ကြက်ဥနဲ့တန်ဆေးလွန်ဘေး

ခန္ဓာကိုယ်အလေးချိန်ထိန်းခြင်း၊ ကြွက်သားများသန်မာစေခြင်း၊ ကျန်းမာတဲ့ ကိုယ်ဝန် ဆောင်ကိုထိန်းသိမ်းခြင်း စသည်တို့အတွက် ကြက်ဥဟာ အရေးပါတဲ့ အစားအစာ တစ်ခုဖြစ်ပါတယ်။ ဒါ့အပြင် ကြက်ဥဟာ ဦးနှောက်လုပ်ဆောင်မှုကို အထောက်အကူ ဖြစ်သလို မျက်လုံးကျန်းမာရေးကိုလည်း အကျိုးပြုပါတယ်။ ကြက်ဥကိုဖောက်ပြီး ပြုတ်ခြင်း၊ ရိုးရိုးအခွံပါ ပါအောင်ပြုတ်ခြင်း၊ မွှေကြော်ခြင်း၊ ရေနွေးငွေ့ဖြင့်ပေါင်းခြင်း စသဖြင့် ဘယ်လိုမျိုး လုပ်စားသည်ဖြစ်စေ လူကိုအကျိုးပြုတဲ့ ကောင်းကျိုးတွေ ရရှိစေမှာပါ။ ဒါပေမယ့်လည်း ကြက်ဥရဲ့ ကောင်းကျိုးအာနိသင်ကို အတတ်နိုင်ဆုံး ရချင်တယ်ဆိုရင် သင့်တင့်မျှတစွာ ဘယ်လောက်အတိုင်းအတာစားသုံးရမယ်ဆိုတာကို သိထားဖို့က အရေးကြီးပါတယ်။

ကြက်ဥအကြောင်းဘယ်လောက်ထိသိထားလဲ

ကြက်ဥမှာ ဦးနှောက်ကျန်းမာရေးကို အထောက်အကူဖြစ်စေတဲ့ Choline နဲ့ Lutein ခေါ် ဓာတ် (၂)မျိုးပါဝင်ပါတယ်။ Choline ဟာ သန္ဓေသားဦးနှောက်ဖွံ့ဖြိုးမှု ကနဦး အဆင့် အထူးသဖြင့် မှတ်ဥာဏ်နဲ့ သင်ယူရာမှာ အလုပ် လုပ်တဲ့ ဦးနှောက် အစိတ်အ ပိုင်း များအတွက် အထောက်အကူပြုပါတယ်။  Lutein ဟာလည်း မျက်လုံး ကျန်းမာရေး ကို အားကောင်းစေတဲ့ အစိတ်အပိုင်းတစ်ခုဖြစ်ပြီး သင်ယူမှုနဲ့ ပြင်ပဗဟုသုတ မှတ်ယူနိုင်မှုကို အထောက်အကူဖြစ်စေပါတယ်။ University of Illinois မှာ MPODနည်းပညာ(မျက်လုံးစစ်ဆေးမှုနည်းပညာတစ်မျိုး) နဲ့ စမ်းသပ်စစ်ဆေးခဲ့တဲ့ လေ့လာချက်များအရ ဦးနှောက်အတွင်း Lutein ပါဝင်မှု ပမာဏဟာ ကလေးငယ်တစ်ဦးရဲ့ အချက်အလက်သိရှိနိုင်မှုနဲ့ ဆက်စပ်နေကြောင်း တွေ့ရှိခဲ့ ရပါတယ်။ အဆိုပါ MPOD နည်းပညာဟာ ကလေးသူငယ်များရဲ့ သင်ယူမှုအတွက် ကောင်းကျိုးပြုကြောင်း သုနေသနပြုသူများမှ တွေ့ရှိခဲ့ပါတယ်။

