လုပ်ငန်းခွင်မှာ ကျား မ မရွေးခံစားရလေ့ရှိတဲ့ခါးနာခြင်းဝေဒနာ

• ကွန်ပျူတာမျက်နှာပြင်ကိုကြည့်ဖို့အတွက် ခန္ဓာကိုယ်ကို အရှေ့ဘက် ကိုင်းညွတ်မှုများခြင်းဟာ ကျောရိုးအပေါ်ဖိအားမြင့်တက်စေပြီး (၂.၅) စင်တီမီတာတိုင်းမှာ (၄.၅)ကီလိုဂရမ်သက်ရောက်စေကာ ခါးနာခြင်းကို ခံစားရစေပါတယ်။
• နှိပ်နယ်ခြင်းဟာ ကြွက်သားနာကျင်ကိုက်ခဲခြင်းကို သက်သာစေတဲ့ နည်းလမ်းတစ်မျိုးဖြစ်ပါတယ်။ ဒါပေမယ့်လည်း နှိပ်မယ်ဆိုရင် နှိပ်ပေးမယ့် သူနဲ့  နှိပ်မယ့်နေရာဟာ မှန်ကန်ဖို့နဲ့  အရည်အချင်းပြည့်ဝနေဖို့ အရေးကြီးပါတယ်။
• တကယ်လို့ခါးနာတာက ပိုမိုပြင်းထန်လာပြီး (၃)ရက် - (၄)ရက်လောက် အထိကြာမယ်ဆိုရင် ရောဂါရှာဖွေဖို့နဲ့ သေချာကုသဖို့အတွက် ဆရာဝန်နဲ့ ဆွေးနွေးတိုင်ပင်သင့်ပါတယ်။

အလုပ် လုပ်ကိုင်နေကြတဲ့ဝန်ထမ်းများ အထူးသဖြင့် ရုံးမှာထိုင်ပြီးလုပ်ကြရတဲ့ ဝန်ထမ်းအများစုဟာ ခါးနာခြင်းကို ခံစားရလေ့ရှိပါတယ်။ အဓိက ကတော့ ခုံမှာအကြာကြီးထိုင်ပြီး ရုံးအလုပ်များလုပ်ရခြင်းကြောင့်ဖြစ်ပါတယ်။ မကြာခဏ ဆိုသလို မမှန်ကန်တဲ့ပုံစံနဲ့ ကြာရှည်စွာထိုင်မိပြီး အလုပ်ကနေရလာတဲ့ စိတ်ဖိစီးမှု နဲ့ ပေါင်းစပ်လိုက်တဲ့အခါ ပုခုံးနဲ့ လည်ပင်းတွေ တောင့်တင်းလာပါတယ်။ ဒီတောင့် တင်းမှုဟာ ခါး အထိ ပျံ့နှံ့သွားပါတယ်။ ဒါပေမယ့်လည်း အနည်းငယ် ပြုပြင် ပြောင်းလဲမှုများနဲ့ အတူ ဘယ်လိုထိုင်ရမယ် ဘယ်လိုမထိုင်ရဘူး ဆိုတာကို သိရင် ခါးနာခြင်းကို သက်သာစေမှာဖြစ်ပါတယ်။

 ထိုင်တဲ့ပုံစံနဲ့ ထိုင်ခုံအမြင့်

သင့်အနေနဲ့ ကိုယ့်ကိုယ်ကို မတ်မတ်ထိုင်နိုင်အောင်အလေ့အကျင့်လုပ်ပါ။ ဒါဟာ မှန်ကန်စွာထိုင်တဲ့ပုံစံဖြစ်ပြီး ခန္ဓာကိုယ်ရဲ့အလေးချိန်အားလုံးကို အောက်ခြေဆီ သက်ရောက်စေကာ နောက်ကျောဟာလည်း ထိုင်ခုံနဲ့ မြဲမြံစွာ ရှိနေစေမှာပါ။ ဒါ့အပြင် ကိုယ်ထိုင်တဲ့ ထိုင်ခုံအမြင့်ကိုလည်း စားပွဲခုံနဲ့  ကိုက်ညီမှုရှိနေစေဖို့ အရေးကြီးပါတယ်။ စားပွဲခုံဟာ အရမ်းမမြင့်လွန်း အရမ်းမနိမ့်လွန်းတဲ့ အနေအထားမှာရှိနေဖို့လိုပြီး ဒါဟာ ခါးနာစေတဲ့ အဓိကအကြောင်းအရင်း တစ်ခုဖြစ်ပါတယ်။

