အမြင်အာရုံကိုထိခိုက်စေတဲ့ မျက်စိအတွင်းတိမ်

• သင်ဟာ အမြင်ဝေဝါးခြင်း၊ အမြင်အာရုံကြည်လင်မှုမရှိခြင်း၊ အလင်းစူးရှမှု ကို မခံနိုင်ခြင်း၊ အမြင်မှားယွင်းခြင်း၊ မျက်စိအခြေအနေ အပြောင်းအလဲ များဖြစ်တဲ့ အဝေးမှုန်မှုမြင့်မားလာခြင်း(သို့) ယခင်က အနီးမှုန်ပြီး အဝေး ကြည့်ရင်မျက်မှန်တပ်ဖို့လိုအပ်သူများဟာ မျက်မှန်မတပ်ချိန်မှာ နဂိုအ တိုင်းပြန်မြင်နိုင်ခြင်း စတဲ့လက္ခဏာတွေဖြစ်နေပြီဆိုရင် ဒါဟာ မျက်စိ အတွင်းတိမ်(Cataract) ရဲ့ လက္ခဏာတွေဖြစ်ပါတယ်။
• မျက်စိအတွင်းတိမ်ဖြစ်စေတဲ့ အဓိကအကြောင်းအရင်းများကတော့ အသက် အရွယ်အိုမင်းလာခြင်း၊ တချို့ဆေးဝါးများ၊ နေရောင်ခြည်နဲ့အချိန် ကြာကြာ ထိတွေ့မှု၊ ဆေးလိပ်နဲ့ အရက်သောက်သုံးခြင်း၊ ဆီးချိုကဲ့သို့ တချို့ရောဂါ များ စတာတွေဖြစ်ပါတယ်။
• လက်ရှိမှာ မျက်စိအတွင်းတိမ်ကို ထိထိရောက်ရောက်ကုသဖို့ (သို့) အတွင်းတိမ်နဲ့ ဆက်စပ်နေတဲ့ရောဂါလက္ခဏာများကို လျှော့ချဖို့ မျက်စဉ်း (သို့)  ဆေးဝါး မရှိသေးပါဘူး။

မျက်စိထဲမှာရှိတဲ့ မှန်ဘီလူး (Lens) ဟာ ပုံရိပ်မြင်တွေ့မှုအဖြစ် ဦးနှောက်ဆီ အသိ ပေးဖို့အတွက် အလင်းကို မျက်စိအတွင်းလွှာ(Retina) ပေါ်ကို အာရုံစိုက်စေ ပါ တယ်။ အဆိုပါ မျက်လုံးရဲ့ Lens ဟာ တိမ် ပုံသဏ္ဍာန်ကဲ့သို့ အဖြူအနှစ်များ ဖြစ်လာတဲ့အခြေအနေကို အတွင်းတိမ်ဖြစ်ခြင်း(Cataract) လို့ခေါ်ပြီး အမြင်အာရုံ  ကြည်လင်ပြတ်သားမှုကို လျော့ကျလာစေပါတယ်။ မျက်စိတိမ်စွဲခြင်းကို အမျိုး အစားခွဲမယ်ဆိုရင် မျက်စိမှန်ဘီလူးအလယ်မှာတစ်ရှူးများမာလာခြင်း (Nuclear Sclerosis)၊ မျက်စိမှန်ဘီလူးအစွန်းမှာဖြစ်တဲ့အတွင်းတိမ်(Cortical)၊ မျက်စိမှန်ဘီလူး နောက်ကျောမှာဖြစ်တဲ့အတွင်းတိမ်(Posterior Subcapsular)၊ မျက်စိမှန်ဘီလူးအရှေ့မှာဖြစ်တဲ့အတွင်းတိမ်(Anterior Subcapsular)၊ မျက်စိ မှန်ဘီလူး အမျှင်များယိုယွင်းခြင်း(Polar) စတာတွေ ဖြစ်ပါတယ်။

