ်ပေါ်နေတဲ့ အချိန်ကာလပဲ ဖြစ်ပါတယ်။ မျှော်မှန်းထားတာထက် ပိုမိုနှေးကွေးစွာ ကြီးထွားနေပြီဆိုရင် ထိထိရောက်ရောက်နှင့်အချိန်မီ ကုသဖို့လိုအပ်တဲ့ ရောဂါအခံတစ်ခုခု ရှိကောင်း ရှိနေနိုင်ပါတယ်။ 

ကလေးတစ်ယောက် ပုံမှန်ကြီးထွားခြင်း ရှိ၊ မရှိ ဆုံးဖြတ်ဖို့အတွက် သူတို့ရဲ့ အရပ်ထွက်နှုန်းကို ကြီးထွားမှုပြဇယားမှာ ဖော်ပြထားတဲ့ အသက်နှင့် ကျား/မ အလိုက် သတ်မှတ်ထားသော စံနှုန်းများ နှင့် နှိုင်းယှဉ်ကြည့်နိုင်ပါတယ်။ တကယ်လို့ ကလေးရဲ့ ကြီးထွားမှုပုံစံဟာ ပုံမှန်ကနေ သွေဖည်နေမယ်ဆိုရင် ဆရာဝန်နှင့် တိုင်ပင်ဆွေးနွေးဖို့ အကြံပြုပါတယ်။

ကလေးတစ်ဦး၏ ကြီးထွားမှုအပေါ် သက်ရောက်မှုရှိသော အကြောင်းရင်းများ

• မျိုးရိုးဗီဇ  - အရေးကြီးဆုံးသော ဆုံးဖြတ်ချက်ပေးသည့်အချက်
• သင့်တင့်မျှတသော အာဟာရ- အလွန်အကျွံ ဖြစ်ခြင်း သို့မဟုတ် ချို့တဲ့ခြင်း မရှိစေရ
• လုံလောက်သော အိပ်စက်ခြင်း- တစ်နေ့လျှင် အနည်းဆုံး ၈ နာရီမှ ၁၀ နာရီအထိ
• မိမိနှင့် သင့်လျော်သော ကိုယ်လက်လှုပ်ရှားလေ့ကျင့်ခန်းကို ပုံမှန်ပြုလုပ်ခြင်း - တစ်ပတ်လျှင် အနည်းဆုံး ၂ ကြိမ်မှ ၃ ကြိမ်အထိ
• ကျန်းမာရေး အခြေအနေများ- ဖုံးကွယ်နေသော နာတာရှည်ရောဂါများနှင့် စတီးရွိုက် ကဲ့သို့သော ဆေးဝါးအချို့ဟာ ကြီးထွားမှုအပေါ်မှာ သက်ရောက်မှု ရှိနိုင်ပါတယ်
• ဟော်မုန်းဆိုင်ရာ အချက်များ- အထူးသဖြင့် ကြီးထွားမှုဆိုင်ရာ ဟော်မုန်းများ

မိဘများအနေဖြင့် အောက်ပါလက္ခဏာရပ်များကို စောင့်ကြည့်လေ့လာနိုင်ပါတယ်။ 

• သက်ရွယ်တူ သူငယ်ချင်းများ သို့မဟုတ် မောင်နှမများထက် အရပ်သိသိသာသာ ပုနေခြင်း။
• ကြီးထွားမှုပြမှတ်တမ်းဇယား (Growth Chart) ပေါ်တွင် အရပ်ထွက်နှုန်း နှေးကွေးနေခြင်း သို့မဟုတ် တိုးတက်မှု မရှိတော့ခြင်း။
• အသက်နှင့် ကျား/မ အလိုက် သတ်မှတ်ထားသော ကြီးထွားမှုဇယား၏ အနိမ့်ဆုံးမျဉ်း (Lowest Percentile Line) အောက်တွင် ရောက်ရှိနေခြင်း။