ကွန်ပျူတာဖန်သားပြင်အမြင့်

ကွန်ပျူတာမျက်နှာပြင်ကို မျက်စိနဲ့ တစ်တန်းတည်းဖြစ်နေရပါမယ်။  ပုခုံးကိုအမြင့်ကြီး မ ထားတာမျိုးမဖြစ်စေဖို့နဲ့ ကျောကို အရှေ့ဆီ ကိုင်းမနေစေဖို့ ကွန်ပျူတာ ကီးဘုတ်နဲ့ မောက်စ် ကို အနည်းငယ်နှိမ့်ထားဖို့လိုပါတယ်။ မျက်စိ အားမစိုက်ရစေဖို့ ကွန်ပျူတာမျက်နှာပြင်အလင်းကို ချိန်ညှိထားမယ်ဆိုရင်  စိတ်ဖိစီးမှု ကိုလျော့ကျစေမှာဖြစ်ပါတယ်။

ခြေဖဝါးနေရာချမှု

ထိုင်ခုံရဲ့အမြင့်နဲ့ စားပွဲရဲ့ အမြင့် ကို ချိန်ညှိပြီးပြီဆိုရင် ခြေဖဝါးအနေအထားကို ကြည့်ရပါမယ်။ တကယ်လို့ ခြေဖဝါးနှစ်ဖက်က လေထဲမှာ တွဲလောင်းကျနေတယ် ဆိုရင် ခြေတင်ဖို့အတွက် တစ်ခုခုရှာရပါမယ်။ တောင့်တင်းတဲ့ ပုံးတစ်ပုံး၊ စာအုပ် အဟောင်းတစ်အုပ် (သို့) ခြေဖဝါးနှစ်ဖက်ကို သာမန်အမြင့်အတိုင်းရှိနေစေမယ့် အရာတစ်ခုခုကို အသုံးပြုရပါမယ်။ မြင်သာအောင်ပြောရမယ်ဆိုရင် ခြေဖဝါးနှစ်ဖက်ဟာ ထိုင်ခုံပေါ်ကနေ တွဲလောင်း မကျနေသင့်သလို ဒူးနှစ်ဖက် ဟာလည်း အရမ်းကြီးကားမနေသင့်ပါဘူး။

လှုပ်ရှားခြင်း

ပုံစံအနေအထားကို အပြောင်းအလဲလုပ်ဖို့ကြိုးစားပြီး ခန္ဓာကိုယ်ကို မကြာခဏ လှုပ်ရှားမှုပြုလုပ်ပေးပါ။ ကြွက်သားများပြေလျော့ဖို့အတွက် တစ်နာရီခြားတစ်ခါ မတ်တပ်ရပ် လမ်းလျှောက်ပေးပါ။ သန့်စင်ခန်းသွားခြင်း၊ ရေထသောက်ခြင်း၊ အထက်လူကြီးနှင့်စကားသွားပြောခြင်း၊ လုပ်ဖော်ကိုင်ဖက်များနဲ့ စကားစမြည် ပြောခြင်း စတာတွေကိုလုပ်ဆောင်ပေးလို့ရပါတယ်။