အတွင်းတိမ်နဲ့ ဆက်စပ်နေတဲ့ လက္ခဏာတွေအများကြီးရှိပြီး အောက်ပါအတိုင်း ဖြစ်ပါတယ်။

၁။ အမြင်အာရုံယိုယွင်းလာခြင်း - လူနာများအနေနဲ့ ကိုယ့်ရဲ့နေ့စဉ်ဘဝကို ထိခိုက်စေတဲ့အထိ အမြင်အာရုံဝေဝါးခြင်းကို ခံစားရမှာဖြစ်ပါတယ်။ ဥပမာ - ကားမောင်းခြင်း၊ သင်္ကေတများကိုဖတ်ရှုခြင်း၊ စာဖတ်ခြင်းများအပြင် ပုံမှန် လှုပ်ရှားမှုများဖြစ်တဲ့ အတက်အဆင်းပြုလုပ်ခြင်း၊ အလုပ်လုပ်ခြင်း၊ လမ်းထွက် လျှောက်ခြင်း စတာတွေကို ထိခိုက်စေမှာဖြစ်ပါတယ်။ မျက်စိမြင်နိုင်စွမ်းရည် (Visual Acuity Assessment) စစ်ဆေးတဲ့သူများအနေနဲ့လည်း အမြင်အာရုံ ယိုယွင်းလာနိုင်ခြေရှိပါတယ်။ အတွင်းတိမ်အမျိုးအစားတစ်ခုခြင်းစီဟာ ရရှိတဲ့ အလင်းရောင်နဲ့ မျက်စိသူငယ်အိမ်(Pupil)အရွယ်အစားအပေါ်မူတည်ပြီး အမြင်အာရုံကိုထိခိုက်မှုရှိစေမှာဖြစ်ပါတယ်။ အရွယ်အစားသေးငယ်ပေမယ့် လည်း မျက်စိမှန်ဘီလူး နောက်ကျောမှာဖြစ်တဲ့အတွင်းတိမ်(Posterior Subcapsular Cataracts)ဟာ စာဖတ်တဲ့အချိန်မျိုးမှာ အနီးမှုန်ခြင်းကို ခံစား ရနိုင်ပြီး အဝေးမှုန်နဲ့ အရောင်မကွဲပြားခြင်း ပြဿနာ အနည်းငယ်ဖြစ်နိုင် ခြေ ရှိခြင်း (သို့) လုံးဝမဖြစ်နိုင်ပါဘူး။  မျက်စိမှန်ဘီလူးအလယ်မှာဖြစ်တဲ့ အတွင်း တိမ် (Nuclear Cataracts) အနီးမှုန်ခြင်းထက်စာရင် လူတစ်ယောက် အတွက် အရောင်မကွဲပြားခြင်းကို ဖြစ်စေတဲ့ အဝေးမှုန်ခြင်း ကို ဖြစ်စေပါ တယ်။

၂။ အလင်းစူးရှမှုကိုမခံနိုင်ခြင်း(Increased Glare) - အတွင်းတိမ်ရှိတဲ့သူများ ဟာ နေရောင်ခြည်နဲ့တိုက်ရိုက်ထိတွေ့တဲ့အချိန်မျိုး(သို့) ကားမောင်းနေစဉ် မီးအလင်းတန်းနဲ့ ကြုံရတဲ့အခါမှာ ပိုပြီးတော့ မခံမရပ်နိုင်ဖြစ်လေ့ရှိပါတယ်။ အထူးသဖြင့် မျက်စိမှန်ဘီလူး နောက်ကျောမှာဖြစ်တဲ့အတွင်းတိမ်(Posterior Subcapsular Cataracts) သမားတွေမှာ ပိုပြီးဖြစ်နိုင်ပါတယ်။

