Share the message

လေ့ကျင့်ခန်းလုပ်တဲ့အကြောင်း ပြောရအောင်

လေ့ကျင့်ခန်းလုပ်တဲ့အကြောင်း ပြောရအောင်(ဘယ်အချိန်ဟာ လေ့ကျင့်ခန်းလုပ်ဖို့ အကောင်းဆုံးလဲ)

အနှစ်ချုပ်

  • အစာစားထားတယ်ဆိုရင်တော့ အနည်းဆုံး တစ်နာရီလောက်ခြားပြီးမှ လေ့ကျင့်ခန်းလုပ်တာဟာ အကောင်းဆုံးပါပဲ။ တကယ်လို့ နေ့လည်စာလို ညစာလို အဓိကထား စားတဲ့ အစာမျိုး ဆိုရင်တော့ အစာ ကောင်းကောင်းကြေလောက်တဲ့အထိ နှစ်နာရီ သုံးနာရီလောက် စောင့်ဆိုင်းပြီးမှ လုပ်သင့်ပါတယ်။
  • ကျန်းမာရေးကောင်းဖို့သက်သက်ဆိုရင် တစ်နေ့ ၁၅ မိနစ်ကနေ နာရီဝက် (တစ်ပတ် မိနစ် ၁၅၀) လောက် လုပ်ရင် လုံလောက်ပါတယ်။
  • အဆီချမယ်ဆိုရင်တော့ တစ်ဆက်ရှင်ကို မိနစ် ၃၀ နဲ့ အထက် လုပ်မှပဲ ရပေလိမ့်မယ်။

ဘယ်အချိန်ဟာ လေ့ကျင့်ခန်းလုပ်ဖို့ အကောင်းဆုံးလဲ။

အမှန်ကတော့ လေ့ကျင့်ခန်းလုပ်ဖို့ အဆင်သင့်ဖြစ်တယ်ဆိုရင် ဘယ်အချိန်မဆို ကောင်းတာပါပဲ။ အဆင်သင့်ဖြစ်တယ် ဆိုရာမှာ ပင်ပန်းနွမ်းနယ်မှု ရှိမနေတဲ့အပြင် အစာ (မုန့်) စားပြီး အနည်းဆုံး တစ်နာရီလောက် (သို့) နေ့လည်စာလို ညစာလို အဓိကထား စားတဲ့ အစာမျိုး ဆိုရင်တော့ အစာ ကောင်းကောင်းကြေလောက်တဲ့အထိ နှစ်နာရီ သုံးနာရီလောက် စောင့်ဆိုင်းပြီးမှ လုပ်သင့်ပါတယ်။ ဒါမှလဲ ကိုယ်ထဲက အစာချေအင်ဇိုင်းတွေက အစာကို ကြေညက်အောင်ချေဖျက်ပေးပြီး ကိုယ်ခန္ဓာကို ပုံမှန်အခြေအနေပြန်ဖြစ်စေဖို့ အချိန် လုံလောက်မှာ ဖြစ်ပါတယ်။

လေ့ကျင့်ခန်းကို မနက်ပိုင်းမှာ လုပ်ရတာ နှစ်သက်သူတွေအဖို့ လုပ်ပြီးတဲ့အချိန်မှာ မောပန်းနွမ်းနယ် နေတာ နုန်းချိသွားတာမျိုးတွေ ဖြစ်တတ်ပါတယ်။ ခန္ဓာကိုယ်ထဲက သကြားဓာတ်တွေ လျော့ကျ သွားလို့ပဲ ဖြစ်ပါတယ်။ ဒါကြောင့် မနက်စောစာစားခြင်းဟာ အရေးကြီးတာဖြစ်ပါတယ်။ ဗိုက်ထဲမှာ အစာမရှိဘဲ လေ့ကျင့်ခန်းမလုပ်သင့်ပါဘူး။ တကယ်လို့ ဘရိတ်ဖတ်စ်စားဖို့ အချိန် မရဘူးဆိုရင် ဘီစကစ် နှစ်ချပ်လောက်နဲ့ ဖြစ်ဖြစ် ဗိုက်ဖြည့်ထားလိုက်ပါ။