တင်ပါးကြွက်သားများကိုအညောင်းဆန့်ခြင်း

အချိန်အကြာကြီးထိုင်နေရသူတွေဟာ ခါးနာခြင်းကို မကြာခဏခံစားရလေ့ရှိပါ တယ်။ နာရီနဲ့ချီအောင်ထိုင်မယ်ဆိုရင် တင်ပါးကိုအကွေးအဆန့်လုပ်ပေးတဲ့ ကြွက်သားအစု (Hip Flexor Muscle) ကို အရှေ့ဘက် သို့ ကိုင်းညွတ်ရာမှ တစ်ဆင့် အများကြီးကျုံ့သွားပြီး နောက်ဆုံးမှာ လှုပ်ရှားလို့မရတဲ့အထိ ဖြစ်သွား ပါတယ်။ အဲဒီနောက် ကျွန်တော်တို့ မတ်တပ်ရပ်လိုက်တဲ့အခါမှာ ကျောရိုးအောက်ပိုင်းမှာ ရှိနေတဲ့ အရိုးများဟာ သူ့ရဲ့ ပုံစံကနေ ဆွဲဆန့်လိုက်သလို ဖြစ်သွားပါတယ်။ အကျိုးဆက်အနေနဲ့ ခါးနာနိုင်ပါတယ်။ ဒူးတစ်ဝက် အကွေးအဆန့် လုပ်သလိုမျိုး ကြွက်သားအကွေးအဆန့်လုပ်ခြင်းဟာ ဒါကို ကူညီနိုင်ပါတယ် ။ အကွေး အဆန့် လုပ်နိုင်တဲ့နည်းလမ်းတစ်ခုကတော့ ခြေထောက်ကို ကိုယ်ဆန့်ချင်တဲ့ ဘက်မှာ ထားပြီး တစ်ခြားခြေထောက်တစ်ဖက်ကို အရှေ့ ဘက်ဆီဆန့်ထုတ်လိုက် တာ ဖြစ်ပါတယ်။ အဲ့ဒီနောက် ဆန့်ကျင်ဘက်တင်ပါးမှာ တင်းကျပ်စွာခံစားရသည်အထိ  ကိုယ်အလေးချိန်ကို ခြေထောက်ပေါ်ထားရမှာဖြစ်ပါတယ်။ ကျောရိုးအောက်ပိုင်းမှာ တင်းကျပ်မှုကို အနည်းငယ်ခံစားရနိုင်ပေမယ့် နာကျင်တဲ့အထိ မဖြစ်စေသင့်ပါဘူး။

ခြေထောက်ချိတ်မထိုင်ပါနဲ့

ခြေထောက်ချိတ်ထိုင်ခြင်းဟာ နောက်ကျောနဲ့ ကျောရိုးကို ကွေးသွားစေ (သို့) လိမ်သွားစေပါတယ်။ ဒါဟာ တင်ပါးတစ်ဖက်ကို တစ်ခြားတစ်ဖက်ထက် မြင့်သွားစေ ပြီး ခါးနာခြင်းကို ခံစားရနိုင်ပါတယ်။

ခုံမှာထိုင်နေရင်းရှေ့ကိုမကိုင်းပါနဲ့

ခေါင်းကိုရှေ့ဘက်ကိုင်းပြီးထိုင်ခြင်း (သို့) ခေါင်းကို ကွန်ပျူတာဖန်သားပြင်နဲ့  အချိန်ကြာကြာ နီးကပ်စွာထားပြီးထိုင်ခြင်းဟာ ပင်မကျောရိုးပေါ်ကို ဖိအား သက်ရောက်စေပါတယ်။ တစ်ခါတစ်လေ ဒီလိုထိုင်မိတာ ကိုယ့်ကိုယ်ကို သတိ မထားမိတတ်ပါဘူး။ ရှေ့ကို (၂.၅)စင်တီမီတာ ကိုင်းမိတိုင်း ဖိအား (၄.၅) ကီလိုဂရမ် သက်ရောက်စေပါတယ်။

ပုခုံးကိုကုပ်ပြီးမထိုင်ပါနဲ့

ကျောရိုးကိုကွေးထိုင်ပြီး ပုခုံးများကို ကုပ်ထားတာဟာ ပုခုံးသာမက လည်ပင်းကို ပါ နာကျင်စေပါတယ်။ ဒီလိုထိုင်ခြင်းဟာ ခါးနာစေပြီး တစ်ကိုယ်လုံးကို ပျံ့နှံ့သွားစေ ပါတယ်။

ကျောမှီမပါတဲ့ထိုင်ခုံမှာမထိုင်ပါနဲ့

ကျောမီမပါတဲ့ ထိုင်ခုံနဲ့ထိုင်မယ်ဆိုရင် ကျောဘက်ဟာ တစ်ချိန်လုံး အလုပ် လုပ်နေသလိုဖြစ်ပြီး တည့်မတ်စွာမထိုင်နိုင်ခြင်း၊ အလွယ်တကူပုံစံမပြောင်း နိုင်ခြင်း စတာတွေကို ကြုံတွေ့ရနိုင်ပါတယ်။ ဒါဆိုရင် ခါးနာခြင်းကို ခံစားရမှာ အသေအချာပါပဲ။