၃ ။အမြင်ကြည်လင်ပြတ်သားမှုအားနည်းခြင်း(သို့)လုံးဝမရှိခြင်း။

၄။ အနီးမှုန်ခြင်းမြင့်မားလာပြီးအမြင်ပြောင်းလဲခြင်း - ယခင်က အဝေးမှုန် နဲ့ အနီးမှုန်မဖြစ်ဘဲ သာမန်အနေအထားအတိုင်းရှိခဲ့ပြီး မျက်မှန်တပ်ဖို့လည်း မလိုအပ်ခဲ့သူများဟာ မျက်စိမှန်ဘီလူး အလယ်မှာတစ်ရှူးများမာလာခြင်း (Nuclear Sclerosis)ခံစားရတဲ့အချိန်မှာ အမြင်ပြောင်းလဲခြင်းဖြစ်နိုင်ပါတယ်။ ဒါပေမယ့်လည်း အတွင်းတိမ်ဟာ အမြင်ယိုယွင်းခြင်းကိုဖြစ်စေပြီး အနီးမှုန် စေပါတယ်။ ဒါကြောင့် အဝေးမှုန်သမားများ၊ အဝေးကိုကြည့်မယ်ဆိုရင်မျက်မှန် တပ်ဖို့လိုသူများ အနေနဲ့ သူတို့ရဲ့အမြင်အာရုံဟာ မျက်မှန်တပ်ဖို့ မလိုဘဲ နဂို အတိုင်းပြန်ဖြစ်သွားသလား ဆိုတာကို ဆန်းစစ်ဖို့လိုပါတယ်။

၅။အမြင်အာရုံလွဲမှားခြင်း(Disorted Vision) - တစ်ခါတစ်လေမှာ အတွင်းတိမ် ကြောင့် အမြင်အာရုံလွဲမှားခြင်း(သို့)မြင်ကွင်းနှစ်ထပ်ဖြစ်ခြင်း ကို ကြုံတွေ့ရ နိုင်ပါတယ်။ ဒါပေမယ့် အမြင်အာရုံလွဲမှားခြင်းဟာ ဦးနှောက်သွေးကြောပြတ် ပြတ်ခြင်း(Cranial Nerve Paralysis) လို ပိုအန္တရာယ်ရှိတဲ့ ကျန်းမာရေး ပြဿနာဖြစ်စေတယ်ဆိုတာကို သိထားရပါမယ်။ ဒီလိုလက္ခဏာမျိုး ခံစားနေရ ပြီဆိုရင် မျက်စိအထူးကုဆရာဝန်နဲ့ မြန်နိုင်သမျှ အမြန်ဆုံး တွေ့ဆုံဆွေးနွေး သင့်ပါတယ်။

ဘယ်လိုကျန်းမာရေးပြဿနာမျိုးဖြစ်စေ ကြိုတင်ကာကွယ်ခြင်းဟာ ကုသခြင်း ထက်ပိုမိုကောင်းမွန်တဲ့ နည်းလမ်းတစ်ခုဖြစ်ပါတယ်။ ဒါကြောင့် အတွင်းတိမ် ဖြစ်စေတဲ့အဓိကအကြောင်းအရင်းများကို ကောင်းစွာသိရှိထားဖို့လိုပါတယ်။

၁။ အသက်အရွယ် - မျက်စိမှန်ဘီလူးများဟာ အသက်အရွယ် ရလာတာနဲ့ အမျှ ယိုယွင်းလာပါတယ်။ မျက်စိမှာပါဝင်တဲ့ ပရိုတိန်းများကို ထိခိုက်စေတဲ့ ဓာတ်အပြောင်းအလဲများကြောင့် ပိုထူလာပြီး ပိုမိုမာကျောလာပါတယ်။

