သင့်ရဲ့ ကိုယ်ခံအားစနစ်ကို မြှင့်တင်ပေးဖို့ စားသောက်မှုပုံစံမှာ ပါဝင်သင့်တဲ့ အာဟာရ (၆) မျိုးက ဘာတွေဖြစ်မလဲဆိုတာ ကြည့်လိုက်ကြရအောင်ပါ။
၁။ အဆီ - လိင်မှုဆိုင်ရာဟော်မုန်း နဲ့ စိတ်ဖိစီးမှုကိုခံနိုင်ရည်ရှိတဲ့ ဟော်မုန်းများ အပါအဝင် ဟော်မုန်းထုတ်လုပ်မှုများအတွက် အဆီဟာ အရေးကြီးတဲ့ အခန်းကဏ္ဍ တစ်ခု ဖြစ်ပါတယ်။ ကျန်းမာတဲ့ အဆီစားသုံးမှုဟာ သင့်ရဲ့ ကိုယ်ခံအားကိုမြှင့်တင် ပေးနိုင်မှာ အသေအချာပါပဲ။ ငါး၊ ထောပတ်သီး၊ လုံးတီးဆန်၊ အစေ့အဆန်၊ ဖွဲနု စတာတွေအားလုံးဟာ အဆီပါဝင်မှုရှိတဲ့ အစားအစာတွေပဲဖြစ်ပါတယ်။
၂။ မှို - မှို မှာ မရှိမဖြစ် အာဟာရဓာတ်တွေ အများအပြား ပါဝင်ပါတယ်။ မှို မှာပါဝင်တဲ့ ကာဗိုဟိုက်ဒရိတ်ကွန်ပေါင်းဓာတ်(Polysaccharides)ဟာ သွေးဖြူဥ လုပ်ဆောင်မှုကို ပံ့ပိုးပေးရုံသာမက ကင်ဆာရောဂါကိုကာကွယ်နိုင်ပြီး ခန္ဓာကိုယ်တွင်း ရောဂါပိုး ဝင်ရောက်မှုကို တားဆီးပေးတဲ့ Beta Glucans ဓာတ်များလည်း ပါဝင်ပါတယ်။
၃။ ဗီတာမင်စီ - ဗီတာမင်စီ ဟာ ဟင်းသီဟင်းရွက်နဲ့ သစ်သီးများမှာ ပါဝင်ပြီး ကိုယ်ခံအားတည်ဆောက်မှုကို အထောက်အကူပြုပါတယ်။
၄ ။ Probiotics – Probiotics ဓာတ်ဟာ Lactobacillus နဲ့ Bifidobacterium ကဲ့သို့ သော ကျန်းမာရေးကိုအထောက်အကူပြုသည့် သေးငယ်သောပိုးမွှားများ နဲ့ အတူ ပံ့ပိုး လုပ်ဆောင်ပေးပြီး ဒိန်ချဉ်ကဲ့သို့သော အစားအစာများမှာ တွေ့ရတတ်ပါတယ်။ ယင်း Probiotics ဓာတ်များဟာ အူအစွန်းပိုင်းအမြှေးလွှာမှာ သွေးဖြူဥထုတ်လုပ်မှုကို မြင့်မားစေပြီး ရောင်ရမ်းမှုများကို လျှော့ချပေးနိုင်တဲ့အပြင် ရောဂါအန္တရာယ်တွေအပေါ် အလျှင်အမြန်တုန့်ပြန်နိုင်အောင် က်ိုယ်ခံအားစနစ်ကို အထောက်အကူပြုပါတယ်။
၅ ။ ဗီတာမင်ဒီ - ဗီတာမင်ဒီဟာ သွေးဖြူဥလုပ်ဆောင်မှုကို လှုံ့ဆော်ပေးတဲ့ ကိုယ်ခံအား စနစ်ရဲ့ Cathelicidin ထုတ်လုပ်မှုကိုမြှင့်တင်ပေးပြီး ဖျားနာခြင်းနဲ့ ရောဂါများကို တိုက်ထုတ်ဖို့ အသင့်အနေအထား ရှိနေစေပါတယ်။ ဗီတာမင်ဒီကို နေရောင်ခြည်ဖြင့် တိုက်ရိုက်ထိတွေ့ခြင်း (မနက်အစောပိုင်းနှင့်ညနေပိုင်းတွင်ရရှိသည့် အလင်းရောင် ဖျော့ဖျော့သည်အကောင်းဆုံး) ဖြင့် ရရှိနိုင်သလို မှိုအမျိုးမျိုး၊ ငါး ( အထူးသဖြင့် ဆယ်လ်မွန်ငါး)၊ နို့၊ ချိစ်၊ ဒိန်ချဉ်နဲ့ လိမ္မော်ရည် စတဲ့ အစားအစာများမှ လည်းရရှိနိုင်ပါ တယ်။
၆ ။ ဗီတာမင်အေ - ဗီတာမင်အေ ဟာ သွေးဖြူဥ များထုတ်လုပ်ခြင်းကို အထောက်အကူပြု ရုံသာမက သန်စွမ်းစေပါတယ်။ ဗီတာမင်အေကို ငါးအသည်း၊ မုန်လာဥနီ၊ ဟင်းနုနယ်ရွက်၊ ကြက်ဟင်းခါးသီး၊ ခရမ်းချဉ်သီး၊ ပင်မှည့်သီး၊ ပန်းဂေါ်ဖီစိမ်း စသည်တို့မှ ရရှိနိုင်ပါတယ်။
စားသောက်မှုပုံစံမှာ အာဟာရမျှတအောင် စားသုံးခြင်းအပြင် ကိုယ်ခံအားစနစ်ကို အားနည်းစေတဲ့ စိတ်ဖိစီးမှု၊ ဆေးလိပ်သောက်ခြင်း အရက်သောက်ခြင်း နဲ့ ဆိုးရွားတဲ့ စားသောက်မှုပုံစံ စတာတွေကိုလည်း ရှောင်ကျဉ်သင့်ပါတယ်။
ကျွန်တော်တို့ရဲ့ သွေးဖြူဥများဟာ ဘက်တီးရီးယား၊ ဗိုင်းရပ်စ်ပိုး နဲ့ ခန္ဓာကိုယ်ထဲ ဝင်ရောက်လာတဲ့ ပိုးမွှားမှန်သမျှကို တိုက်ထုတ်ဖို့ လုံလောက်တယ်ဆိုရင် ကျန်းမာသန်စွမ်းတဲ့ ကိုယ်ခံအားစနစ် တစ်ခုကို ပိုင်ဆိုင်ထားတယ်လို့ ဆိုရမှာပါ။ ဒါဆိုရင် ဘယ်လိုအခြေအနေမျိုးမှာမဆို ကျွန်တော်တို့ကို ကျန်းမာနေစေ မှာဖြစ်ပါတယ်။ ကိုယ်ခံအားစနစ်ကောင်းမွန်ဖို့ အလေးပေးလုပ်ဆောင် မယ်ဆိုရင် ကျွန်တော်တို့ အနေနဲ့ ဖျားနာခြင်းကိုလည်း သိသိသာသာလျှော့ချနိုင်မှာ ဖြစ်ပါတယ်။ တကယ်လို့ ဖျားနာခဲ့တယ်ဆိုရင်တောင် ကိုယ်ခံအားကောင်းရင် ကျွန်တော်တို့ ခန္ဓာကိုယ်က သူ့အလိုလို ပြန်လည် ကောင်းမွန်လာစေမှာပဲ ဖြစ်ပါတယ်။