ကလေးရဲ့ ကြီးထွားမှုနှုန်းကို ကလေးအထူးကု ဆရာဝန်တွေက ကြီးထွားမှုမှတ်တမ်းဇယား (Growth Chart) အသုံးပြုပြီး ဆန်းစစ်ပေးမှာ ဖြစ်ပါတယ်။ တကယ်လို့ ပုံမှန်မဟုတ်သော ကြီးထွားမှုကို သံသယရှိပါက ကလေးဟော်မုန်းဆိုင်ရာ အထူးကုဆရာဝန် ဆီကို လွှဲပြောင်းပြသဖို့ အကြံပြုပါလိမ့်မယ်။

ဆန်းစစ်ချက်ပြုလုပ်ရာတွင် ပါဝင်သော အဓိကအချက်များမှာ 

• ဆေးမှတ်တမ်းနှင့် မိသားစုရာဇဝင် - (ကိုယ်ဝန်ဆောင်စဉ် အခြေအနေ၊ မွေးဖွားမှုဆိုင်ရာ အသေးစိတ်အချက်များ၊ မွေးစအလေးချိန်နှင့် အရပ်အမောင်း၊ ယခင်က ဖြစ်ဖူးသော ရောဂါများ၊ အာဟာရစားသုံးမှု၊ ဖွံ့ဖြိုးမှုဆိုင်ရာ မှတ်တိုင်များအပြင် မိဘများနှင့် မောင်နှမများ၏ အရပ်နှင့် အပျို/လူပျိုဖော်ဝင်ချိန်များ။)
• ကိုယ်ခန္ဓာကို စစ်ဆေးခြင်း - အလေးချိန်၊ အရပ် (သို့မဟုတ် ကလေးငယ်များတွင် ကိုယ်တိုင်းအရှည်)၊ လက်တံနှင့် ခြေတံအရှည်များ၊ ဦးခေါင်းလုံးပတ်တို့ကို တိုင်းတာပြီး ကြီးထွားမှုဇယားတွင် မှတ်တမ်းတင်ခြင်း။ အခြားသော ခန္ဓာကိုယ်စနစ်များကို စစ်ဆေးခြင်းဖြင့်လည်း ပုံမှန်မဟုတ်တဲ့ ဆက်စပ် အချက်အလက်များကို သိရှိနိုင်ပါတယ်။
• အရိုး၏အသက်ကို ဆန်းစစ်ခြင်း - အရိုးဖွံ့ဖြိုးမှုကို သိရှိနိုင်ဖို့ လက်ဖဝါးနှင့် လက်ကောက်ဝတ်ကို ဓာတ်မှန်ရိုက်၍ စစ်ဆေးခြင်း။
• ဓာတ်ခွဲခန်းစစ်ဆေးမှုများ - ဟော်မုန်းဆိုင်ရာ ချို့ယွင်းချက်ရှိနိုင်တယ်လို့ သံသယရှိပါက ဓာတ်ခွဲစစ်ဆေးမှုများ ပြုလုပ်ဖို့ ညွှန်ကြားပါလိမ့်မယ်။

မှန်ကန်၍ သင့်တင့်မျှတသော အာဟာရဓာတ် ရရှိခြင်းဟာ ကလေးငယ်များရဲ့ ရုပ်ပိုင်းဆိုင်ရာ ဖွံ့ဖြိုးမှု  နှင့် အလုံးစုံသော ကျန်းမာရေးအတွက် အလွန်အရေးကြီးတဲ့အပြင် အဝလွန်ခြင်း ကိုလည်း ကာကွယ်ပေးနိုင်ပါတယ်။ ကလေးများအတွက် အကြံပြုထားသော စားသောက်မှုပုံစံများမှာ