၂။ အောက်မှာဖော်ပြထားတဲ့တချို့သောဆေးဝါးများကြောင့်လည်း ဖြစ်တတ် ပါတယ်။

• စတီးရွိုက်ဆေးများ၊ တရုတ်တိုင်းရင်းဆေးများ၊ တိုင်းရင်းဆေးများ၊ တစ်ကြိမ်တည်းမှာအများကြီးအသုံးပြုရသည့်ဆေးများ(Bolus Drugs)၊ စတီးရွိုက်ပါဝင်တဲ့သဘာဝဆေးများ။
• Phenothiazine အမျိုးအစား စိတ်ကိုပြောင်းလဲစေသည့်ဆေးများ။
• နှလုံးခုန်နှုန်းကိုလျော့ကျစေသည့်ဆေးများ(Atropine Blocker)။
• Beta ကိုတားဆီးပေးသည့်ဆေးများ(Beta Blockers)။
• သွေးတွင်းအဆီကျဆေးများကို လွန်ကဲစွာသောက်သုံးခြင်း။
• ရင်သားကင်ဆာအတွက်သောက်ရသည့် Tamoxifen ဆေး။

ဒါကြောင့် ကျွန်တော်တို့အနေနဲ့ ကိုယ့် ခန္ဓာကိုယ်ကို သေချာဂရုတစိုက် စောင့်ရှောက်ဖို့လိုပါတယ်။ ဒါဆိုရင် အတွင်းတိမ်ဖြစ်စေတဲ့ တချို့ဆေးဝါးများကို ရှောင်ရှားနိုင်မှာဖြစ်ပါတယ်။

၃။ ခရမ်းလွန်ရောင်ခြည် - ခရမ်းလွန်ရောင်ခြည်နဲ့ထိတွေ့မှုများတဲ့အခါမှာ  မျက်စိမှန်ဘီလူးအစွန်းမှာဖြစ်တဲ့အတွင်းတိမ်(Cortical) ဖြစ်နိုင်ခြေများ ပါတယ်။ ဒါကိုလျှော့ချဖို့အတွက် နေပူထဲထွက်တဲ့အခါမှာ နေကာမျက်မှန် တပ်ခြင်း၊ အနားစွန်းကျယ်တဲ့ဦးထုပ်ဆောင်းခြင်းများကို လုပ်ဆောင်သင့် ပါတယ်။

၄။ ဆေးလိပ်သောက်ခြင်း။

၅။ အရက်သောက်နှုန်းများခြင်း။

၆။ တချို့သောရောဂါများဟာလည်း အတွင်းတိမ်ဖြစ်ခြင်းနဲ့ ဆက်စပ် နေပါ တယ်။

• ဆီးချို - သွေးတွင်းသကြားဓာတ်မြင့်မားမှုနဲ့ ဆီးချိုကို မထိန်းသိမ်း နိုင်ခြင်းဟာ အတွင်းတိမ်ဖြစ်နိုင်ခြေကို မြင့်မားစေပါတယ်။
• Galactose ဓာတ်အားအသုံးမပြုနိုင်သည့် ရောဂါ (Galactosemia Disease)။
• အသည်း၊ ဦးနှောက်နှင့် တခြားအစိတ်အပိုင်းများတွင် Copper ဓာတ်များစုပုံလာစေသည့်ရောဂါ (Wilson Disease)။
• ကယ်လ်ဆီယမ်ဓာတ်ချို့တဲ့ခြင်း။
• ကြွက်သားကြုံလှီခြင်း(Myotonic Dystrophy)။
• နှင်းခူ (Atopic Dermatitis)။
• သွေးကြောရောင်ရမ်ခြင်းရောဂါတစ်မျိုး(Takayasu Arteritis)။

၇။ မျက်စိထိခိုက်မှုအပါအဝင် မတော်မဆထိခိုက်မှုများ - မျက်စိထဲကို ကျောက်ခဲ(သို့)တခြားသတ္တုပစ္စည်းများနဲ့ ထိခိုက်မိမယ်ဆိုရင် အတွင်းတိမ် ကိုသာမက မျက်စိကိုပါထိခိုက်စေပြီး အမြင်အာရုံကို အချိန်ကြာမြင့်စွာ ဆိုးရွား စေသည်အထိဖြစ်နိုင်ပါတယ်။

၈ ။ ဓာတ်ရောင်ခြည်နှင့်ထိတွေ့မှုရှိခြင်း။ ကင်ဆာရောဂါလူနာလိုမျိုး ဦးခေါင်းကို ဓာတ်ရောင်ခြည်နဲ့ ထိတွေ့မှုရှိသူများဟာလည်း အတွင်းတိမ် ဖြစ်နိုင်ခြေများပါတယ်။

၉ ။ အယ်ကာလိုင်းပစ္စည်းများအပါအဝင် ဓာတုပစ္စည်းများဟာ မျက်စိထဲကို ဝင်ပြီး မျက်ဆန်နဲ့ မှန်ဘီလူးတို့ကို ဖြတ်သန်းသွားတဲ့အခါမှာ အတွင်းတိမ် ဖြစ်နိုင်ပါတယ်။

၁၀။ ဓာတ်လိုက်ခြင်း။

၁၁ ။ မျက်စိနှင့်ပတ်သက်သည့်အောက်ပါလက္ခဏာများ -

• မျက်စိနံရံရှိအလယ်လွှာရောင်ခြင်း (Uveitis)။
• မျက်စိအလွှာကွာကျခြင်း(Exfoliation Syndrome)။
• မျက်စိမှန်ဘီလူးနှင့် မျက်စိအတွင်းလွှာကြားအရည်(Vitreous) (သို့) မျက်စိအတွင်းလွှာ ခွဲစိတ်ကုသမှုခံယူခဲ့ဖူးသူများ။
• မျက်စိအရှေ့ပိုင်းကိုသွေးပို့လွှတ်မှုမရှိခြင်း(ASI)။
• အမြင်အာရုံယိုယွင်းသည့်ရောဂါတစ်မျိုး(Retinitis Pigmentosa)။
• မျက်စိသွေးပေါင်ချိန်ကျခြင်း (6mm/Hg အောက်လျော့နည်းခြင်း)။

အခုဆိုရင် အတွင်းတိမ်ဖြစ်စေတဲ့ အကြောင်းအရင်းများကိုသိခဲ့ပြီးဖြစ်ပါတယ်။ အထက်မှာဖော်ပြခဲ့တဲ့အချက်တွေကိုကြည့်မယ်ဆိုရင် အသက်အရွယ် ဆိုတဲ့ တစ်ချက်တည်းကိုသာလျှင် ကျွန်တော်တို့ မထိန်းချုပ်နိုင်တာဖြစ်ပါတယ်။ တခြား အကြောင်းအရင်းတွေကိုတော့ ကျွန်တော်တို့အနေနဲ့ ရှောင်လွှဲနိုင်ပါတယ်။ ဆေးလိပ်မသောက်ဘူး၊ ပုံမှန်အရက်သောက်ခြင်းကိုလျှော့ချမယ်၊ အဝကျယ်တဲ့ ဦးထုပ်ဆောင်းပြီး နေကာမျက်မှန်တပ်ခြင်းဖြင့် ခရမ်းလွန်ရောင်ခြည် ထိတွေ့မှုကို လျှော့ချမယ်၊ အန္တရာယ်ရှိတဲ့ ကြီးကြီးမားမားရောဂါတွေ မဖြစ်အောင် ကိုယ့်ကိုယ် ကို ဂရုပြုနေထိုင်မယ်ဆိုရင် အတွင်းတိမ်ရောဂါကို ကာကွယ်နိုင်မှာဖြစ်ပါတယ်။ တကယ်လို့ သင်ဟာ ဆီးချိုရောဂါခံစားနေရသူတစ်ယောက်ဖြစ်နေခဲ့မယ်ဆိုရင် သွေးတွင်းသကြားဓာတ်ကို အမြဲတမ်း ဂရုတစိုက်ထိန်းသိမ်းပြီး မလိုအပ်တဲ့ ဆေးတွေကို မသောက်ဖို့ အကြံပြုပါရစေ။ ပြီးတော့ လက်ရှိမှာ မျက်စိနဲ့ ပတ်သက်တဲ့ ရောဂါတစ်ခုခုကို ခံစားနေရတယ်ဆိုရင်လည်း မျက်စိအထူး ကုဆရာဝန်နဲ့ ပုံမှန်ပြသပြီး ဆွေးနွေးတိုင်ပင်သင့်ပါတယ်။