ကြက်ဥရဲ့ကောင်းကျိုးများ

ကြက်ဥမှာ ကိုလက်စ်ထရောလ် ပါဝင်မှုမြင့်မားပေမယ့်လည်း ခန္ဓာကိုယ်ရဲ့ ကိုလက်စ်ထရောလ်ပါဝင်မှုကို ထိန်းညှိရာမှာ အထောက်အကူဖြစ်စေပါတယ်။ ကြက်ဥ မှာ အရည်အသွေးမြင့်မားတဲ့ ပရိုတိန်းဓာတ်တွေ ရရှိတဲ့ အဓိက အစားအစာတစ်ခုဖြစ် သလို ဗီတာမင် A၊ ဗီတာမင် B၊ ဗီတာမင် B12၊ အိုင်အိုဒင်းဓာတ်၊ Folate ဓာတ်နဲ့ Omega-3 ဓာတ် လိုမျိုး ဗီတာမင်နဲ့သတ္တုဓာတ်တွေ မြောက်များစွာပါဝင်ပါတယ်။ ကြက်ဥကိုတစ်နေ့တစ်လုံးစားပေးရင် ကျန်းမာရေးအတွက် ကောင်းကျိုးများစွာရရှိမှာ ဖြစ်ပေမယ့်လည်း လူတစ်ယောက်နဲ့တစ်ယောက် မတူညီနိုင်ပါဘူး။

 ကြက်ဥနှင့်ကျန်းမာရေးပြဿနာများ

Metabloic Syndrome (ဆီးချို၊သွေးတိုးနှင့်အဝလွန်ခြင်း(၃)မျိုးပေါင်းပြီးခံစားနေရသည့် သူများ) ရှိသူများကို ကျပန်းရွေးချယ်ပြီး ပြုလုပ်ခဲ့တဲ့ လေ့လာချက်များအရ တစ်နေ့လျှင် ကြက်ဥ (၃)လုံးစားသူများဟာ လူကိုကောင်းကျိုးပြုသည့်ကိုလ်စ်ထရောလ် နဲ့ အင်ဆူလင်သက်ရောက်စေတဲ့ ပမာဏကို ကောင်းမွန်သည့်ရလဒ်ထွက်ပေါ်စေကြောင်း သိရှိခဲ့ရပါတယ်။ ဒါ့အပြင် ဆီးချိုအဆင့်(၂) ခံစားနေရသူများရဲ့ ကိုယ်အလေးချိန် ထိန်းညှိမှုကို လေ့လာခဲ့ရာမှာ တစ်နေ့ကို ကြက်ဥ(၂)လုံးနှုန်းဖြင့် (၁၂)ပတ် ဆက်တိုက် စားသုံးသူများဟာ အဆီဓာတ်နဲ့ သကြားဓာတ်များ တိုးတက်လာကြောင်း တွေ့ရှိခဲ့ပါ တယ်။ ဒါ့အပြင် ပရိုတိန်းအပြည့်အဝ ( Energy-(၃၅)ရာခိုင်နှုန်း၊ ကြက်ဥပရိုတိန်း (၂၆.၁) ဂရမ်) ရှိတာကြောင့် ကြက်ဥပါဝင်တဲ့ မနက်စာတစ်နပ်ဟာ ဆီးချိုအဆင့်(၂) ခံစားနေရသူလူနာများ အတွက် သွေးတွင်းသကြားဓာတ်ထိန်းညှိပေးဖို့ အထောက်အကူပေးပါတယ်။