ဖုန်းကိုပုခုံးကြားမှာညှပ်ပြီးမပြောပါနဲ့

ကွန်ပျူတာမှာ စာရိုက်နေရင်း ဖုန်းကို ပုခုံးကြားမှာညှပ်ပြီး ပြောမယ်ဆိုရင် ပုခုံး နဲ့ လည်ပင်းမှာ တင်းကျပ်လာမှာဖြစ်ပါတယ်။ ဒါဟာ ပုံမှန်မဟုတ်တဲ့ ကျောရိုး ကွေးညွတ်မှုကို ဖြစ်ပေါ်စေပြီး အချိန်ကြာကြာ ကိုင်းထားမိမယ်ဆိုရင် ခါးနာ နိုင်ပါတယ်။ ရုံးကနေ အလုပ်လုပ်ရသူများ ခါးနာခြင်းဟာ ထိုင်နေချိန်မှာ ပုံစံ မမှန်ခြင်းကြောင့် ဆိုတာသိသာပါတယ်။ ဒါ့အပြင် ကွန်ပျူတာဖန်သားပြင်၊ ထိုင်ခုံ၊ စားပွဲခုံ များရဲ့ ပုံစံကြောင့်လည်း ဖြစ်ပါတယ်။ ဒီအချက်တွေအားလုံးကြောင့် ဖြစ်လာတဲ့ခါးနာခြင်းဟာ နေ့စဉ်အလုပ်တာဝန်များကိုသာမက ကိုယ့်ရဲ့ ဘဝကိုပါ ထိခိုက်စေပါတယ်။

အကြံပြုလမ်းညွန်ထားတဲ့ လုပ်ဆောင်ချက်တွေကို လိုက်နာသည့်တိုင်အောင် ခါးနာတာမပျောက်သေးဘူးဆိုရင် အောက်ပါအခြေအနေများ ဖြစ်လာနိုင်တာ ကြောင့် ရောဂါရှာဖွေစစ်ဆေးမှုတွေကို လုပ်ဆောင်သင့်ပါတယ်။

• လေးတဲ့အရာဝတ္ထုများကို မ ခြင်း၊ ကိုယ်ဝန်ဆောင်ခြင်း (သို့) မတော်တဆ ထိခိုက်မိခြင်း စတာတွေကြောင့် ဒဏ်ရာရခြင်း၊ အဆစ်လွဲခြင်း၊ ခါးကြွက်သားများ ဝန်ပိခြင်း။
• အသက်အရွယ်ကြောင့်ဖြစ်တဲ့အရိုးပျက်စီးယိုယွင်းခြင်း - အသက် (၃၅)နှစ် နှင့်အထက်ရှိသူများမှာ ခါးဆစ်အရိုးနုယိုယွင်းပျက်စီးမှု အဖြစ်များနိုင်ပါတယ်။
• ခါးနာခြင်းကြောင့် ဖြစ်လာနိုင်တဲ့ အရိုးပြဿနာ၊ ကင်ဆာ၊ အူကျခြင်း (သို့) အဆစ်ရောင်ခြင်း ကဲ့သို့  ရောဂါအခံများ။

ဘဝနေထိုင်မှုပုံစံများကို ပြောင်းလဲပြီး ခါးနာခြင်းဝေဒနာကို သက်သာပျောက်ကင်း နိုင်ပါတယ်။ လေးလံတဲ့အရာဝတ္ထုများကို အကြာကြီး မ ခြင်း၊ ပုံစံတစ်မျိုးတည်းနဲ့ အကြာကြီး ထိုင်ခြင်း ထခြင်း စတာတွေကို ရှောင်ရပါမယ်။ အဲ့ဒီအပြင် ပုံစံမှန်ကန် စွာနဲ့ထိုင်ပြီး အနားမှာရှိတဲ့ အလုပ်နဲ့ ပတ်သက်တဲ့ ပစ္စည်းတွေကိုလည်း သင့်လျော် စွာ ထားရှိရပါမယ်။ ထိုင်နေတဲ့ ပုံစံကို အပြောင်းအလဲလုပ်ပြီး မကြာခဏ ထပြီး လမ်းလျှောက်ခြင်းကိုလည်း လုပ်ဆောင်ရပါမယ်။ ဒီနည်းလမ်းတွေအားလုံးဟာ ခါးနာခြင်းကို သက်သာစေပါတယ်။