အတွင်းတိမ်ရောဂါကိုရှာဖွေစစ်ဆေးခြင်း

မျက်စိအတွင်းတိမ်ရောဂါကို ရှာဖွေစစ်ဆေးမယ်ဆိုရင် လိုအပ်တဲ့ ကုသမှုကို စနစ်တကျလမ်းညွှန်မှုပေးနိုင်တဲ့  မျက်စိအထူးကုဆရာဝန်နဲ့ စစ်ဆေးသင့် ပါတယ်။

အတွင်းတိမ်ကြောင့်ဖြစ်တဲ့ရောဂါလက္ခဏာတွေကိုလျှော့ချဖို့ (သို့) ထိထိ ရောက်ရောက်ကုသဖို့ လက်ရှိချိန်မှာ ဆေးနဲ့ မျက်စဉ်း မရှိသေးပါဘူး။ အတွင်းတိမ်ကို ကုသနိုင်တဲ့ အဓိက နည်းလမ်းကတော့ ခွဲစိတ်ကုသခြင်း ဖြစ်ပါတယ်။

အတွင်းတိမ်ကို ခွဲစိတ်ကုသမှုမလုပ်ခင်မှာ အောက်ပါအချက်တွေကို လည်း ထည့် သွင်းစဉ်းစားရပါမယ်။

• အတွင်းတိမ်ဟာ လူနာအတွက် နေ့စဉ်ဘဝမှာ ထိခိုက်မှုရှိစေတယ်ဆိုတာ ကို သိထားရပါမယ်။
• အတွင်းတိမ် ဖြစ်ပြီဆိုရင် လူနာအနေနဲ့ ဆက်စပ်ရောဂါဖြစ်တဲ့ မျက်စိရေ တိမ်(Glaucoma) ဖြစ်နိုင်ခြေများတယ်ဆိုတာကိုလည်း မမေ့ပါနဲ့။
• အတွင်းတိမ်ဟာ ထိရောက်တဲ့မျက်စိစမ်းသပ်မှုကို အဟန့်အတား ဖြစ်စေပါ တယ်။ ဥပမာ - မျက်စိအတွင်းလွှာစစ်ဆေးမှုလိုအပ်တဲ့ ဆီးချိုသမားများ အနေနဲ့ ရောဂါဟာ ဒီနေရာကို ပျံ့နှံ့နေပြီလားဆိုတာကိုပါ သိဖို့ စစ်ဆေး ရပါတယ်။ မျက်လုံးမှန်ဘီလူးဟာ တိမ်ဖြစ်နေတယ်ဆိုရင် သေချာစစ်ဆေး လို့မရတာကြောင့် တိမ် ကိုဖယ်ရှားဖို့ ခွဲစိတ်ကုသရပါ မယ်။