• ကာဘိုဟိုက်ဒရိတ်(ကစီဓာတ်)၊ ပရိုတင်း (အသားနှင့် နို့)၊ အဆီဓာတ်၊ ဟင်းသီးဟင်းရွက်နှင့် သစ်သီးဝလံများ ပါဝင်တဲ့ အခြေခံ အစာအုပ်စု (၅) စုကို မျှတစွာ စားသုံးခြင်း။
• ကယ်လ်စီယမ်ဓာတ် လုံလောက်စွာ ရရှိစေရန် တစ်နေ့လျှင် နို့ (၂) ခွက်မှ (၃) ခွက်အထိ သောက်သုံးခြင်း။
• အမျှင်ဓာတ် ရရှိစေရန်အတွက် ဟင်းသီးဟင်းရွက်နှင့် သစ်သီးဝလံများကို ပုံမှန် စားသုံးခြင်း။
• အသည်း၊ အနီရောင်ရှိသောအသား၊ ကြက်ဥအနှစ်နှင့် အစိမ်းရင့်ရောင်ရှိသော ဟင်းသီးဟင်းရွက်များကဲ့သို့ သံဓာတ်ကြွယ်ဝသော အစားအစာများကို မကြာခဏ စားသုံးခြင်း။
• အလွန်အမင်း ချိုသော အစားအစာများနှင့် သကြားဓာတ် များပြားသော အရာများကို ရှောင်ကြဉ်ခြင်း။
• အဆီဓာတ် အလွန်အကျွံပါဝင်သော အစားအစာများ စားသုံးမှုကို ကန့်သတ်ခြင်း။
• အချိုရည်များ၊ သကြားလုံးများနှင့် အာလူးကြော်ကဲ့သို့သော မုန့်များကို ရှောင်ကြဉ်ခြင်း။

ကြီးထွားမှု နှေးကွေးခြင်းအပြင် "ပုံမှန်အခြေအနေအရ အရပ်ပုခြင်း" ဆိုတဲ့ အခြေအနေတစ်ခုလည်း ရှိပါတယ်။ ဘာရောဂါအခံကြောင့်မှ မဟုတ်ဘဲ ဆေးကုသမှုခံယူရန်လည်း မလိုအပ်ပါ ။ ဒါကြောင့် မိဘတွေအနေနှင့် စိုးရိမ်ဖို့မလိုပါ။

"ပုံမှန်အခြေအနေအရ အရပ်ပုခြင်း"မှာ ပါဝင်တဲ့ အမျိုးအစားတွေကတော့ 

• မိသားစုမျိုးရိုးလိုက် အရပ်ပုခြင်း -  မိဘများ ကိုယ်တိုင် အရပ်ပုတာကြောင့် ကလေးပါ အရပ်ပုရခြင်း။
• ခန္ဓာကိုယ်ဖွံ့ဖြိုးမှုနှင့် အပျို/လူပျိုဖော်ဝင်မှု နောက်ကျခြင်း -  ရွယ်တူတွေနှင့် နှိုင်းယှဉ်လျှင် အရပ်ပုနေခြင်းနှင့် အပျို/လူပျိုဖော်ဝင်မှု နောက်ကျခြင်းတို့ကို တစ်ပြိုင်နက် ခံစားရခြင်း ဖြစ်ပါတယ်။ များသောအားဖြင့် မိဘတွေမှာလည်း အပျို/လူပျိုဖော်ဝင်မှု နောက်ကျခဲ့တဲ့ ရာဇဝင်ရှိတတ်ပါတယ်။ (ဥပမာ - မိခင်ဟာ အသက် ၁၅ နှစ်အရွယ်ရောက်မှ ပထမဆုံး ဓမ္မတာလာခြင်းမျိုး)

မိဘများ ဆောင်ရွက်ရန်

မိဘများတွေအနေနှင့် မိမိတို့ကလေးရဲ့ ကြီးထွားမှုအလားအလာကို ပုံမှန်စောင့်ကြည့်စစ်ဆေးသင့်ပြီး ဖျားနာတဲ့ လက္ခဏာများ ရှိ၊ မရှိကိုလည်း ဂရုပြုသင့်ပါတယ်။ ပုံမှန်မဟုတ်တဲ့ အခြေအနေတွေကို စောစောစီးစီး သိရှိခြင်းဖြင့် ကျွမ်းကျင်သူများနှင့် အချိန်မီ တိုင်ပင်ဆွေးနွေးနိုင်ကာ မှန်ကန်တဲ့ ရောဂါရှာဖွေမှုနှင့် ကုသမှုတွေကို ရရှိနိုင်မှာ ဖြစ်ပါတယ်။