အမျိုးသမီးများအထူးသတိပြုစရာ ... “သားအိမ်တွင်းတစ်သျှူးများ သားအိမ်ပြင်ပရောက်ခြင်း(Endometriosis)” ပြဿနာ

“သားအိမ်တွင်း တစ်သျှူးများ သားအိမ်ပြင်ပရောက်ခြင်း” (Endometriosis) ဖြစ်ပွားရတာဟာ "ရာသီသွေး ပြောင်းပြန်စီးဆင်းခြင်း" (Retrograde Menstruation) ကြောင့်ဆိုတဲ့ ယူဆချက်တစ်ခုရှိပါတယ်။ ရာသီသွေးတွေ ဟာ သားဥပြွန်တွေကတစ်ဆင့် ပြန်လည်စီးဝင်ပြီး သားအိမ်အတွင်းသား တစ်သျှူးစတွေကို သားဥအိမ်များ၊ သားဥပြွန်များ၊ ဆီးအိမ်၊ အူလမ်းကြောင်း၊ သားအိမ် စတာတွေနဲ့ ဆက်စပ်နေတဲ့ အခြားတစ်သျှူးတွေပေါ်မှာ သွားပြီး တွယ်ကပ်နေစေတာပဲ ဖြစ်ပါတယ်။ ကနဦးကာလမှာ ရောဂါလက္ခဏာပြတာမျိုး၊ သိသိသာသာ နာကျင်ကိုက်ခဲတာမျိုး မရှိနိုင်ပေမယ့်  အချိန်ကြာလာ တာနဲ့အမျှ ဘေးပတ်ဝန်းကျင်တစ်သျှူးတွေ ရောင်ရမ်းလာပြီး အသားလုံးများ (သို့မဟုတ်) အနာများအဖြစ် ပြောင်းလဲဖြစ်ပေါ်လာနိုင်ပါတယ်။ အကယ်၍များ အဲဒီ နေရာလွဲမှားနေတဲ့ တစ်သျှူးတွေဟာ သားဥအိမ်မှာ သွားပြီး တွယ်ကပ်နေမယ်ဆိုရင်တော့ ရာသီလာချိန်မှာ ရာသီသွေးတွေဟာ ထွက်ပေါက်မရှိဘဲ ပိတ်မိနေတတ် ပါမယ်။ ဒီလိုနဲ့ သွေးတွေ တဖြည်းဖြည်း စုပုံများပြားလာပြီဆိုရင်တော့ "သားဥအိမ် အရည်အိတ်/သွေးအိတ်" (Cysts) တွေ ဖြစ်ပေါ်လာစေနိုင်ပါတယ်။ အချိန်ကြာလာတာနဲ့အမျှ စုပုံနေတဲ့သွေးတွေဟာ ပျစ်ခဲလာပြီး အရောင်ရင့်လာတတ်တာမို့ "ချောကလက်အရည်အိတ်" (Chocolate Cysts) လို့ လည်း ခေါ်ကြပါတယ်။ ဒီရောဂါဖြစ်ပွားရတဲ့ အကြောင်းရင်းနဲ့ ပတ်သက်ပြီး ဆေးပညာ အရ ရှင်းရှင်းလင်းလင်း ကောက်ချက်ချထားတာမျိုးတော့ မတွေ့မိသေးပါဘူး။ ရောဂါလက္ခဏာတွေနဲ့ ပတ်သက် ပြီးကတော့ ရာသီလာချိန်မှာ ကိုက်ခဲနာကျင်မှုကို အလွန်ပြင်းထန်စွာ ခံစားရတတ်ပါတယ်။ နာကျင်မှုဟာ တဖြည်းဖြည်း ပိုမိုဆိုးရွားလာပြီး သည်းမခံနိုင်လောက်တဲ့ အခြေအနေထိ ဖြစ်လာကာ အကိုက်အခဲပျောက်ဆေး များ သောက်သုံးရခြင်း၊ (သို့မဟုတ်) လုပ်ငန်းခွင်နှင့် နေ့စဉ်လူနေမှုဘဝ လှုပ်ရှားမှုများ ထိခိုက်ရပ်တန့်သွားရတဲ့ အထိ ဖြစ်ပေါ်စေနိုင်ပါတယ်။ တချို့အမျိုးသမီးတွေမှာဆိုရင် ခါးအောက်ပိုင်းနှင့် တင်ပါးဆုံရိုးတစ်ဝိုက်နေရာတွေမှာပါ နာကျင်ကိုက်ခဲမှုကို ခံစားရနိုင်ပါတယ်။ တစ်ခါတစ်ရံမှာ လေပွခြင်း၊ ဗိုက်ကယ်ခြင်း (သို့မဟုတ်) ဝမ်းလျှောခြင်းတို့လည်း ဖြစ်ပေါ်စေ တတ်ပါတယ်။ တစ်ချို့ဆိုရင် အမျိုးသားနှင့်အတူနေချိန်မှာ သားအိမ် (သို့မဟုတ်) ဝမ်းဗိုက်အောက်ပိုင်း၊ အတွင်းပိုင်းမှာ နက်နက်ရှိုင်းရှိုင်း ပြင်းထန်စွာ နာကျင်တာမျိုးလည်း ခံစားရလေ့ရှိပါတယ်။ ပွင့်ပွင့်လင်းလင်း ပြောရမယ်ဆိုရင် ဒီရောဂါဟာ အမျိုးသမီးတွေရဲ့ နေ့စဉ်လူနေမှုဘဝနဲ့ လှုပ်ရှားမှုတွေမှာ သက်ရောက်မှုများစွာရှိနိုင်တဲ့ အခြေအနေတစ်ခု ဖြစ်ပါတယ်။  အချိန်အကြာကြီး မကုသဘဲ လျစ်လျူရှုထားမယ် ဆိုရင် မခံမရပ်နိုင်အောင်နာကျင်ရတဲ့အဆင့်အထိ ရောက်သွားပြီး သားအိမ်ထုတ်ရတာမျိုးအထိ လုပ်ဖို့ လိုအပ် လာပါလိမ့်မယ်။ အဲလောက်အထိ လုပ်ရမယ်ဆိုရင်တော့ အနာဂတ်မှာ သားသမီးယူလို့ ရတော့မှာ မဟုတ်တဲ့ အတွက် ဒီအခြေအနေနဲ့ ရင်ဆိုင်နေရပြီဆိုရင် စောစောစီးစီး ကုသမှုခံယူသင့်ပါတယ်။

ကုသမှုအပိုင်းနဲ့ပတ်သက်ပြီး ပြောရမယ်ဆိုရင် ရောဂါလက္ခဏာမပြင်းထန်သေးတဲ့အချိန်မှာ ဆရာဝန်ဟာ ရာသီစက်ဝန်းကို လေ့လာစောင့်ကြည့်ခြင်းနည်းလမ်း (Periodic examinations) နဲ့ ကုသမှု ပေးနေပါလိမ့်မယ်။ ဒီ့ထက် ပိုဆိုးလာတဲ့အဆင့်ကိုရောက်လာတဲ့အခါ လိုအပ်တဲ့ ဆေးဝါးတွေ ညွှန်းဆိုပေးပါလိမ့်မယ်။ ဆေးဝါးတွေ နဲ့မှ ထိရောက်မှုမရှိဘူး၊  မသက်သာဘူး ဆိုရင်တော့ ခွဲစိတ်ကုသမှု ခံယူဖို့အထိ လိုအပ်လာနိုင်ပါတယ်။ ဒီကနေ့ သားအိမ်တွင်းတစ်သျှူးများ သားအိမ်ပြင်ပသို့ရောက်နေခြင်းကို ခွဲစိတ်ကုသရာမှာ မှန်ပြောင်းဖြင့် ခွဲစိတ်မှုခံယူခြင်းဟာ ခေတ်မီခွဲစိတ်မှုလုပ်ငန်းစဉ်တစ်ခုဖြစ်ပြီး ခွဲရာသေးကာ နာကျင်မှုနည်းပြီး အလျင်အမြန် သက်သာပျောက်ကင်းနိုင်ပါတယ်။ ပြီးတာ့ သည်ခွဲစိတ်နည်းပညာကြောင့် ခွဲစိတ်မှုဟာ လူအများထင်မှတ်နေကြ သလို စိုးရိမ်ပူပန်စရာ ကြောက်လန့်စရာလည်း မလိုပါဘူး။ ပြီးတော့ ဒီခွဲစိတ်ကုသမှုအမျိုးအစားဟာ အခြားသော မီးယပ်ရောဂါအမျိုးမျိုးအတွက်လည်း အကောင်းဆုံး ဖြေရှင်းနည်းတစ်ခု ဖြစ်ပါတယ်။ ကုသမှုဟာ မြန်ဆန်ပြီး အဆင်ပြေလွယ်ကူတဲ့ နည်းလမ်းဖြစ်တဲ့အလျောက်၊ လုပ်ငန်းခွင်နှင့် လူမှုအသိုင်းအဝိုင်းအတွင်း တာဝန်များစွာ ယူထားရတဲ့ ခေတ်မီအမျိုးသမီးတွေရဲ့ လူနေမှုဘဝ လိုအပ်ချက်များနှင့်လည်း အထူးကိုက်ညီမှု ရှိပါတယ်။ ဒီနေ့ခေတ်မှာဆိုရင် အမျိုးသမီးတွေဟာ ရောဂါ ပျောက်ကင်း သက်သာစေဖို့ အနားယူရန် အချိန်အကြာကြီးပေးဖို့ အခြေအနေလည်း မပေးနိုင်တော့တာကြောင့် သည်ခွဲစိတ်မှုနည်းလမ်းဟာ အသင့်တော်ဆုံး ရွေးချယ်စရာတစ်ခု ဖြစ်လာပါတော့တယ်။

သားအိမ်တွင်းတစ်သျှူးများ သားအိမ်ပြင်ပသို့ရောက်နေခြင်း Endometriosis ရောဂါကို စိုးရိမ်ဖွယ်ရာ ရောဂါ ကြီးတစ်ခုလို့ မယူဆတတ်ကြပေမယ့် ဒီရောဂါဟာ  နာကျင်ကိုက်ခဲမှုနှင့် ခံရခက်ပြီးမသက်မသာဖြစ်မှု တွေကို သေချာပေါက်ဖြစ်ပေါ်စေပြီး၊ နေ့စဉ်လူနေမှုဘဝ လုပ်ငန်းဆောင်တာများကိုပါ အနှောင့်အယှက် ဖြစ်စေ နိုင်တာကြောင့် ကုသမှုမခံယူဘဲနဲ့တော့ လစ်လျူရှုမထားသင့်ပါ။  အခုတော့ ကုသမှုနည်းလမ်းလည်း ရှိနေပြီ ဆိုတော့ ကိုယ်ခန္ဓာနာကျင်ဆင်းရဲမှုကို ကြိတ်မှိတ်သည်းခံနေစရာ အကြောင်းလည်း မရှိတော့ပါဘူး ဆိုတာ ရေးသား တင်ပြလိုက်ရပါတယ်။

ရောဂါအခြေအနေ ပိုမိုဆိုးရွားပြီး ကျန်းမာရေးကို ပြင်းထန်စွာ ထိခိုက်ခြင်းမဖြစ်မီ၊ စောစီးစွာ သိရှိကုသခြင်းသည်သာ အမြဲတမ်းအတွက် အကောင်းဆုံးဖြေရှင်းဖို့ နည်းလမ်းပဲ ဖြစ်ပါတယ်။
“အမျိုးသမီးများ ဘေးကင်းကျန်းမာဖို့ သားအိမ်တွင်းတစ်သျှူးများ သားအိမ်ပြင်ပသို့ရောက်နေခြင်း ကို စောစောသိရှိ ကုသကြပါစို့။”