လက်ရှိအချိန်မှာ အတွင်းတိမ်ကိုခွဲစိတ်ကုသဖို့အတွက် ခေတ်မီစက်ကိရိယာများ ကိုသုံးပြီးလုပ်ဆောင်တဲ့ ထိုးဖောက်မှုအနည်းဆုံးအတွင်းတိမ်ခွဲစိတ်မှု(Minimally Invasive Cataract Surgery) နည်းလမ်းကို လုပ်ဆောင်ကြ ပါတယ်။ မျက်ကြည် လွှာပေါ်မှာ ကိရိယာကို ထည့်သွင်းလိုက်ပြီးနောက် ပျက်စီးနေတဲ့ မှန်ဘီလူးကို ဖယ်ထုတ်ပြီး အစားထိုးလဲလှယ်မှာဖြစ်ပါတယ်။ ဒီခွဲစိတ်ကုသမှုဟာ မိနစ်(၃၀)- (၁) နာရီလောက်ပဲကြာပါတယ်။ ခွဲစိတ်ကုသနေစဉ် အတွင်း လူနာရဲ့ခေါင်းကို အဝတ်စနဲ့ ကာထားမှာဖြစ်ပါတယ်။ ဒါပေမယ့် အတွင်း တိမ်ကိုဖယ်ထုတ်ရာမှာ ကိရိယာကထွက်တဲ့ အသံကို ကြားနေရမှာဖြစ်ပါတယ်။ အရေးကြီးတာက လူနာအနေနဲ့ ခွဲစိတ်မှုမတိုင်ခင်မှာ မျက်စိစစ်ဆေးမှုပြုလုပ် ထားဖို့လိုပြီး မျက်စိစစ်ဆေးမှု၊ မျက်ဆန်ချဲ့ခြင်း စစ်ဆေးမှု(Pupil Dilation Test)၊ မျက်စိဖိအားစစ်ဆေးမှု၊  မျက်ကြည်လွှာအခုံးစစ်ဆေးမှု၊ မျက်စိအလျားတိုင်း တာ ခြင်း၊ မှန်ဘီလူးတိုင်းတာမှု စသည်တို့ကို မျက်စိအထူးကု ဆရာဝန်နဲ့အတူ လုပ်ဆောင်ရမှာဖြစ်ပါတယ်။ တချို့လူနာတွေအနေနဲ့ မျက်ကြည်လွှာ အတွင်းရှိ ဆဲလ်များကိုရေတွက်ခြင်း(Endothelial Cell Count)နဲ့ မျက်ကြည်လွှာ အထူစစ် ဆေးမှု(Corneal Thickness Analysis) များကိုပါလုပ်ဆောင်ဖို့ လိုပါ တယ်။

အတွင်းတိမ်ခွဲစိတ်မှုအတွက်ပြင်ဆင်ခြင်း

အတွင်းတိမ် မခွဲခင်(၇)ရက် အတွင်း သွေးခဲခြင်းကို ထိခိုက်စေတဲ့ ဆေးများ သောက်ခြင်းကို ကြိုရှောင်ထားရပါမယ်။ ဒါပမယ့်လည်း ဒီလိုဆုံးဖြတ်ချက်များဟာ ဆရာဝန်ရဲ့ ညွှန်ကြားချက်အတိုင်းဖြစ်ဖို့တော့လိုပါတယ်။ ခွဲစိတ်ကုသမယ့်နေမှာ လူနာဟာ ရေချိုးခေါင်းလျှော်ထားပြီး တစ်ကိုယ်ရည်သန့်ရှင်းမှုကို သေချာပြင်ဆင် ထားဖို့ အကြံပေးချင်ပါတယ်။ မျက်နှာမှာမိတ်ကပ်လိမ်းထားတာမျိုးကိုလည်း ရှောင်ကျဉ်ရပါမယ်။

ခွဲစိတ်ကုသပြီးနောက်လိုက်နာရမည့်အချက်များ

ခွဲစိတ်ပြီးနောက်မှာ မျက်စိကို အဖုံးနဲ့ ကာထားမှာဖြစ်ပြီး (၇) အတွင်း မျက်စိထဲ ကို ရေမဝင်အောင် ဂရုစိုက်ရပါမယ်။ ခွဲစိတ်ပြီးပထမဆုံး ညမှာမျက်စိကို အပြည့် ဖုံးအုပ်ထားဖို့လိုပြီး နောက်တစ်နေ့မနက်မှာတော့ မျက်စဉ်းခတ်ရမှာ ဖြစ်ပါတယ်။ မမျှော်လင့်ဘဲ မျက်စိထဲ ရေဝင်ခြင်းမှ ကာကွယ်ဖို့အတွက် မျက်နှာကို သန့်ရှင်း တဲ့ အဝတ်စအသုံးပြုပြီး သုတ်ပါ။ အနည်းဆုံး(၁)လအတွင်း ရေမကူးရပါဘူး။ ဖုန်မှုန့်၊ အညစ်အကြေးနဲ့ မီးခိုးငွေ့ များ မျက်စိထဲမဝင်စေဖို့ ဂရုစိုက်ရပါမယ်။ ဒါ့အပြင် အားစိုက်ရတဲ့လေ့ကျင့်ခန်း များ၊ ချောင်းဆိုးခြင်း၊ နှာချေခြင်း၊ အားစိုက်ညှစ်ခြင်း၊ မျက်စိပွတ်ခြင်းများကို လည်း လုပ်လို့မရပါဘူး။ အဖုံး အသုံးပြုကာ မျက်စိကို အနည်းဆုံး(၇)ရက် ကာကွယ် ထားဖို့လိုပြီး အထူးသဖြင့်အိပ်စက်ချိန်များမှာ ပိုဂရုစိုက်ရပါမယ်။