နေ့ခင်းတို့ ညနေပိုင်းတို့မှာ လုပ်ရတာ နှစ်သက်သူတွေအဖို့လည်း ဗိုက်ဟောင်းလောင်းနဲ့ မလုပ်ကြဖို့ လေးလေးနက်နက် အကြံပြုပါတယ်။ ကိုယ်ခန္ဓာဟာ တစ်နေ့ကို ကယ်လိုရီ ၂၀၀၀ လိုအပ်ပါတယ်။ လေ့ကျင့်ခန်းလုပ်မယ်ဆိုရင် ကယ်လိုရီ ၅၀၀ လောက် ပို ကုန်ပါတယ်။ အင်အားတွေ ကုန်ခန်းသွားပြီဆိုရင် အစာစားဖို့လိုလာပြီဖြစ်ကြောင်း ခန္ဓာက်ိုယ်ထဲက အချက်ပြလာပါတယ်။ တကယ်လို့ ခွန်အား ထပ် မဖြည့်ဘူးဆိုရင် ကိုယ်ခန္ဓာက စွမ်းအင်ခွဲဝေသုံးစွဲမှုစနစ်ကို ထိန်းချုပ်လာပါလိမ့်မယ်။ ဆိုလိုတာက တစ်ချို့ လှုပ်ရှားမှုတွေကို ကန့်သတ်/ရပ်တန့် လိုက်တာပါပဲ။ အဲဒီမှာပဲ အားအင်ကုန်ခမ်း မောပန်းနွမ်းနယ်လာတာ၊ ခြေကုန်လက်ပန်းကျလာတာတွေ ဖြစ်လာတော့တာပါပဲ။

လေ့ကျင့်ခန်းလုပ်ချင်ပေမယ့် သီးသန့်အချိန်မပေးနိုင်သူတွေအတွက်ကတော့ ဓာတ်လှေကားသုံးမယ့်အစား လှေကားထစ်တွေက တက်တာတွေ၊ ကားနဲ့သွားမယ့်အစား လမ်းလျှောက်သွားလို့ရရင် သွားလိုက်တာတွေ လုပ်သင့်ပါတယ်။ လေ့ကျင့်ခန်းအသည်းအသန်လုပ်တာလောက် ကယ်လိုရီမကျပေမယ့် ကြွက်သားတွေ ပုံမှန်ထက် ပို အလုပ်လုပ်ကြရမှာတော့ အမှန်ပါပဲ။ ဒီ အလေ့အထ ကနေ အကျင့် ဖြစ်လာမယ်ဆိုရင်တော့ ကြွက်သားတွေ အားကောင်းလာပြီး ကယ်လိုရီလောက်ကျွမ်းမှုအတွက် ကောင်းမွန်တဲ့ အကျိုးဆက်တစ်ခု တော့ ရရှိလာမှာဖြစ်ပါတယ်။

လေ့ကျင့်ခန်းကို ဘယ်လောက် ကြာကြာ လုပ်သင့်သလဲ။

အထွေထွေကျန်းမာရေးကောင်းမွန်စေဖို့ဆိုရင် တစ်နေ့ ၁၅ မိနစ် ကနေ နာရီဝက်၊ တစ်ပတ် မိနစ် ၁၅၀ ကတော့ လုပ်မှ ဖြစ်ပါမယ်။ ဘယ်အချိန်မှာ ဘယ်နေရာမှာ လုပ်မယ် ဆိုတာက သိပ် အရေးမပါ ပါဘူး။ အရေးကြီးတာက တစ်ခါလုပ်ရင် အနည်းဆုံး ဆယ်မိနစ် နှုန်းနဲ့တော့ လုပ်ရပါလိမ့်မယ်။ ဆိုလိုတာက လှေကားတက်မယ်ဆိုရင် အနည်းဆုံး ဆယ်မိနစ်ကြာအောင် တက်ရပါမယ်။ အဆီကျချင်လို့ လုပ်မယ် ဆိုရင်တော့ နာရီဝက် တစ်ဆက်ရှင် လုပ်မှ ရပါမယ်။ ဒါမှ နှလုံးခုန်နှုန်းဟာလည်း မှန် လာမယ်။ အဆီတွေကို လောင်ကျွမ်း စေနိုင်တဲ့ burning fat zone အတွင်းကိုလည်း ရောက်လာမယ် ဖြစ်ပါတယ်။ တစ်ခုသိထားဖို့က လေ့ကျင့်ခန်းလုပ်မယ်ဆိုရင် ကိုယ်စိုက်ထုတ်လိုက်ရတဲ့ ခွန်အားအပေါ် အခြေခံပြီး သင့်တော်တဲ့ အချိန်အတိုင်းအတာကို ပေးရမယ် ဆိုတာပါပဲ။

ကစားမလား နားမလား

လေ့ကျင့်ခန်းလုပ်တဲ့အချိန်မှာ စနစ်တကျ အနားယူဖို့လဲ လိုပါတယ်။ အနားယူခြင်းကို နှစ်မျိုး ခွဲနိုင်ပါတယ်။ ပထမတစ်မျိုးက လေ့ကျင့်ခန်းလုပ်နေစဉ်အတွင်း နားဖို့ဖြစ်ပြီး ကြွက်သားတွေ ခံနိုင်ရည်ရှိစေဖို့ ဖြစ်ပါတယ်။ တစ်ကြိမ်နဲ့ တစ်ကြိမ်ကြား ၄၅ စက္ကန့်လောက် အနားပေးသင့်ပါတယ်။ ကြွက်သားသန်မာစေဖို့ဆိုရင်တော့ ၃ မိနစ် ကနေ ၅ မိနစ်လောက်အထိ နားရပါမယ်။ အလေးမ လေ့ကျင့်ခန်းမျိုးလုပ်မယ်ဆိုရင်တော့ ၅ မိနစ်ထက် ပို နားမှ ကိုယ်ခန္ဓာအတွက် လုံလောက်တဲ့ အနားယူမှု ရရှိပါမယ်။