ကြွက်သားတွေကို ထိရောက်စွာပြေလျော့နိုင်တဲ့ နောက်ထပ်နည်းလမ်းတစ်ခု ကတော့ အချိန်ယူပြီး အနှိပ်ခံတာပဲဖြစ်ပါတယ်။ ဒါပေမယ့်လည်း ကိုယ်အနှိပ်ခံမယ့်နေရာ ကိုယ့်ကိုနှိပ်မယ့်သူကို ရွေးချယ်တဲ့အခါမှာ ခါးနာတာကို သက်သာအောင်နှိပ်ပေးနိုင်တဲ့ အရည်အချင်းတွေ ပြည့်ဝနေဖို့လိုပါတယ်။ ဒါ့အပြင် အပူကို အသုံးချခြင်းဖြင့်လည်း ကြွက်သားများကိုပြေလျော့စေရုံသာမက တောင့်တင်းမှု များကိုသက်သာစေပြီး နာကျင်မှုကိုလျှော့ချပေးနိုင်ပါတယ်။ ဒီနည်းလမ်းတွေနဲ့အလုပ်မဖြစ်ခဲ့ဘူးဆိုရင်တော့ နာကျင်မှုကို ခေတ္တသက်သာရာ ရဖို့ အကိုက်အခဲပျောက်ဆေးသောက်ပါ။ ဒါပေမယ့် အကိုက်အခဲပျောက်ဆေး တွေဟာ အချိန်အကြာကြီးတော့ မသောက်သင့်ပါဘူး။

တကယ်လို့ ခါးနာခြင်းက ပိုဆိုးလာပြီး (၃)ရက်-(၄)ရက် လောက်ထိ ဆက် နေဦးမယ်ဆိုရင် မှန်ကန်တဲ့ရောဂါရှာဖွေမှုနဲ့ ကုသမှု လုပ်ဆောင်နိုင်ဖို့ ဆရာဝန်နဲ့ ပြသပြီးဆွေးနွေးတိုင်ပင်ရပါမယ်။ ဒီလိုအခြေအနေမှာ ဆရာဝန်ကလည်း ကုသမှု ပုံစံအမျိုးမျိုးကို စဉ်းစားလမ်းညွှန်ပေးမှာဖြစ်ပါတယ်။ ကြွက်သားတောင့်တင်းမှုကို လျော့ကျစေတဲ့ဆေး၊ အကိုက်အခဲပျောက်ဆေး၊ ကြွက်သားရောင်ရမ်းခြင်းကို သက်သာစေတဲ့ဆေး စတာတွေကို ဆရာဝန်က ညွှန်ကြားပေးမှာဖြစ်ပါတယ်။ လူနာရဲ့နာကျင်မှုအမျိုးအစားပေါ်မူတည်ပြီး ဆရာဝန်က ကုသမှုကိုရွေးချယ်ပေးမှာ ဖြစ်ပါတယ်။ တချို့လူနာတွေအတွက် ကြွက်သားနာကျင်မှုနဲ့ ရောင်ရမ်းခြင်းကို လျှော့ချနိုင်တဲ့ ဆေးထိုးခြင်းနဲ့အတူ ကြွက်သားသန်မာမှုနဲ့ ကွေးညွတ်နိုင်မှုကို တိုးတက်စေတဲ့ ကိုယ်ကာယဆိုင်ရာလေ့ကျင့်ခန်းများကိုလည်း လမ်းညွှန်ပေးမှာ ဖြစ်ပါတယ်။ ဒါ့အပြင် တစ်ခါတစ်လေမှာ ခွဲစိတ်ကုသမှုလိုအပ်တာမျိုးလည်း ဖြစ်နိုင်ပါတယ်။ ဒါပေမယ့် ဆရာဝန်များဟာ အများအားဖြင့် ခါးအောက်ပိုင်းရောဂါများကို ကုသဖို့ သာလျှင် ခွဲစိတ်ကုသမှုနည်းလမ်းကို ရွေးချယ်လေ့ရှိပါတယ်။