အဝလွန်ခြင်း ဟာ အကြောင်းအရင်းများစွာကြောင့်သော်လည်းကောင်း၊ ပုံမှန် လေ့ကျင့်ခန်းနဲ့ ကျန်းမာရေးနဲ့ညီညွတ်တဲ့ စားသောက်မှုပုံစံ မရှိခြင်းကြောင့် သော် လည်းကောင်း ဖြစ်တတ်တဲ့ ရောဂါတစ်ခုပါ။ အစေ့အဆန်၊ ဖွဲနု၊ သစ်သီး၊ ဟင်းသီး ဟင်းရွက်၊ ပရိုတိန်း၊ အဆီပါဝင်မှုနည်းတဲ့(သို့)အဆီမပါတဲ့ စားစရာများကို သင့်တင့် မျှတစွာစားသုံးပေးခြင်းဟာ ကျန်းမာရေးနဲ့ညီညွတ်တဲ့ စားသောက်မှု ပုံစံ တစ်ခု ဖြစ်ပါတယ်။ ဒါ့အပြင် ပရိုတိန်းအများအပြားပါဝင်တဲ့ ကြက်ဥကို စားမယ်ဆိုရင် ဗိုက်လည်းဝသလို ကိုယ်အလေးချိန်ချဖို့ကြိုးစားနေသူများအတွက်လည်း အကျိုးရှိမှာ ဖြစ်ပါတယ်။ နေ့စဉ်စားသောက်တဲ့ မနက်စာကို ဒိုးနတ်ပေါင်မုန့်စားသုံးတဲ့ လူငယ်များနဲ့ ကြက်ဥ စားသုံးတဲ့ လူငယ်များကို နှိုင်းယှဉ်ထားတဲ့လေ့လာချက်များအရ ကြက်ဥစားတဲ့ လူငယ်များဟာ ပိုပြီးလန်းလန်းဆန်းဆန်းရှိခြင်း၊ BMI အညွှန်းကိန်း (၆၁)ရာခိုင်နှုန်း ထိလျော့နည်းခြင်း၊ (၃)လစမ်းသပ်ကာလအတွင်း ကိုယ်အလေးချိန် (၆၅)ရာခိုင်နှုန်း အထိ ကျဆင်းခြင်း စတဲ့ အချက်များကိုတွေ့ရှိခဲ့ရပါတယ်။ ဒါ့အပြင် ဆီးချို အဆင့်(၂)   ရောဂါခံစားနေရသူများကိုလည်း အုပ်စု(၂)ခုခွဲပြီးလေ့လာခဲ့ရာမှာ တစ်နေ့ကို ကြက်ဥ နှစ်လုံးနှုန်းနဲ့ တစ်ပတ်(၆)ရက် စားသုံးသူများဟာ ကြက်ဥမစားသူများ( တူညီတဲ့ စားသောက်မှုပုံစံ) နဲ့ယှဉ်ရင် စားချင်စိတ်လျော့နည်းပြီး ကြက်ဥစားပြီးနောက် ပိုပြီး ဗိုက်ပြည့်သလို ခံစားရကြောင်း တွေ့ရှိခဲ့ရပါတယ်။

ကြက်ဥကိုသတိထားပြီးစားသုံးသင့်သူများ

အောက်ပါအခြေအနေမှာ အကျုံးဝင်နေသူများအနေနဲ့ ကြက်ဥစားရာမှာ သတိထား သင့်ပြီး တစ်ပတ်လျှင် (၃)-(၄)လုံးလောက်သာ (သို့) ကြက်ဥအကာကိုသာလျှင် စားသင့်ပါတယ်။

• သွေးတိုးရှိသူများ
• သက်ကြီးရွယ်အိုများ
• ကိုလက်စ်ထရောလ်မြင့်မားသူများ

ကြက်ဥဟာ နည်းလမ်းမှန်ကန်စွာ စားသုံးမယ်ဆိုရင် ကျန်းမာရေးအတွက် အထောက် အကူပြုပါတယ်။ ကြက်ဥကို ဆီနဲ့ကြော်တာမျိုးဆိုရင် ကိုလက်စ်ထရောလ် များနိုင်တာ ကြောင့် ကြော်စားခြင်းကို ရှောင်ကျဉ်သင့်ပါတယ်။ ဒါဟာ အခန့်မသင့်ရင် သင့်ကျန်းမာရေးကို ဆိုးဆိုးရွားရွားထိခိုက်သွားစေသည်အထိ ဖြစ်လာနိုင်ပါတယ်။