ဒုတိယတစ်မျိုးကတော့ တစ်ဆက်ရှင်နဲ့ တစ်ဆက်ရှင်ကြား အနားပေးခြင်းပဲ ဖြစ်ပါတယ်။ ရွရွပြေးခြင်းနဲ့ အိပ်ထမတင် လို ပေါ့ပေါ့ပါးပါး လေ့ကျင့်ခန်းမျိုးလုပ်နေသူဆိုရင်တော့ နေ့စဉ်ပုံမှန်လုပ်နေရင် ဖြစ်ပါတယ်။ ဘာလို့ဆိုတော့ ခန္ဓာကိုယ်ဟာ ဆဲလ်ပျက်စီးမှုတွေကို ၂၄ နာရီအတွင်း အလိုအလျောက် ပြုပြင်ပေးနိုင် လို့ပါပဲ။ ဒါပေမယ့် ဝိတ်မခြင်း လို ပြင်းထန်တဲ့ လေ့ကျင့်ခန်းမျိုး လုပ်နေတဲ့သူ ဆိုရင်တော့ တစ်ခေါက်နဲ့ တစ်ခေါက်ကြား အနည်းဆုံး နှစ်ရက် နားသင့်ပါတယ်။ ဒါမှလဲ ကြွက်သားတွေနဲ့ ဆဲလ်တွေ ပြန်လည် ပြုပြင်ဖို့ အချိန် လုံလောက်မှာ ဖြစ်ပါတယ်။

လေ့ကျင့်ခန်းလုပ်ဖို့ ဘာတွေ ပြင်ဆင်ရမှာလဲ။

လေ့ကျင့်ခန်းလုပ်ကြစို့ ဆိုရင် ဘာက စ လုပ်ရမှန်းမသိ ဖြစ်တတ်ကြပါတယ်။ အားကစားဝတ်စုံ ဝယ်ရမှာနဲ့၊ တခြားဘာတွေလိုသေးလဲ မသိ၊ အားကစားခန်းမတစ်ခုခုကိုပဲ သွားမှ ရတော့မလိုလို။ မကစားခင် သွေးပူလေ့ကျင့်ခန်းက ဘယ်လိုလုပ်ရမှာတုန်း။ ကစားပြီး သွေးအေးအောင် ဘယ်လို cool down လုပ်ရမှာတုန်း နဲ့ ဖြစ်တတ်ကြပါတယ်။

အဖြေကတော့ “ ခုပဲ ချ လိုက်ကြစို့ ” လို့ ပြောချင်ပါတယ်။ ကိုယ်လက်လှုပ်ရှား လေ့ကျင့်ခန်း ဆိုတာ ကိုယ်တွေ လက်တွေ လှုပ်ရှားနေရင် ရပါပြီ။ Gym ပဲ သွားသွား။ ပန်းခြံထဲပဲ ပတ် ပြေးပြေး ကြိုက်တာ လုပ်နိုင်ပါတယ်။ နေ့စဉ် အလုပ်တွေ လုပ်နေရင်းနဲ့ကိုပဲ လေ့ကျင့်ခန်း လုပ်နိုင်ပါတယ်။ ရုံးထဲမှာ အလုပ် လုပ်ရင်း ခြေတွေမြှောက် လက်တွေဆန့် လုပ်တာပဲဖြစ်ဖြစ်၊ ဓာတ်လှေကားမသုံးလဲ လမ်းလျှောက်တက် တာပဲဖြစ်ဖြစ်။ တတ်နိုင်ရင် ကားမသုံးဘဲ လမ်းလျှောက်သွားတာမျိုး စတာတွေဟာ ကိုယ်လက်လှုပ်ရှား လေ့ကျင့်ခန်းတွေပါပဲ လို့။ဒါကြောင့် လေ့ကျင့်ခန်းလုပ်မယ်ဆို “ ခုပဲ ချ လိုက်ကြစို့ ” လို့ ပြောလိုက်ရပါတယ်။

 

ပိုမိုသိရှိလိုပါကမေးမြန်းနိုင်ပါသည်။

Please complete the form below and we'll get back to you within 48 hours with a response

Rate This Article

User rating: 3.40 out of 5 with 10 ratings