နေ့ဘက် နေရောင်ခြည် ရှိတဲ့အချိန်အတွင်းမှာ နေကာမျက်မှန်တပ်ထားဖို့ အကြံ ပေးပါရစေ။ နေ့စဉ်လုပ်ဆောင်မှုများကိုပုံမှန်အတိုင်းလုပ်နိုင်ပါတယ်။ ဒါပေမယ့် ဆရာဝန်ညွှန်ကြားထားတဲ့ ဆေးနဲ့ မျက်စဉ်းများကို အချိန်မှန် လိုက်နာ အသုံးပြု ဖို့လိုအပ်သလို ပြန်ပြရမယ့်ရက်ချိန်းများမှာလည်း ဒီဆေးတွေကို ယူဆောင်သွား ပါ။ အမြင်ဝေဝါးခြင်း၊ မျက်စိအောင့်ခြင်း၊ မျက်စိနီရဲခြင်း စတဲ့ အခြေအနေတစ်ခုခု ဖြစ်ပေါ်ခဲ့မယ်ဆိုရင် ဆရာဝန်နဲ့အမြန်ဆုံးပြသရမှာဖြစ်ပါတယ်။

အသက်အရွယ်ကြီးရင့်လာမှုအပါအဝင် မျက်စိအတွင်းတိမ်ကို ဆိုးရွားလာစေတဲ့ တချို့ သော အကြောင်းအရင်းများဟာ ရှောင်လွှဲလို့မရပါဘူး။ ဒါပေမယ့် မျက်စိ တိမ်စွဲခြင်းကို ကာကွယ်န်ိုင်တဲ့ တချို့နည်းလမ်းတွေကို လိုက်နာလို့ ရပါတယ်။ ရုပ်ပိုင်းဆိုင်ရာကျန်းမာရေးကို အမြဲဂရုစိုက်ခြင်း၊ ဆရာဝန်နဲ့ အမြဲတမ်း ဆွေးနွေး တိုင်ပင်ခြင်း၊ မျက်စိတစ်ခုခုဖြစ်တာနဲ့ ဆရာဝန်နဲ့ ပြသခြင်း စတဲ့ နည်းလမ်းတွေ ဟာ ကာကွယ်နိုင်တဲ့နည်းလမ်းတွေဖြစ်ပါတယ်။

တကယ်လို့ သင်ဟာ အတွင်းတိမ်ရှိနေပြီ(သို့) အမြင်အာရုံမူမမှန်မှုတွေရှိနေပြီ ဆိုရင် ရောဂါရှာဖွေပြီး သေချာကုသရပါမယ်။ ကုသမှုမတိုင်ခင်ရော ကုသမှုအပြီး မှာပါ ဆရာဝန်ညွှန်ကြားချက်များကို သေချာလိုက်နာဆောင်ရွက်ရပါမယ်။ ဒါဆိုရင် ကုသမှုဟာပိုပြီးထိရောက်မှာဖြစ်သလို နောက်ဆက်တွဲရောဂါပြဿနာ ဖြစ်နိုင်ခြေများကိုလည်း ကာကွယ်ပြီးသားဖြစ်မှာပါ။